Pëya di bametsu ulibar

Yaan di ujundi

Yaan di ujundi ulibar

Bayëla Jeuva

Manjaku

Um bi familu purir bun pëlilan?

 KAJARA 1

Tsasan pëme ko wi Nasiën batsi ja wi pa pëlilan di bënim

Tsasan pëme ko wi Nasiën batsi ja wi pa pëlilan di bënim

“Di ujundi na leempi bukul a leemp bukul niints ni ñgaats.” — Matthieu 19:4

Jeuva * doon bënim bëcak di umundu. Biblë aja aleemp ñgaats nacak a na “wëlul niints.” Adam a lilan mak a na ja ñgaats nan aci pëñaakul a na ci ‘uliaful.’ (Genèse 2:22, 23)­ Jeuva wama ñgal pa bañaan ban nimar biki ba lilan.

Uci m’du m’nim, m’purir pëjaar ne ngëko ka tuk uwar bëliëng. Maa tsi ubarari, ñgal niints ni ñgaats ban ñgalar biki mak bu purir pëka purblem. (Corinthiens 7:28) Di ulibar wi, kë win ko wi Biblë ja wi, uci m’fets wul, kë purir pëlilan di bënimu ni familu. — Psaume 19:8-11.

 1 NIRANI KO WI JEUVA JA WI

WÉ BIBLË JAWUN: Niints ci wun nawiak di famil. — Éphésiens 5:23.

Uci m’ci niints, Jeuva ñgal pa wi pëtsij aaru kañan kawar. (Pierre 3:7) A leempul pa nul pëci najuraru a na ñgal pa wi përispitarul kë ñgalul. (Genèse 2:18) M’ka pëtsu ngëfiër aaru di bërum ngëfiëru pa pëpiban ne m’ñgalul mak. — Éphésiens 5:25-29.

Uci m’ci ñgaats, Jeuva ñgal pa wi përispitar ayënu mak kë jurarul nu ro ko wi na ka wi përo. (Corinthiens 11:3; Éphésiens 5:33) Nirani ko wi na wejats wi përo, kuu jurarul tsi ko wi nu ro wi. (Colossiens 3:18) Uci m’do ba ko wan kë lilan ayënu kë lilan buts Jeuva. — Pierre 3:1-6.

KO WI M’PURIR WI PËRO:

  • Yepari ayënu o aaru wé m’purir wun përo pa pëci niints o ñgaats nawar. Cikëndëniul uwar, kë ro ko wi m’purir wi përo pa pëci nawar.

  • Cats cësa. M’ka pëme ne, ka jon pa ind pëme ko wi nda purir wi përo, pa nan cii nu lilan acints.

2 NDA YËKËLËRI

WÉ BIBLË JAWUN: M’ka pëme ko wi ayënu o aaru fiër wi. (Philippiens 2:3, 4) Moban ayënu o aaru kañan kawar, lesan ne Jeuva ñgal bi kan fetsul biki ‘pëjuab uwaas ni bañaan bëliëng.’ (Timothée 2:24) Biblë aja: “Përim pëwutsëtsuël aci pi ulaac, maa përim nalipal ka cuunkan.” Kawun m’ka pëwejats ko wi kë ja wi. (Proverbes 12:18) Uwejats ujënts Jeuva purir pëjuraru kë ka irim iwar. — Galates 5:22, 23; Colossiens 4:6.

KO WI M’PURIR WI PËRO:

  • Uci nda ka pëñakan ko, ni ayënu o aaru, m’ka pëñaan Nasiën batsi nu juraru kë tsëkandër kë yël pëcikëndën.

  • Wejatsi mak tsi ko wi m’ka wi pëja, ni bi kë ja bi wul.

 3 NDA TEELËRI

WÉ BIBLË JAWUN: Uci m’nim, wi ni aaru o ni ayënu nda ci “uliaf uloole.” (Matthieu 19:5) Maa nda wama ci bañaan ban pats biki. Kawun nda ka pëtsas pëteelër tsi ko wi nda wejats wi ni ko wi nda ñgal wi. (Philippiens 2:2) Uci nda ñgal përo ko, nda ka pëteelër. Biblë aja: “M’watsana ibats kë ya bërum.” (Proverbes 20:18) Nda tsasan pëme ko wi Biblë ja wi uler wi ndu ro wi ko. — Proverbes 8:32, 33.

KO WI M’PURIR WI PËRO:

  • M’ka pëleents ayënu o aaru ko wi m’wejats wi ni ko un ci wi di uwaasu.

  • Tsats niiran iñaan ko, te m’netse m’ñakan ni aaru o ayënu.

^ par. 4 Jeuva aci katim Nasiën batsi di Biblë.