Skip to content

Skip to table of contents

 APPENDICE

Eski Jésus ti né en décembre?

Eski Jésus ti né en décembre?

LA BIBLE pa dire nou kan Jésus ti né. Mais, li donne nou bann bon raison pou dire ki li pa ti né en décembre.

Guette lé-temps couma été dan sa lepok l’année-la, dan Bethléhem, kot Jésus ti né. Kislev, mois dan calendrier juif (ki tombe dan lepok novembre-décembre) ti enn mois kot ti faire frais, ek ti ena beaucoup la-pluie. Mois ki tombe zis apré sa, ti Tébeth (décembre-janvier). Sa-mem mois kot ti faire pli frais pendant l’année, ek kot ti ena la neige dan bann hauteur. Anou guetté ki la Bible dire nou lor climat sa l’endroit-la.

Ezra, ki ti ecrire enn livre la Bible, ti montré ki Kislev ti vrai-mem enn mois kot ti faire frais ek kot beaucoup la-pluie ti tombé. Li ti dire ki enn la-foule ti finn rassemblé dan Jérusalem “dan neuvieme mois [Kislev] dan vingtieme jour le mois.” Lerla Ezra raconté ki bann dimoune “ti pé grelotté . . . a cause la-pluie ki ti pé tombé.” Concernant lé-temps dan sa lepok l’année-la, bann dimoune ki ti rassemblé-la, zot-mem zot ti dire: “Sa-mem saison la pluie, ek li pa possible pou reste  dehors.” (Ezra 10:9, 13; Jérémie 36:22) Li pa etonnant ki bann berger ki ti reste dan bann l’endroit autour Bethléhem ti faire sur ki en décembre, zot ek zot bann troupeau ti nepli reste dehors a-soir!

Mais la Bible dire ki sa soir ki Jésus ti né-la, bann berger ti en plein air pou veille zot bann troupeau. En plus, Luc ecrire dan la Bible, ki dan sa lepok-la, bann berger ti “pé vive en plein air ek ki zot ti pé veille zot bann troupeau a-soir” pré avek Bethléhem. (Luc 2:8-12) Remarké ki bann berger ti pé vive en plein air, zot pa ti pé zis marche-marché dehors pendant li-jour. Dan a-soir, zot ti garde zot bann troupeau en plein air. Eski sa fason ki bannla ti pé vive en plein air-la, li allé avek sa lé-temps bien frais avek so la-pluie, ki ti ena dan Bethléhem en décembre? Non, jamais. Alors sa bann kitsoz ki ti pé passé dan period naissance Jésus, montré ki li pa ti né en décembre. *

La Bible dire nou exactement kan Jésus ti mort, mais li donne zis dé-trois detail lor kan li ti né. Sa faire nou rappel seki le roi Salomon ti dire: “Enn nom vaut plus ki bon de-l’huile, ek jour la mort [vaut] plus ki jour naissance.” (Ecclésiaste 7:1) Li pa etonnant, alors, ki la Bible donne beaucoup detail lor ministere ek la mort Jésus mais bien tigit detail lor so naissance.

Kan Jésus ti né, bann berger ek zot troupeau ti en plein air a-soir

^ par. 1 Pou plus renseignement, guette page 161-5 dan livre Comment raisonner à partir des Écritures ki publié par bann Témoins de Jéhovah.