Dan 1 Corinthiens 6:1-8, l’apotre Paul koz lor bann frere ki poursuive zot camarade devant la cour. Li dire ki li regretté ki certain chretien dan Corinthe ti “osé al la cour devant bann zom ki injuste.” (Verset 1) Paul ti donne bann raison important kifer fodé pa ki bann chretien poursuive zot camarade devant la cour mais au contraire reglé zot bann probleme dan congregation-mem. Anou guette certain raison ki’nn pousse li pou donne sa bann conseil inspiré-la. Apré sa nou pou examine certain cas kot sa bann conseil-la pa necessairement appliké.

Si nou ena enn probleme business avek enn frere, avant tou nou pou rod reglé sa dan fason ki Jéhovah Li, Li oulé, pa dan nou, nou fason. (Proverbes 14:12) Pareil couma Jésus ti montré, li preferable ki nou reglé enn desaccord vite avant ki sa vinn pli grave. (Matthieu 5:23-26) Mais malheureusement, ena certain chretien ki tellement discuté ek pa’lé accepté perdi ki zot mem amenn zot bann probleme devant la cour. Paul ti dire: “C’est enn defaite total pou zot ki zot poursuive zot camarade devant la cour.” Kifer? Enn raison principal, c’est ki sa demarche-la riské gate bon reputation congregation ek Bondié ki nou adoré. Alors nou bizin prend bien compte sa question ki Paul ti posé-la: “Kifer zot pa plutot accepté ki faire zot di-tort?”—Verset 7.

Paul ti dire aussi ki Bondié inn prend enn bon disposition pou reglé beaucoup probleme dan congregation. Bann ancien zot bann chretien ki’nn gagne enn certaine sagesse grace a zot connaissance la Bible. Paul dire ki zot “ena capacité pou jugé entre . . . bann frere” kan bizin reglé “bann zaffaire ki forme partie dan sa la vie-la.” (Verset 3-5) Jésus ti montré couma pou reglé bann probleme kan ena bann faute grave, couma par exemple kan enn kikenn inn koz menti lor enn lot dimoune pou gate so reputation ou-soit kan li’nn faire enn fraude. Li ti montré ki bizin faire enn demarche ki implik trois l’etape. Premierement, faire bann zeffort pou reglé sa probleme-la en privé entre bann dimoune concerné. Deuxiemement, si premier l’etape pa marché, amenn enn ou-soit deux temoin. Troisiemement, si deuxieme l’etape aussi pa marché, amenn sa zaffaire-la devant  la congregation ki representé par bann ancien.—Matthieu 18:15-17.

Bien sur, bann ancien pa necessairement bann avocat ou-soit bann businessman, ek zot role c’est pa pou donne bann conseil dan domaine legal ou-soit business. Zot pa fixé bann condition pou reglé bann probleme business entre bann frere. Parkont, zot essaye aide bann dimoune ki concerné pou applik bann principe la Bible ek pou tombe d’accord entre zot lor enn l’arrangement. Dan bann cas pli compliké, zot kapav demann l’aide surveillant circonscription ou-soit bureau la filiale bann Témoins de Jéhovah. Mais ena certain situation kot bann conseil Paul pa appliké. Ki sa bann situation-la sa?

Dan certain cas, bann dimoune bizin al la cour zis par formalité ou-soit zis parski c’est enn l’obligation legal mem si zot pa attann pou gagne nanyin en retour ek ki zot envie reglé zot probleme dan la paix. Par exemple, kitfois enn dimoune obligé al devant la cour pou certain demarche, par exemple, pou li gagne enn certificat divorce ou-soit gagne la garde bann zenfant, pou fixé somme l’argent ki bizin payé pou enn pension alimentaire, pou gagne remboursement enn l’assurance, pou faire bann demarche si enn business inn faire faillite, ek pou enregistré enn testament. Dan certain cas, kitfois enn frere pensé ki li necessaire ki li amenn enn zaffaire devant la cour pou defann-li kont enn lot dimoune ki pé poursuive li. *

Si enn chretien mette enn zaffaire la cour sans ki li ena l’intention pou leve probleme, li pa pou necessairement agir kont bann conseil inspiré ki Paul ti donné. * Mais so priorité c’est pou sanctifié nom Jéhovah, ek aussi garde la paix ek l’unité congregation. C’est d’abord ek surtout grace a zot l’amour ki reconette bann disciple Christ, ek “[l’amour] pa rod so prop l’interet.”—1 Corinthiens 13:4, 5; Jean 13:34, 35.

^ par. 2 Ena bann cas bien rare kot kitfois enn chretien inn commette enn kitsoz grave kont enn lot couma par exemple enn viol, enn agression physik ki violent, enn crime, ou-soit li’nn commette enn grand vol. Dan sa bann cas-la, enn kikenn pa pou agir kont bann principe chretien si li faire bann l’autorité konn seki’nn passé, mem si sa zaffaire-la kapav al devant la cour.

^ par. 3 Pou plus renseignement, guette La Tour de Garde 15 mars 1997, page 17-22, ek 15 octobre 1991, page 25-8, en français.