Skip to content

Skip to table of contents

 CHAPITRE DOUZE

Couma vive dan enn fason ki faire Bondié plaisir?

Couma vive dan enn fason ki faire Bondié plaisir?
  • Couma ou kapav vinn camarade Bondié?

  • Satan mette en doute droit ki Jéhovah ena pou dirigé. Couma sa concerne ou?

  • Ki qualité conduite Jéhovah pa content?

  • Couma ou kapav vive dan enn fason ki faire Bondié plaisir?

1, 2. Cite dé-trois dimoune ki Jéhovah ti considere couma so bann camarade ki Li ti bien content.

KI QUALITÉ dimoune ou pou choisir couma ou camarade? Surement ou pou choisir enn dimoune ki ena mem l’opinion ki ou, ki interesse avek mem kitsoz, ek ki d’accord avek ou lor bon fason vive. Ou pou attiré par enn dimoune ki honnete ek bon, ek ki ena lezot qualité encore.

2 A travers le temps, Bondié finn choisir certain dimoune pou vinn so bann camarade ki Li bien content. Par exemple, Jéhovah ti appel Abraham so camarade. (Isaïe 41:8; Jacques 2:23) Bondié ti appel David “enn zom ki mo leker apprecié,” parski li ti ena bann qualité ki Jéhovah content. (Actes 13:22) Ek Jéhovah ti considere prophete Daniel couma enn “kikenn ki bien desirable.”—Daniel 9:23.

3. Kifer Jéhovah choisir certain dimoune pou vinn so camarade?

3 Kifer Jéhovah ti considere Abraham, David, ek Daniel couma so bann camarade? Li ti dire Abraham: “To finn ecoute mo la-voix.” (Genèse 22:18) Alors, Jéhovah vinn proche avek bann ki faire seki Li demandé, avek l’humilité. Li ti dire bann Israélite: “Obeir moi, ek vrai-mem mo pou vinn zot Bondié, ek  zot, zot pou vinn mo peuple.” (Jérémie 7:23) Si ou obeir Jéhovah, ou aussi ou kapav vinn so camarade!

JÉHOVAH DONNE LA FORCE SO BANN CAMARADE

4, 5. Couma Jéhovah montré so la-force en faveur so peuple?

4 Mazinn seki l’amitié avek Bondié vedir. La Bible dire ki Jéhovah pé rod bann l’occasion pou “montré so la-force pou aide bann ki zot leker complet envers Li.” (2 Chroniques 16:9) Couma eski Jéhovah kapav montré so la-force pou aide ou? Psaume 32:8 montré nou enn fason ki Jéhovah faire sa. Li dire: “Mo [Jéhovah] pou donne toi capacité pou comprend, ek mo pou montré toi dan ki chemin to bizin marché. Mo pou donne toi conseil pendant ki mo lizié reste lor toi.”

5 Sa fason ki Jéhovah prend nou compte-la, li vrai-mem touche nou leker. Jéhovah pou montré ou dan ki direction ou bizin allé, ek Li pou veille lor ou pendant ki ou mette so bann conseil en pratik. Bondié envie aide ou, pou ou kapav endure ou bann l’epreuve. (Psaume 55:22) Alors si ou servi Jéhovah avek enn leker complet, ou kapav ena mem l’assurance ki enn ecrivain Psaume, ki ti dire: “Mo finn mette Jéhovah touletan devant moi. Parski Li dan mo coté droite, nanyin pa pou faire moi tombé.” (Psaume 16:8; 63:8) Oui, Jéhovah kapav aide ou pou vive dan enn fason ki faire Li plaisir. Mais, couma ou koné, Bondié ena enn l’ennemi ki envie empeche ou faire sa.

SATAN LANCE ENN DEFI

6. Ki accusation ki concerne tou dimoune, Satan ti lancé?

6 Chapitre 11 sa livre-la, ti expliké couma Satan le Diable ti mette en doute droit ki Bondié ena pou dirigé. Satan ti accuse Bondié ki Li finn koz menti, ek en mem temps li ti faire comprend ki Jéhovah pa ti gagne droit empeche Adam ek Ève decidé pou zot-mem seki bon ek seki mauvais. Apré ki Adam ek Ève finn faire peché, ek kan la terre ti pé commence rempli avek zot bann descendant, Satan ti mette en doute bann mobile tou dimoune. Li ti lance sa accusation-la: “Dimoune pa servi Bondié parski zot content Li. Donne moi l’occasion, ek mo pou  kapav tourne n’importe kisannla kont Bondié.” Kan nou lire la vie sa dimoune ki appel Job-la, nou trouvé ki sa-mem ki Satan ti croire. Kisannla Job ti été, ek couma eski li ti impliké dan sa question ki Satan ti soulevé-la?

7, 8. (a) Ki ti faire Job different ar tou bann dimoune dan so lepok? (b) Couma Satan ti mette en doute bann raison ki ti pousse Job pou servi Bondié?

7 Job ti vive ena environ 3,600 an. Li ti enn bon dimoune, parski Jéhovah ti dire: “Pena personne couma li lor la terre, personne pa kapav faire li okenn reproche, li enn dimoune sans defaut ek droite, ki ena la crainte pou Bondié ek ki evite tou seki mauvais.” (Job 1:8) Job ti faire Bondié plaisir.

8 Satan ti mette en doute bann raison ki ti pousse Job pou servi Bondié. Li ti dire Jéhovah: “Eski to pa finn monte enn barrage autour li, autour so lakaz ek autour tou seki li ena? To finn beni tou seki li faire, ek so bann troupeau finn augmenté partout dan pays. Mais, pou changé, nek envoye to la-main enn coup lor li, ek touche tou seki li ena, ek guetté si li pa maudit toi dan to figure.”—Job 1:10, 11.

9. Couma Jéhovah ti reponn defi ki Satan ti lancé, ek kifer?

9 Alors Satan ti faire croire ki Job ti servi Bondié zis par l’interet. Li ti aussi dire ki Job pou tourne kont Bondié si faire li passe par bann difficulté. Couma Jéhovah ti reponn sa defi ki Satan ti lancé-la? Jéhovah ti laisse Satan testé Job pou koné pou ki raison vrai-mem Job ti pé servi Li. Coumsa, Job ti pou kapav montré si li ti ena l’amour pou Bondié ou-soit non.

SATAN TESTÉ JOB

10. Ki bann malheur ti abatte lor Job, ek couma li ti reagir?

10 Bien vite Satan ti commence faire Job passe par beaucoup malheur. Bann voleur ti kokin certain so bann zanimo, ek so bann lezot zanimo ti trouve la mort. La plupart so bann serviteur aussi ti perdi zot la-vie. A cause sa, li ti gagne bann problem finance. En plus, malheur finn arrivé kan toulé-dix zenfant ki Job ti ena, ti mort dan enn tempete. Mais malgré tou sa bann  difficulté ki li ti gagné-la, “dan tousala Job pa finn faire peché ek li pa finn blame Bondié.”—Job 1:22.

11. (a) Ki deuxieme accusation Satan ti faire concernant Job, ek couma Jéhovah ti reagir? (b) Couma Job ti reagir kan li ti gagne sa maladie ki ti faire li souffert-la?

11 Satan pa ti baisse lé-bras. Surement li ti pensé ki mem si Job ti reste ferme kan li finn perdi so di-bien, so bann serviteur, ek so bann zenfant, li ti pou tourne kont Bondié, si li ti tombe malade. Jéhovah ti laisse Satan faire Job gagne enn maladie degoutant ki ti faire li souffert beaucoup. Mais mem sa pa ti faire Job perdi so la-foi dan Bondié. Plutot, li ti dire avek determination: ‘Ziska mo mort, mo pa pou rejette mo fidelité!’—Job 27:5.

Bondié ti recompense Job pou so fidelité

12. Couma eski Job ti reponn l’accusation Satan?

12 Job pa ti koné ki c’est Satan ki ti responsable so bann difficulté. Li pa ti konn nanyin lor sa accusation ki Satan ti finn lancé concernant droit ki Jéhovah ena pou dirigé, alors Job ti pensé ki Bondié ti pé faire li gagne tou sa bann problem-la. (Job 6:4; 16:11-14) Mais seulement, li ti reste fidel avek Jéhovah. Satan ti pretann ki Job ti servi Bondié pou bann raison egoïste. Mais par so fidelité, Job ti montré ki sa l’accusation-la ti fausse!

13. Ki Jéhovah finn kapav faire parski Job finn reste fidel?

13 Grace a fidelité Job, Jéhovah finn kapav reponn sa l’accusation Satan-la dan enn fason bien clair. Job ti vrai-mem camarade Jéhovah, ek Jéhovah ti recompense li pou so fidelité.—Job 42:12-17.

COUMA SA CONCERNE OU

14, 15. Kifer nou kapav dire ki l’accusation ki Satan ti lancé concernant Job, concerne tou dimoune?

14 Sa question ki Satan finn soulevé concernant fidelité envers Bondié-la, pa ti concerne zis Job. Ou aussi ou concerné par sa. Proverbes 27:11, montré sa bien kan li dire: “Faire seki bon mo garson, ek faire mo leker content, pou ki mo kapav reponn sa kikenn ki pé provok moi-la.” Sa bann parole ki finn ecrire bann centaine l’année apré la mort Job-la, montré ki Satan ti encore pé provok Jéhovah, ek li ti pé encore accuse So bann  serviteur. Kan nou vive dan enn fason ki faire Jéhovah plaisir, en realité, nou pé aide Jéhovah reponn bann fausse l’accusation Satan, ek coumsa nou pé faire leker Jéhovah content. Ki sa faire ou ressenti? Eski li pa extraordinaire ki ou kapav aide Jéhovah reponn bann fausse l’accusation Satan, mem si sa vedir ki ou bizin faire certain changement dan ou la-vie?

15 Remarké ki Satan ti dire: “Tou seki enn dimoune ena, li pou donne sa pou sap so nâme.” (Job 2:4) Kan li finn dire “enn dimoune,” Satan ti montré clairement ki so l’accusation pa ti applik zis pou Job mais pou tou dimoune. Sa, li enn point bien important. Satan finn mette en doute ou l’integrité envers Bondié. Li envie trouve ou desobeir Bondié ek abandonne enn la-vie ki droite, kan ou gagne bann difficulté. Couma Satan kapav essaye faire sa?

16. (a) Ki bann method Satan servi pou essaye tourne bann dimoune kont Bondié? (b) Couma Satan kapav servi sa bann method-la avek ou?

16 Couma nou finn trouvé dan chapitre 10, Satan servi different method pou essaye tourne bann dimoune kont Bondié. Enn coté, li attaké “couma enn lion ki pé crié, ki pé rod kikenn pou li devoré.” (1 Pierre 5:8) Alors, ou kapav trouve l’influence Satan kan bann camarade, bann famille, ou-soit lezot dimoune rod empeche ou etudié ek mette en pratik seki ou pé aprann. * (Jean 15:19, 20) Lot coté, Satan “contigne transforme li-mem couma enn ange la lumiere.” (2 Corinthiens 11:14) Satan kapav servi bann moyen sournois pou trompe ou ek attire ou loin ar fason vive ki faire Bondié plaisir. Li kapav aussi servi decouragement, kitfois li kapav mem faire ou pensé ki ou pa assez bon pou faire Bondié plaisir. (Proverbes 24:10) Ki Satan pé agir couma enn “lion ki pé crié” ou-soit ki li pé passe pou “enn ange  la lumiere,” so l’accusation reste pareil: Li pé dire ki si ou bizin passe par bann difficulté ou-soit bann tentation, ou pou arrete servi Bondié. Couma eski ou kapav reponn sa l’accusation-la, ek montré ki ou pou reste fidel envers Bondié, pareil couma Job?

OBEIR BANN COMMANDEMENT JÉHOVAH

17. Ki raison principal nou ena pou obeir bann commandement Jéhovah?

17 Ou kapav releve defi ki Satan finn lancé kan ou vive dan enn fason ki faire Bondié plaisir. Ki sa impliké? La Bible reponn: “To bizin content Jéhovah to Bondié avek tou to leker, tou to nâme ek tou to la-force.” (Deutéronome. 6:5) Pli ou l’amour pou Bondié grandi, pli ou pou rempli avek desir pou faire seki Li demann ou. L’apotre Jean ti ecrire; “Ala seki vedir l’amour pou Bondié: nou bizin suive so bann commandement.” Si ou content Jéhovah avek tou ou leker, ou pou trouvé ki “so bann commandement pa lourd.”—1 Jean 5:3.

18, 19. (a) Cite certain bann commandement Jéhovah. (Guette l’encadré “ Rejette seki Jéhovah pa content.”) (b) Couma nou kapav koné ki Bondié pa pé demann nou plus ki seki nou kapav faire?

18 Ki bann commandement Jéhovah nou bizin obeir? Ena certain kitsoz ki nou bizin evité. Par exemple, guette l’encadré avek titre: “ Rejette seki Jéhovah pa content.” Là ou pou trouve enn la-liste bann kitsoz ki la Bible condamné. Premier coup ou guette sa la-liste-la, certain pratik kapav pa parette tellement mauvais. Mais apré ki ou finn reflechi lor bann verset ki donné en reference, surement ou pou trouve sagesse ki ena dan bann la-loi Jéhovah. Kitfois, li pou enn grand defi pou ou, pou faire bann changement dan ou fason vive. Seulement, si ou vive dan enn fason ki faire Bondié plaisir, ou pou gagne enn grand satisfaction ek ou pou heureux. (Isaïe 48:17, 18) Ek faire Bondié plaisir, sa c’est enn kitsoz ki ou kapav faire. Couma nou konn sa?

19 Jéhovah jamais pa demann nou plus ki seki nou kapav faire. (Deutéronome 30:11-14) Li konn plus ki nou, ki quantité  nou kapav faire, ek ki nou bann limite. (Psaume 103:14) En plus, Jéhovah kapav donne nou la force pou obeir Li. L’apotre Paul ti ecrire: “Bondié Li fidel, ek Li pa pou laisse zot gagne enn tentation ki zot pa pou kapav supporté, mais avek sa tentation-la, Li pou aussi donne zot enn moyen pou sorti ladan, pou ki zot kapav supporte sa.” (1 Corinthiens 10:13) Pou aide ou enduré, Jéhovah kapav mem donne ou “la puissance ki depasse seki normal.” (2 Corinthiens 4:7) Apré ki li ti finn passe par beaucoup souffrance, Paul ti kapav dire: “Pou tou kitsoz mo ena courage, grace a sa kikenn ki donne moi la force-la.”—Philippiens 4:13.

 DEVELOPPE BANN QUALITÉ KI FAIRE BONDIÉ PLAISIR

20. Ki bann qualité ki faire Bondié plaisir ou bizin developpé, ek kifer zot important?

20 Bien-sur, faire plaisir Jéhovah implik plus ki rejette bann kitsoz ki Li pa content. En plus, ou bizin content seki Li content. (Romains 12:9) Eski ou pa senti-ou attiré par bann dimoune ki partage ou l’opinion, ki interesse avek bann mem kitsoz ki ou, ek ki d’accord avek ou lor bon fason vive? Jéhovah aussi pareil. Alors aprann pou content bann kitsoz ki Jéhovah content. Certain sa bann kitsoz-la mentionné dan Psaume 15:1-5, ki decrire  bann dimoune ki Bondié considere couma so bann camarade. Bann camarade Jéhovah manifesté seki la Bible appel “fruit de l’esprit.” Sa li implik bann qualité couma “l’amour, la joie, la paix, patience, la bienveillance, la bonté, la foi, la douceur, maitrise de soi.”—Galates 5:22, 23.

21. Ki pou aide ou pou developpe bann qualité ki faire Bondié plaisir?

21 Kan ou lire ek etudié la Bible regulierement, sa pou aide ou developpe bann qualité ki faire Bondié plaisir. Ek kan ou aprann seki Bondié demann ou faire, sa pou aide ou pou pense pareil couma Li pensé. (Isaïe 30:20, 21) Pli ou ena l’amour pou Jéhovah, pli ou pou envie vive dan enn fason ki faire Li plaisir.

22. Ki ou pou reussi faire si ou vive dan enn fason ki faire Bondié plaisir?

22 Bizin faire zeffort pou vive dan enn fason ki faire Jéhovah plaisir. La Bible dire ki kan ou change ou la-vie coumsa, coumadir ou pé tire ou ancien personnalité, ek ou pé mette enn nouveau personnalité lor ou. (Colossiens 3:9, 10) Mais concernant bann commandement Jéhovah, enn ecrivain Psaume dire: “Ena enn grand recompense kan garde [sa bann la-loi-la].” (Psaume 19:11) Ou aussi, ou pou trouvé ki ou pou tire beaucoup profit kan ou vive dan enn fason ki faire Bondié plaisir. Kan ou faire sa, ou pou donne enn reponse ar l’accusation ki Satan finn lancé, ek ou pou faire leker Jéhovah content!

^ par. 16 Sa pa vedir ki Satan ena enn control direct lor bann ki kont ou. Mais Satan li bondié sa system-la, ek le monde entier dan so pouvoir. (2 Corinthiens 4:4; 1 Jean 5:19) Alors, ou kapav attann ki kan ou amenn enn la-vie ki faire Bondié plaisir, beaucoup dimoune pa pou content, ek certain pou kont ou.