Skip to content

Skip to secondary menu

Skip to table of contents

Bann Temwin Zeova

Kreol Morisien

“Reste dan l’amour Bondié”

 CHAPITRE 3

Content bann dimoune ki Bondié content

Content bann dimoune ki Bondié content

“Enn kikenn ki marche avek bann dimoune ki ena la sagesse pou gagne la sagesse.”—PROVERBES 13:20.

1-3. (a) Ki verité ki nou pa kapav ignoré nou trouvé dan la Bible? (b) Couma nou kapav choisir bann camarade ki pou ena enn bon l’influence lor nou?

DAN enn certain sens, bann dimoune zot couma bann l’eponge; zot ena tendance pou absorbe tou seki entoure zot. Li tellement facile pou adopté l’attitude, principe, ek caractere bann dimoune ki nou frequenté, mem sans ki nou rann-nou compte.

2 La Bible koz lor enn verité ki nou pa kapav ignoré kan li dire: “Enn kikenn ki marche avek bann dimoune ki ena la sagesse pou gagne la sagesse, mais enn kikenn ki gagne zaffaire avek bann dimoune bete, sa pou fini mal pou li.” (Proverbes 13:20) Sa proverbe-la pa koz zis lor bann simple contact ki nou ena avek lezot. L’expression “marche avek” implik l’idée ki nou touletan frequente enn dimoune. * Enn livre ki koz lor la Bible dire concernant sa verset-la: “Marche avek enn dimoune implik l’amour ek l’attachement.” Eski ou pa d’accord ki nou ena tendance pou imite bann ki nou content? Oui. Parski nou attache-nou lor plan affectif ar bann ki nou content, zot kapav ena enn grand l’influence lor nou—soit enn bon l’influence, soit enn mauvais l’influence.

3 Pou nou reste dan l’amour Bondié, li bien important ki nou choisir bann camarade ki pou ena enn bon l’influence  lor nou. Couma nou kapav faire sa? C’est kan nou content bann dimoune ki Bondié content, kan nou faire so bann camarade vinn nou camarade. Maziné. Ki pli bon frequentation nou kapav ena? Eski c’est pa bann dimoune ki ena bann qualité ki Jéhovah rodé dan so bann camarade? Alors, anou examiné ki qualité dimoune Bondié content. Kan fason pensé Jéhovah pou clair dan nou l’esprit, nou pou pli bien equipé pou choisir bann camarade ki pou ena enn bon l’influence lor nou.

BANN DIMOUNE KI BONDIÉ CONTENT

4. Kifer Jéhovah ena droit pou choisir ki qualité camarade Li envie ena, ek kifer Jéhovah ti appel Abraham “mo camarade”?

4 Jéhovah pa choisir n’importe kisannla pou vinn so camarade. Eski ou pa pensé ki Li ena sa droit-la? Apré tou, Li Souverain Seigneur l’univers, ek vinn so camarade c’est pli grand privilege ki enn dimoune kapav ena. Alors kisannla eski Jéhovah choisir couma so bann camarade? Jéhovah vinn proche ar bann ki faire Li confiance ek ki ena enn la foi total en Li. Guette l’exemple Abraham, enn zom ki beaucoup dimoune koné a cause so la foi extraordinaire. Demann enn papa pou offert so garson en sacrifice, sa-mem pli grand test ki kapav ena pou so la foi. * Pourtant, Abraham “ti coumadir offert Isaac” en sacrifice parski li ti sur ‘ki Bondié ti kapav mem releve li parmi bann dimoune mort.’ (Hébreux 11:17-19) Parski Abraham ti montré ki li ti ena sa qualité la foi ek l’obeissance-la, avek l’affection Jéhovah ti appel li “mo camarade.”—Isaïe 41:8; Jacques 2:21-23.

5. Couma eski Jéhovah considere bann ki obeir Li avek fidelité?

5 Enn l’obeissance ki fidele, c’est enn kitsoz ki ena beaucoup valeur pou Jéhovah. Li content bann ki disposé pou  faire zot fidelité pou Li passe avant tou lezot kitsoz. (2 Samuel 22:26) Pareil couma nou ti trouvé dan chapitre 1 sa livre-la, kan bann dimoune choisir pou obeir Jéhovah parski zot content Li, sa faire Jéhovah enn grand plaisir. Proverbes 3:32 dire: “Li bien proche avek bann dimoune ki droite.” Bann ki suive bann principe Bondié avek fidelité, zot gagne enn l’invitation avek Jéhovah: zot kapav vinn bann invité dan so “la tente”—Li invite zot pou vinn adore Li ek zot libre pou prié Li n’importe kan.—Psaume 15:1-5.

6. Couma eski nou montré ki nou content Jésus, ek ki Jéhovah ressenti pou bann ki content so Garson?

6 Jéhovah content bann ki content Jésus, so sel Garson ki Li’nn crée direct. Jésus ti dire: “Si enn kikenn content moi, li pou obeir mo parole, ek mo Papa pou content li, ek nou pou vinn vers li ek nou pou reste kot li.” (Jean 14:23) Couma nou kapav montré ki nou content Jésus? Kan nou suive so bann commandement, parmi ena mission pou preche la bonne nouvelle ek faire bann disciple. (Matthieu 28:19, 20; Jean 14:15, 21) Nou montré aussi ki nou content Jésus kan nou “suive bien so trace,” letan nou imite li dan nou parole ek nou action autant ki nou, bann dimoune imparfait, nou kapav faire. (1 Pierre 2:21) Sa touche leker Jéhovah kan Li trouve zeffort ki bann dimoune faire pou vive couma bann vrai chretien parski zot content so Garson.

7. Kifer li bon ki nou choisir nou bann camarade parmi bann camarade Jéhovah?

7 La foi, fidelité, l’obeissance ek l’amour pou Jésus ek so bann l’enseignement—zot parmi bann qualité ki Jéhovah attann ki So bann camarade ena. Sakenn parmi nou bizin demann li-mem: ‘Eski bann dimoune ki mo frequenté, montré ki zot ena sa bann qualité-la ek ki zot vive dapré sa bann l’enseignement-la? Eski mo finn choisir mo bann camarade parmi bann camarade Jéhovah?’ Li bon ki nou faire bann camarade Jéhovah vinn nou camarade. Bann dimoune ki ena bann qualité ki Bondié content ek ki preche la bonne nouvelle lor Royaume Bondié avek zele, zot kapav ena enn bon  l’influence lor nou. Zot pousse nou pou vive en accord avek decision ki nou’nn prend pou faire Bondié plaisir.—Guette l’encadré  “Ki été enn bon camarade?

ENN L’EXEMPLE BIBLIK KOT NOU TIRE LESON

8. Ki touche ou dan l’amitié ki ti ena entre (a) Naomi ek Ruth? (b) sa trois jeune Hébreu-la? (c) Paul ek Timothée?

8 Dan la Bible ena l’exemple beaucoup dimoune ki finn tire profit parski zot finn choisir bann bon frequentation. Ou kapav lire lor l’amitié entre Naomi ek so belle-fille Ruth, l’amitié solide entre sa trois jeune Hébreu ki ti dan Babylone-la, ek l’amitié entre Paul ek Timothée. (Ruth 1:16; Daniel 3:17, 18; 1 Corinthiens 4:17; Philippiens 2:20-22) Mais anou concentré nou l’attention lor enn lot l’exemple remarquable: l’amitié entre David ek Yonathân.

9, 10. Lor ki kitsoz l’amitié entre David ek Yonathân ti basé?

9 La Bible dire ki apré ki David ti touye Goliath, “nâme Yonathân ti attache avek nâme David, ek Yonathân ti commence content li couma so prop nâme.” (1 Samuel 18:1) C’est coumsa ki malgré enn grand difference l’age ki ti ena entre zot, enn l’amitié solide ti developpé ek ti contigné ziska ki Yonathân mort dan enn la guerre. * (2 Samuel 1:26) Lor ki kitsoz sa lien solide ki ti ena entre sa deux camarade-la ti basé?

10 L’amitié entre David ek Yonathân ti basé lor zot l’amour pou Bondié ek zot grand desir pou reste fidele envers Li. Ti ena enn lien spirituel entre sa deux zom-la. Sakenn ti estime so camarade pou bann qualité ki li ti ena. Surement Yonathân ti impressionné par courage ek zele sa jeune homme ki ti defann nom Jéhovah sans okenn la crainte-la. Ek surement David ti respecté sa zom agé ki ti soutenir bann  disposition Jéhovah avek fidelité, ek ki ti mette bann l’interet so camarade avant so prop l’interet. Guette par exemple, ki ti arrivé kan David ti bien decouragé ek li ti bizin sauvé pou al vive dan desert pou evite colere mauvais le roi Saül, papa Yonathân. Yonathân ti montré so fidelité dan enn fason extraordinaire, kan li ti faire premier pas pou “al joinde David . . . pou ki li fortifié so la main concernant Bondié.” (1 Samuel 23:16) Mazinn seki David ti ressenti kan  so camarade ki li ti bien estimé ti vinn soutenir ek encourage li! *

11. Ki ou aprann lor l’amitié ar l’exemple Yonathân ek David?

11 Ki nou aprann dan l’exemple Yonathân ek David? Avant tou, nou trouvé ki bann valeur spirituel, c’est bann kitsoz pli important ki bann camarade bizin ena en commun. Kan nou vinn proche avek bann ki ena mem croyance, mem principe ek aussi mem desir ki nou pou reste fidele ar Bondié, lerla sakenn kapav partage so bann l’idée, so bann sentiment ek so bann l’experience ki encourage nou ek fortifié nou. (Romains  1:11, 12) Nou trouve sa qualité camarade ki interessé avek bann kitsoz spirituel-la parmi bann ki adore Jéhovah ensam avek nou. Mais eski sa vedir ki tou dimoune ki assisté reunion dan la Salle du Royaume, zot bann bon frequentation? Non, pa necessairement.

COUMA NOU CHOISIR NOU BANN CAMARADE

12, 13. (a) Kifer mem parmi nou bann compagnon chretien, nou bizin faire attention kan nou choisir nou bann camarade? (b) Ki probleme ti existé dan bann congregation premier siecle, ek ki l’avertissement bien puissant Paul ti bizin donné a cause sa?

12 Mem dan congregation, nou bizin choisir bien nou bann camarade si nou envie ki zot encourage nou lor plan spirituel. Eski sa bizin etonne nou? Pa necessairement. Dan congregation, certain chretien kapav prend plus le temps pou vinn mur lor plan spirituel, pareil couma certain fruit lor enn pié kapav prend plus le temps pou mur. C’est a cause sa ki dan n’importe ki congregation, nou trouve bann chretien ki’nn arrive different niveau dan zot developpement spirituel. (Hébreux 5:12–6:3) Bien sur, nou montré patience ek l’amour envers bann nouveau ou-soit bann faible, parski nou envie aide zot pou grandi lor plan spirituel.—Romains 14:1; 15:1.

13 Parfois, dan congregation kapav arrive enn situation kot nou bizin faire attention kisannla nou frequenté. Certain kapav ena enn conduite ki pa correct. Lezot kapav vinn amer ou-soit developpe enn l’esprit critik. Dan premier siecle, bann congregation ti faire face ar mem qualité probleme. Alors ki la plupart dan congregation ti fidele, certain pa ti ena enn bon conduite. Parski certain dan congregation Corinthe pa ti suive bann l’enseignement chretien, l’apotre Paul ti averti sa congregation-la: “Pa trompe zot-mem. Bann mauvais frequentation gate bann bon l’habitude.” (1 Corinthiens 15:12, 33) Paul ti averti Timothée ki mem parmi so bann compagnon chretien, kapav ena certain ki pa agir dan enn bon fason. Paul ti dire Timothée reste loin ar sa bann qualité dimoune-la ek pa faire camarade avek zot.—2 Timothée 2:20-22.

14. Couma nou kapav applik principe ki ena dan bann l’avertissement ki Paul ti donné concernant nou frequentation?

 14 Couma eski nou kapav applik principe ki ena dan bann l’avertissement ki Paul ti donné? C’est kan nou evite vinn proche avek n’importe kisannla ki kapav ena enn mauvais l’influence lor nou, ki li endan ou-soit en dehors congregation. (2 Thessaloniciens 3:6, 7, 14) Nou bizin protege nou spiritualité. Pa blié ki pareil couma enn l’eponge, nou absorbe l’attitude ek comportement ki nou bann camarade ena. Nou pa kapav plonge enn l’eponge dan vinaigre ek attann ki li pou rempli ar de l’eau. Li pareil pou nou. Nou pa kapav frequente bann dimoune ki ena enn mauvais l’influence ek attann ki nou pou absorbe seki bon.—1 Corinthiens 5:6.

Ou kapav trouve bann bon frequentation parmi bann ki adore Jéhovah ensam avek ou

15. Ki ou kapav faire pou trouve bann camarade ki interessé ar bann kitsoz spirituel dan congregation?

15 Heureusement ki nou ena enn grand possibilité pou trouve bann bon frequentation parmi bann ki adore Jéhovah ensam avek nou. (Psaume 133:1) Couma ou kapav trouve bann camarade ki interessé ar bann kitsoz spirituel dan congregation? A mesure ki ou developpe bann qualité ek bann fason agir ki faire Bondié plaisir, surement lezot ki pé faire mem zeffort pou attiré vers ou. En mem temps, kitfois ou pou bizin faire certain kitsoz pratik pou al vers lezot ek faire bann nouveau camarade. (Guette l’encadré “ Couma nou finn faire bann bon camarade.”) Rod bann chretien ki ena bann qualité ki ou, ou envie ena. Suive conseil ki la Bible donné pou ‘elargi-ou,’ kan ou faire camarade ar bann ki ena mem croyance ki ou, n’importe ki zot race, nationalité, ou-soit culture. (2 Corinthiens 6:13; 1 Pierre 2:17) Pa frequente zis bann ki ena mem l’age ki ou. Maziné ki Yonathân ti beaucoup pli agé ki David. Grace a zot l’experience ek zot sagesse, beaucoup frere ek soeur ki pli agé kapav contribué beaucoup dan enn l’amitié.

KAN GAGNE BANN DIFFICULTÉ

16, 17. Si enn frere blesse nou dan kit fason, kifer fodé pa nou quitte la congregation?

16 Dan congregation ena different personnalité ek nou tou  pa sorti dan mem l’environnement. A cause sa, parfois kapav ena probleme. Enn compagnon chretien kapav dire ou-soit faire enn kitsoz ki blesse nou. (Proverbes 12:18) Parfois kapav gagne probleme parski ena bann conflit personnalité, bann malentendu, ou-soit sakenn ena bann l’opinion different. Eski nou pou laisse sa bann qualité probleme-la faire nou tombé lor plan spirituel ek arrete frequente la congregation? Nou pa pou agir coumsa si nou ena vrai l’amour pou Jéhovah ek pou bann ki Li content.

17 En tant ki nou Createur ek sa Kikenn ki donne nou tou kitsoz ki nou bizin pou vive-la, Jéhovah merite nou l’amour ek tou nou l’attachement. (Révélation 4:11) En plus, Jéhovah content pou servi la congregation. Alors la congregation merité ki nou soutenir li avek fidelité. (Hébreux 13:17) Alors si enn frere blesse nou ou-soit faire enn kitsoz ki faire nou chagrin dan kit fason, nou pa pou quitte congregation pou montré ki nou pa d’accord avek seki finn arrivé. Couma nou  kapav faire enn kitsoz coumsa? C’est pa Jéhovah ki’nn offense nou. Jamais nou l’amour pou Jéhovah pou kapav permette nou vire ledo ar Li ek ar so peuple!—Psaume 119:165.

18. (a) Ki nou kapav faire pou favorise la paix dan congregation? (b) Ki bann bienfait nou gagné si nou choisir pou pardonné kan nou ena enn bon raison pou faire li?

18 L’amour pou nou bann frere pousse nou pou favorise la paix dan congregation. Jéhovah pa attann ki bann ki content Li, zot parfait. Nou aussi nou bizin pa attann ki nou bann frere parfait. L’amour permette nou passe lor bann ti erreur parski nou rappel ki nou tou nou imparfait ek nou faire bann erreur. (Proverbes 17:9; 1 Pierre 4:8) L’amour aide nou pou contigne ‘pardonné avek tou nou leker.’ (Colossiens 3:13) Li pa touletan facile pou applik sa conseil-la. Si nou laisse bann sentiment negatif domine nou, nou kapav ena tendance pou garde rancune, ek kitfois nou kapav mem pensé ki, dan enn certaine fason, nou colere pou puni sa dimoune ki’nn offense nou-la. Mais en realité, kan nou garde rancune, sa li faire nou-mem di-tort. Parfois nou ena bann bon raison pou pardonné. Kan nou choisir pou faire sa, nou gagne bann grand bienfait. (Luc 17:3, 4) Sa faire nou gagne la paix dan nou l’esprit ek nou leker, sa garde la paix dan la congregation, ek surtout, sa protege nou relation avek Jéhovah.—Matthieu 6:14, 15; Romains 14:19.

KAN ESKI NOU BIZIN ARRETE FREQUENTE ENN DIMOUNE?

19. Ki bann situation kapav oblige nou pou arrete frequente enn dimoune?

19 Parfois, nou gagne bann l’instruction pou arrete frequente enn dimoune ki ti enn membre congregation. Sa arrivé kan enn dimoune ki’nn desobeir la loi Bondié ek ki pa repenti li exclu, ou-soit kan enn dimoune rejette la verité pou enseigne bann fausse doctrine, ou-soit kan li retire-li volontairement dan congregation. Parole Bondié dire nou dan enn fason bien clair pou “arrete frequente” sa bann qualité  dimoune-la. * (1 Corinthiens 5:11-13; 2 Jean 9-11) Li kapav vrai-mem difficile pou evite enn dimoune ki kitfois ti nou camarade ou-soit ki enn membre nou famille. Eski nou pou prend enn position ferme ek montré ki nou mette nou fidelité envers Jéhovah ek envers so bann la loi ki juste avant tou lezot kitsoz? Pa blié ki fidelité ek l’obeissance ena enn grand valeur pou Jéhovah.

20, 21. (a) Kifer kan exclu enn dimoune, sa li enn disposition ki rempli ar l’amour? (b) Kifer li bien important ki nou konn bien choisir nou bann camarade?

20 Exclu enn dimoune, en realité c’est enn disposition rempli ar l’amour ki Jéhovah inn prend. Kifer? Parski kan exclu enn dimoune ki’nn faire peché ek ki pa repenti, sa li enn fason pou montré l’amour pou nom Jéhovah ki saint ek pou tou seki sa nom-la representé. (1 Pierre 1:15, 16) Sa disposition-la protege la congregation. Li protege bann membre congregation ki fidele kont mauvais l’influence bann ki faire peché volontairement, ek bann ki fidele kapav contigne servi Jéhovah parski zot koné ki congregation li enn place ki bien protegé kont sa mauvais le monde-la. (1 Corinthiens 5:7; Hébreux 12:15, 16) Sa discipline severe-la, c’est enn fason pou montré l’amour envers sa dimoune ki’nn faire peché-la. Ki koné si c’est pa zis enn sok coumsa ki li ti bizin pou realisé ki li bizin change l’attitude ek faire seki necessaire pou revinn vers Jéhovah.—Hébreux 12:11.

21 Li clair ki bann dimoune ki nou frequenté kapav ena enn grand l’influence lor nou. Alors, li bien important ki nou konn choisir nou bann frequentation. Kan nou choisir nou bann camarade parmi bann camarade Jéhovah, kan nou content bann dimoune ki Bondié content, nou pou entoure-nou avek bann pli bon camarade ki kapav ena. Seki nou aprann avek zot pou aide nou pou vive en accord avek decision ki nou’nn prend pou faire Jéhovah plaisir.

^ par. 2 Mot hébreu pou “gagne zaffaire avek,” li aussi traduire par “faire camarade” ek “vinn compagnon.”—Juges 14:20; Proverbes 22:24.

^ par. 4 Kan Jéhovah ti demann Abraham pou faire sa, Li ti donne enn l’idée lor sacrifice ki Li-mem Li ti pou faire kan Li ti pou offert so sel Garson ki Li finn crée direct. (Jean 3:16) Dan cas Abraham, Jéhovah ti empeche li offert so garson ek ti faire li gagne enn belier pou li offert dan place Isaac.—Genèse 22:1, 2, 9-13.

^ par. 9 David ti jeune—li ti “zis enn garson”—kan li ti touye Goliath ek li ti ena apepré 30 an kan Yonathân ti mort. (1 Samuel 17:33; 31:2; 2 Samuel 5:4) Yonathân ti ena apepré 60 an kan li ti mort. Alors li ti surement preské 30 an pli grand ki David.

^ par. 10 Pareil couma 1 Samuel 23:17 raconté, Yonathân ti dire cinq kitsoz pou encourage David: (1) Li ti encourage David pou pa peur. (2) Li ti donne li l’assurance ki bann zeffort Saül pa ti pou reussi. (3) Li ti rappel David ki li ti pou vinn le roi pareil couma Bondié ti’nn promette. (4) Li ti faire serment pou reste fidele ar David. (5) Li ti dire David ki mem Saül ti koné ki li (Yonathân) ti fidele ar David.

^ par. 19 Pou plus renseignement lor fason ki nou bizin agir envers bann ki’nn exclu ou-soit ki’nn retire-zot volontairement dan congregation, guette Appendice “Ki l’attitude nou bizin ena envers enn dimoune ki’nn exclu?