Skip to content

Skip to table of contents

 CHAPITRE 13

Bann fête ki pa faire Bondié plaisir

Bann fête ki pa faire Bondié plaisir

“Contigne verifié seki faire le Seigneur plaisir.”—ÉPHÉSIENS 5:10.

1. Ki qualité dimoune Jéhovah attire vers Li, ek kifer zot bizin faire attention lor plan spirituel?

JÉSUS ti dire: “Bann vrai adorateur pou adore le Père avek l’esprit ek la verité, parski avredir, le Père pé rod sa qualité dimoune-la-mem pou adore Li.” (Jean 4:23) Kan Jéhovah trouve sa qualité dimoune-la—pareil couma Li’nn trouve ou—Li attire zot vers Li ek vers so Garson. (Jean 6:44) Sa li vrai-mem enn grand l’honneur! Mais bann ki content la verité ki ena dan la Bible bizin “contigne verifié seki faire le Seigneur plaisir,” parski Satan li enn expert pou embete dimoune.—Éphésiens 5:10; Révélation 12:9.

2. Expliké couma Jéhovah considere bann ki rod melange vrai religion avek fausse religion.

2 Anou guette seki ti arrivé pré ar montagne Sinaï kan bann Israélite ti demann Aaron pou faire enn bondié pou zot. Aaron ti cedé ek li ti faire enn veau en or, mais li ti faire croire ki sa veau-la ti represente Jéhovah. Li ti dire: “Ena enn fête pou Jéhovah demain.” Eski Jéhovah ti d’accord ki zot melange vrai religion ensam avek fausse religion? Non. Li ti faire touye apepré trois mille Israélite ki ti adore sa zidole-la. (Exode 32:1-6, 10, 28) Ki leson nou kapav tiré? Si nou envie reste dan l’amour Bondié, fodé pa nou “touche nanyin ki impur,” mais nou bizin, avant tou, faire tou seki nou kapav pou protege la verité kont tou qualité kitsoz ki kapav contamine li.—Isaïe 52:11; Ézékiel 44:23; Galates 5:9.

3, 4. Kifer nou bizin prend bien compte bann principe la Bible kan nou examine bann coutume ek bann fête populaire?

3 Bann zapotre ti empeche l’apostasie rente dan congregation. Malheureusement, apré zot la mort, bann soi-disant chretien ki  pa ti ena okenn l’amour pou la verité, ti commence adopté bann coutume ek bann fête ki bann païen ti faire, ki sa bann fête-la ti ena enn rapport avek la religion ou-soit non. Zot ti appel tousala bann fête chretien. (2 Thessaloniciens 2:7, 10) A mesure ki ou examine certain parmi sa bann fête-la, remarké couma zot reflete l’esprit le monde, pa l’esprit Bondié. En general, bann fête ki ena dan sa le monde-la, zot ena bann kitsoz en commun: zot excite bann desir la chair ek zot favorise bann fausse croyance religieux ek aussi spiritisme, bann mark ki identifié “Babylone la Grande.” * (Révélation 18:2-4, 23) Pa blié aussi ki Jéhovah Li-mem inn temoin bann pratik religieux degoutant, ek beaucoup coutume populaire zordi inn sorti dan sa bann pratik-la. Pena doute ki sa bann fête-la encore toujours pa faire Li plaisir zordi. Eski c’est pa so fason pensé ki bizin pli important pou nou?—2 Jean 6, 7.

4 En tant ki bann vrai chretien, nou koné ki certain fête pa faire Jéhovah plaisir. Mais en plus, nou bizin bien determiné dan nou leker pou reste loin ar sa bann fête-la. Nou pou reguetté kifer sa bann fête-la pa faire Jéhovah plaisir. Sa pou faire nou pli determiné encore pou rejette tou seki kapav empeche nou reste dan l’amour Bondié.

NOËL—ENN NOUVEAU NOM POU L’ADORATION SOLEIL

5. Kifer nou kapav sur ki Jésus pa ti né le 25 décembre?

5 La Bible pa mentionne ditou enn celebration pou l’anniversaire Jésus. Avredir, nou pa koné ki date exact Jésus ti né. Mais nou kapav sur ki li pa ti né le 25 décembre, enn periode kot l’hiver bien frais dan sa partie le monde-la. * Nou kapav dire sa  parski Luc ti ecrire ki kan Jésus ti né, “bann berger ti pé vive en plein air” pou veille zot bann troupeau. (Luc 2:8-11) Si bann berger ti habitué “vive en plein air” toute longue l’année, pa ti pou vaut la peine mentionne sa detail-la. Mais parski en hiver, ena bann la pluie glacé ek la neige dan Bethléhem, bann berger ti garde zot bann troupeau endan ek zot pa ti “vive en plein air.” En plus, Joseph ek Marie ti al Bethléhem parski César Auguste ti’nn donne l’ordre pou faire enn recensement. (Luc 2:1-7) Bann Juif pa ti content ditou ki bann Romain dirige zot. Alors li bien difficile pou pensé ki César ti pou demann zot deplacé en plein l’hiver pou al dan la ville zot bann ancetre.

6, 7. (a) Kot-sa beaucoup coutume Noël sorti? (b) Ki difference ena entre bann cadeau Noël ek bann cadeau ki bann vrai chretien donné?

6 Noël, li pa enn fête ki sorti dan la Bible, mais li sorti dan bann ancien fête païen couma fête Saturnales ki bann Romain ti faire pou Saturne, zot bondié l’agriculture. Dapré Nouvelle Encyclopédie catholique (en anglais), bann adorateur bondié Mithra zot aussi zot ti choisir le 25 décembre pou celebré “naissance soleil lor ki personne pa kapav gagne la victoire.” “Fête Noël ti commencé dan enn lepok kot l’adoration soleil ti bien populaire dan Rome,” apepré trois cent an apré la mort Christ.

Bann vrai chretien donne bann cadeau parski zot ena l’amour

7 Pendant zot bann fête, bann païen ti donne ek ti recevoir cadeau ek zot ti faire bann grand repas—bann pratik ki nou retrouvé dan fête Noël. Mais dan sa lepok-la pareil couma zordi, beaucoup dimoune pa ti ena sa l’attitude ki mentionné dan 2 Corinthiens 9:7 kan zot ti offert cadeau. Sa verset-la dire: “Laisse sakenn faire couma li finn decidé dan so leker, sans okenn regret, ni par obligation, parski Bondié content enn dimoune ki donne avek la joie.” Bann vrai chretien donné parski zot ena l’amour, pa parski’nn fixé enn certain date pou zot donne cadeau, ek zot pa attann pou gagne cadeau en retour. (Luc 14:12-14; Actes 20:35) En plus, zot content ki zot nepli esclave tou sa bann l’excitation ki ena dan lepok Noël-la. Zot soulagé aussi ki zot nepli ena sa fardeau ki beaucoup dimoune mette lor zot kan zot faire bann dette pendant sa periode l’année-la.—Matthieu 11:28-30; Jean 8:32.

8. Eski bann astrologue ti donne Jésus bann cadeau pou celebré so naissance? Expliké.

 8 Mais, certain kapav demandé, eski bann astrologue pa ti donne Jésus bann cadeau pou celebré so naissance? Non. Dan lepok biblik, bann dimoune ti habitué donne cadeau enn kikenn pou montré ki zot considere li couma enn personnage important. (1 Rois 10:1, 2, 10, 13; Matthieu 2:2, 11) Avredir bann astrologue pa ti mem vinn guette Jésus sa soir ki li ti né-la. Kan zot ti vinn guette li, li pa ti enn tibaba ki ti dan enn mangeoire, mais li ti ena plusieurs mois ek li ti pé reste dan enn lakaz.

SEKI LA BIBLE DIRE LOR BANN L’ANNIVERSAIRE NAISSANCE

9. Ki kitsoz ti arrivé dan bann l’anniversaire ki la Bible mentionné?

Mem si naissance enn tibaba inn touletan enn l’evenement joyeux, la Bible pa mentionne okenn l’anniversaire enn serviteur Bondié. (Psaume 127:3) Eski finn blié mentionne sa? Non, parski  la Bible mentionne deux l’anniversaire, l’anniversaire Pharaon, le roi l’Égypte ek l’anniversaire Hérode Antipas. (Genèse 40:20-22; Marc 6:21-29) Mais la Bible presente toulé-deux couma bann l’evenement ki ti mal passé, surtout deuxieme-la, parski sa jour-la ti coupe la tête Jean Baptiste.

10, 11. Couma bann premier chretien ti considere bann l’anniversaire naissance, ek kifer?

10 Enn encyclopedie (The World Book Encyclopedia) dire: “Pou bann premier chretien, celebré l’anniversaire naissance enn dimoune ti enn coutume païen.” Par exemple, bann Grec dan lepok longtemps ti croire ki chaque dimoune ti ena enn l’esprit ki ti protege li; sa l’esprit-la ti assisté so naissance ek ti veille lor li toute longue so la vie. Livre Coutumes et usages des anniversaires (en anglais) dire ki “ti ena enn relation inpé mystere-mystere [entre sa l’esprit-la ek] bondié ki so l’anniversaire ti tombe mem  jour ki sa dimoune-la.” En plus, depuis longtemps l’anniversaire naissance ena enn rapport avek l’astrologie ek horoscope.

11 Dan le passé, bann serviteur Bondié pa ti rejette bann coutume en rapport avek bann l’anniversaire naissance zis parski sa ti sorti dan bann religion païen ek ti ena enn rapport avek bann mauvais l’esprit. Zot ti aussi rejette sa bann coutume-la par principe. Kifer nou kapav dire sa? Zot ti bann zom ek bann femme ki ti ena l’humilité ek ki ti modeste, ek zot pa ti pensé ki zot naissance dan sa le monde-la ti tellement important ki ti bizin celebré sa chaque fois. * (Mika 6:8; Luc 9:48) Au contraire, zot ti glorifié ek remercié Jéhovah pou la vie, sa don ki ena enn grand valeur-la. *Psaume 8:3, 4; 36:9; Révélation 4:11.

12. Couma jour nou la mort vaut plus ki jour nou naissance?

12 Kan zot mort, tou bann dimoune ki’nn reste fidele ar Bondié, zot en securité dan so memoire, ek zot la vie futur li garanti. (Job 14:14, 15) Ecclésiaste 7:1 dire: “Enn nom vaut plus ki enn bon de l’huile, ek jour la mort vaut plus ki jour naissance.” Nou “nom,” c’est bon reputation ki nou gagné devant Bondié grace a nou service fidele. Li interessant pou noté ki sel l’evenement ki bann chretien inn gagne l’ordre pou celebré pa concerne enn naissance, mais enn la mort, la mort Jésus. Ek so “nom” bien important pou nou delivrance.—Luc 22:17-20; Hébreux 1:3, 4.

PÂQUES—EN REALITÉ ENN L’ADORATION KI ENA RAPPORT AVEK FERTILITÉ

13, 14. Kot-sa bann coutume Pâques ki bien populaire, sorti?

13 Malgré ki bann dimoune presente Pâques couma enn fête ki celebré resurrection Christ, en realité li enn fête ki sorti dan fausse  religion. En français, sa nom-la faire nou pensé ki sa fête-la, c’est fête Pâque ki bann Juif ti celebré ek ki bann chretien inn adopté dan zot fason. Mais dan lezot langue, sa nom-la (Easter en anglais, Ostern en allemand) sorti dan nom Eostre ou-soit Ostara, déesse commencement la journée ek commencement saison beau temps pou bann Anglo-Saxon. Couma dizef ek lapin inn associé ar fête Pâques? Dapré enn encyclopedie (Encyclopædia Britannica), dizef “souvent ti enn symbole nouveau la vie ek resurrection,” ek depuis longtemps lievre ek lapin, ti bann symbole fertilité. Alors fête Pâques, en realité li enn coutume religieux ki ena enn rapport avek fertilité, enn coutume ki bann dimoune inn rearrangé pou ki sa passe pou enn fête ki celebré resurrection Christ. *

14 Eski Jéhovah pou accepté ki celebré resurrection so Garson par enn coutume religieux ki ena rapport avek fertilité ek ki degoutant? Jamais! (2 Corinthiens 6:17, 18) Avredir, la Bible pa donne ni l’ordre ni permission pou celebré resurrection Jésus. Alors kan bann dimoune osé celebré resurrection Jésus ek donne sa enn nom païen couma zot faire dan certain langue, pena doute ki c’est enn kitsoz malhonnete.

FÊTE LA TOUSSAINT EK FÊTE DES MORTS

15. Ki bann coutume ki pa biblik fête la Toussaint ek Fête des morts inn preservé?

15 La Toussaint, li enn fête ki bann catholique celebré le 1er novembre en l’honneur “bann saint.” Pa trop koné kifer zot inn choisir sa date-la. Enn encyclopedie catholique (New Catholic Encyclopedia) faire reference ar bann ancien Celte, enn peuple païen ki ti reste dan bann l’île britannique ek dan certain partie l’Europe. Li dire: “Pou bann Celte, l’hiver ti commencé le 1er novembre. Alors pou zot sa ti enn date approprié pou faire fête pou tou bann saint. Kitfois aussi c’est coumsa-mem ki Samain, enn fête ki bann Celte ti faire pou bann mort, ti vinn  enn fête chretien.” Concernant Fête des mort, mem encyclopedie dire: “Entre bann l’année 500 ek 1500 nou lepok, bann dimoune ti croire ki sa jour-la bann nâme ki dan purgatoire ti prend forme bann fantome ki eclairé, sorciere, crapaud, ek bann lezot kitsoz, pou zot apparette ar bann dimoune ki ti’nn faire zot di-tort kan zot ti vivant.” Ziska zordi bann dimoune encore offert mangé, faire la procession ziska cimetiere, ek suive lezot ancien pratik encore. Li clair ki sa bann fête-la inn preserve bann croyance ek bann coutume païen ki Jéhovah, Bondié la verité pa content.

GARDE BANN CEREMONIE EK RECEPTION MARIAGE PUR

16, 17. (a) Kifer bann chretien ki pé prepare zot mariage bizin examine bann coutume mariage ki ena dan zot l’endroit ek prend compte bann principe biblik? (b) En rapport avek bann coutume couma envoye di-riz, ou-soit lezot kitsoz, ki bann chretien bizin prend en consideration?

16 Bientot, “pou nepli tann la voix le marié ek la marié” dan Babylone la Grande. (Révélation 18:23) Kifer? En partie a cause so bann pratik ki ena rapport avek bann mauvais l’esprit, ki kapav faire enn mariage vinn impur depuis jour reception-mem.—Marc 10:6-9.

17 Bann coutume pa pareil dan tou pays. Certain coutume ki kitfois parette innocent kapav sorti dan bann pratik babylonien ki supposé porte ‘chance’ bann nouveau marié ek zot bann invité. (Isaïe 65:11) Enn parmi sa bann tradition-la, c’est envoye di-riz lor bann nouveau marié, ou-soit envoye lezot kitsoz ki ressemblé sa, couma par exemple confetti. Kitfois sa pratik-la sorti dan croyance ki mangé ti calmé bann mauvais l’esprit ek ti empeche zot faire di-tort bann nouveau marié. En plus, di-riz inn touletan enn symbole ki represente fertilité, bonheur, ek longue la vie dan enn fason inpé mystere. Li clair ki tou bann ki envie reste dan l’amour Bondié pou rejette bann coutume ki contaminé dan sa fason-la.—2 Corinthiens 6:14-18.

18. Ki bann principe la Bible bizin guide enn couple ki pé prepare zot mariage ek aussi bann ki invité?

18 Bann serviteur Jéhovah evite aussi bann pratik le monde ki kapav gate dignité enn ceremonie ek enn reception mariage  ou-soit ki kapav offense conscience certain. Par exemple, zot evite faire bann discours kot ena bann kozé contraire ki blessant ou-soit bann phrase double sens. Zot pa faire aussi bann badinage ou-soit bann remark ki pou embarrasse bann nouveau marié ek lezot dimoune. (Proverbes 26:18, 19; Luc 6:31; 10:27) Zot aussi evite bann reception extravagant ki ‘faire l’etalage ar seki zot moyen permette zot ena’ ek ki pa reflete modestie. (1 Jean 2:16) Si ou pé organise ou mariage, jamais pa blié ki Jéhovah envie ki sa jour special pou ou-la, reste enn bon souvenir ki pou faire ou joyeux, mais ki pa pou faire ou ena regret. *

BOIRE ENN LA SANTÉ, ESKI LI ENA ENN RAPPORT AVEK LA RELIGION?

19, 20. Ki enn livre dire lor l’origine sa coutume pou leve verre-la, ek kifer bann chretien pa leve verre?

19 Souvent dan bann mariage ou-soit lezot l’occasion kot bann dimoune joinde, zot leve zot verre en l’honneur ou-soit a la santé enn dimoune; zot appel sa “faire enn toast.” Livre Guide international des alcools et des cultures (en anglais), ki ti publié en 1995, dire: “Longtemps ti offert bann bondié enn liquide sacré en sacrifice . . . pou ki en retour zot realise enn souhait, setadir enn la priere ki kapav resumé par sa bann mot-la: ‘longue la vie!’ ou-soit ‘santé!’ Li parette ki coutume pou leve verre, li enn partie ki’nn resté dan sa ancien coutume-la.”

20 Li vrai ki beaucoup dimoune pa pensé ki kan zot pé leve zot verre pou boire a la santé enn kikenn, zot pé faire enn kitsoz ki ena rapport avek religion ou-soit superstition. Nou kapav considere sa ancien coutume kot bann dimoune ti leve zot verre di-vin vers le ciel-la coumadir zot ti pé demann “le ciel” (enn la force surnaturel) enn benediction, dan enn fason ki pa en accord avek seki ena dan la Bible.—Jean 14:6; 16:23. *

 “ZOT KI CONTENT JÉHOVAH, ENA LA HAINE POU SEKI MAUVAIS”

21. Mem si kitfois zot pena okenn rapport avek la fausse religion, ki bann fête populaire bann chretien evité, ek kifer?

21 Ena enn kitsoz ki montré ki bann principe moral ki ena dan sa le monde-la pé degradé ek c’est enn kitsoz ki Babylone la Grande soutenir. Dan certain pays, ena bann carnaval ou-soit fête mardi gras toulé-l’année la veille careme catholique, bann fête kot ena bann dansé indecent ek kot mem encourage style la vie bann homosexuel ek bann lesbienne. Eski li pou approprié ki enn ‘dimoune ki content Jéhovah’ assisté enn fête coumsa ou-soit suive sa lor television? Eski kan li faire sa, sa pou montré ki li vrai-mem ena la haine pou seki mauvais? (Psaume 1:1, 2; 97:10) Li preferable ki li imite l’attitude sa ecrivain Psaume-la ki ti prié: “Faire mo lizié pa arrete lor bann kitsoz ki pa vaut nanyin”!—Psaume 119:37.

22. Kan enn chretien kapav decidé personnellement dapré so conscience si li pou participe dan enn fête ou-soit non?

22 Bann jour kot ena bann fête le monde, enn chretien pou faire attention ki so conduite pa donne lezot l’impression ki li aussi li pé participe dan sa bann fête-la. Paul ti ecrire: “Kan zot pé mangé, kan zot pé boire ou-soit n’importe ki kitsoz ki zot pé faire, faire tou pou la gloire Bondié.” (1 Corinthiens 10:31; guette l’encadré “ Couma prend bann bon decision.”) Parkont, si li clair ki enn coutume ou-soit enn fête pena okenn rapport avek fausse religion, ki li pa enn kitsoz politik ou-soit patriotik, ek ki li pa al kont okenn principe la Bible, alors chaque chretien kapav decidé personnellement si li pou participe ladan ou-soit non. En mem temps, li bizin prend sentiment lezot en consideration pangar li faire zot tombé lor plan spirituel.

GLORIFIÉ BONDIÉ PAR NOU BANN PAROLE EK NOU BANN ACTION

23, 24. Couma nou kapav donne enn bon temoignage lor bann principe Jéhovah ki juste?

23 Beaucoup dimoune considere bann jour kot ena bann fête populaire, surtout couma bann l’occasion kot bann famille  ek bann camarade joinde. Alors enn dimoune kapav mal comprend nou position ki basé lor la Bible ek pensé ki nou pena consideration ou-soit ki nou bann fanatik. Nou kapav explik li ki bann Témoins de Jéhovah apprecié bann bon moment ki zot passé avek zot famille ek zot bann camarade. (Proverbes 11:25; Ecclésiaste 3:12, 13; 2 Corinthiens 9:7) Sa faire nou plaisir retrouve-nou avek bann ki nou content dan bann lezot moment pendant l’année. Mais, parski nou content Bondié ek so bann principe ki juste, nou pa’lé gate bann l’occasion joyeux coumsa avek bann coutume ki offense Li.—Guette l’encadré “ Vrai l’adoration faire nou gagne pli grand la joie ki ena.”

24 Certain Témoins inn ena bann conversation interessant avek bann dimoune sincere kan zot inn servi bann point ki ena dan chapitre 16 dan livre Ki la Bible enseigné vrai-mem? * Mais pa blié ki nou l’objectif c’est pou touche leker sa bann dimoune-la, pa pou montré ki zot ena tort. Alors koz avek respé, reste calme, ek ‘fodé ki ou parole faire toujours plaisir pou tendé, ek ki li assaisonné ar di-sel.’—Colossiens 4:6.

25, 26. Couma bann parent kapav aide zot bann zenfant pou fortifié zot la foi ek zot l’amour pou Jéhovah?

25 En tant ki bann serviteur Jéhovah, nou bien informé. Nou koné kifer nou croire ek pratik certain kitsoz ek kifer nou rejette certain. (Hébreux 5:14) Alors parent, montré ou bann zenfant couma pou raisonne lor bann principe la Bible. Kan ou faire sa, ou pou fortifié zot la foi, ou pou aide zot pou donne bann reponse ki basé lor la Bible si kikenn pose zot bann question lor zot bann croyance, ek ou pou donne zot l’assurance ki Jéhovah content zot.—Isaïe 48:17, 18; 1 Pierre 3:15.

26 Tou bann ki adore Bondié “avek l’esprit ek la verité” pa zis evite bann fête ki pa biblik mais zot aussi honnete dan tou domaine zot la vie. Zordi beaucoup dimoune croire ki li pa pratik pou honnete dan la vie. Mais pareil couma nou pou trouvé dan prochain chapitre, kan nou marche dan fason ki Bondié demann nou, sa li toujours pli bon.

^ par. 3 Guette l’encadré “ Eski mo bizin participe dan sa fête-la?” Ena enn la liste certain fête ek congé publik dan l’Index des publications Watch Tower, publié par bann Témoins de Jéhovah.

^ par. 5 Kan nou base-nou lor la Bible ek l’Histoire, nou kapav dire ki Jésus ti né en l’an 2 avant nou lepok dan mois ki bann Juif appel Éthanim ek ki tombe entre mois septembre ek octobre dapré calendrier ki nou servi.—Guette Étude perspicace des Écritures, volume 2, page 21, publié par bann Témoins de Jéhovah.

^ par. 11 Kan l’alliance la Loi ti en vigueur, enn madame ti bizin offert Bondié enn sacrifice pou peché apré naissance so tibaba. (Lévitique 12:1-8) Sa l’obligation legal-la ti rappel bann Israélite ki bann humain transmette peché ar zot bann zenfant. Sa ti aide zot pou ena enn fason pensé equilibré lor naissance enn zenfant ek kitfois sa ti decourage zot pou adopté bann coutume païen en rapport avek naissance enn dimoune.—Psaume 51:5.

^ par. 13 Fête Pâques associé aussi ar l’adoration Astarté, déesse fertilité pou bann Phénicien, ek so bann symbole ti dizef ek lapin. So bann statue ti represente li avek bann l’organe sexuel ki ti enn grosseur exageré, ou-soit avek enn lapin a coté li ek enn dizef dan so la main.

^ par. 18 Guette sa deux lartik ki ena dan La Tour de Garde 1er novembre 2006, en créole, page 12-21, ek lartik ki ena dan La Tour de Garde 15 octobre 2006, en français, page 28-31 ki koz lor bann reception mariage ek bann ti fête.

^ par. 20 Guette La Tour de Garde, 15 février 2007, page 30-1 en français, publié par bann Témoins de Jéhovah.

^ par. 24 Publié par bann Témoins de Jéhovah.