Skip to content

Skip to table of contents

 APPENDICE

Ki été “Babylone la Grande”?

Ki été “Babylone la Grande”?

DAN livre Révélation, ena bann expression ki nou pa kapav prend dan sens litteral. (Révélation 1:1) Par exemple, li mentionne enn femme ki ena nom “Babylone la Grande” ecrire lor so front. Li dire ki sa femme-la, li assizé lor “bann la-foule ek bann nation.” (Révélation 17:1, 5, 15) Parski okenn femme pa kapav faire sa dan sens litteral, Babylone la Grande bizin symbolik. Alors, ki sa prostituée symbolik-la representé?

Révélation 17:18, dire ki sa mem femme symbolik-la, li couma enn “grand la-ville ki ena enn royaume lor bann lé-roi la terre.” Sa mot ‘la ville-la,’ faire nou mazinn enn group dimoune ki organisé. Parski sa ‘grand la-ville-la’ ena control lor “bann lé-roi la terre,” nou koné ki sa femme-la,  li represente enn l’organisation ki ena enn grand l’influence partout lor la terre. Kapav appel li enn l’empire mondial, setadir enn grand royaume mondial. Ki qualité l’empire li ét́é? Enn l’empire ki religieux. Guette couma certain passage la Bible dan livre Révélation, amenn nou pou dire sa.

Enn l’empire kapav politik, commercial, ou-soit religieux. Sa femme ki appel Babylone la Grande-la pa kapav enn l’empire politik, parski la Bible dire ki “bann lé-roi la terre,” setadir system politik sa lé-monde-la “finn commette fornication” avek li. So fornication, c’est bann l’alliance ki li’nn faire avek bann dirigeant sa lé-monde-la, ek sa montré kifer appel li “la grande prostituée.”—Révélation 17:1, 2; Jacques 4:4.

Babylone la Grande pa kapav enn l’empire commercial parski bann “marchand lor la terre,” ki represente system commercial, pou ploré dan l’heure kot li pou detruire. En plus, la Bible montré ki bann lé-roi ek bann marchand toulé-deux, pou guette Babylone la Grande depuis “enn distance.” (Révélation 18:3, 9, 10, 15-17) Alors, li raisonnable pou dire ki Babylone la Grande, li pa ni enn l’empire politik, ni enn l’empire commercial, mais li enn l’empire religieux.

Enn lot raison kifer nou kapav dire ki Babylone la Grande li enn l’empire religieux, c’est parski la Bible dire ki li pé mette tou bann nation dan l’erreur, par moyen so “bann pratik spiritisme.” (Révélation 18:23) Li pa etonnant ki la Bible appel Babylone la Grande “enn l’endroit kot bann demon resté,” parski tou bann forme spiritisme, zot religieux ek zot sorti kot bann demon. (Révélation 18:2; Deutéronome 18:10-12) La Bible dire aussi ki sa l’empire-la li faire tou pou li opposé ar vrai religion, ek li persecute bann “prophete” ek bann “saint.” (Révélation 18:24) En realité, Babylone la Grande ena tellement enn grand la-haine pou vrai religion ki li persecute li beaucoup, ek li mem touye “bann temoin Jésus.” (Révélation 17:6) Alors, li clair ki sa femme ki appel Babylone la Grande-la, represente l’empire mondial fausse religion ki en opposition avek Jéhovah.