Pou vinn kamarad Bondie, ou bizin aprann konn Li. Eski ou bann kamarad konn ou nom? Eski zot servi sa nom-la? Pena dout ki zot servi li. Bondie anvi ki ou konn so nom ek ki ou servi sa nom-la. Bondie apel Jéhovah. (Psaume 83:18; Matthieu 6:9) Ou bizin osi aprann seki Li kontan ek seki Li pa kontan. Ou bizin kone kisannla so bann kamarad ek kisannla so bann lennmi. Li pran letan pou arive konn enn kikenn. Labib dir ki li saz ki nou rezerv letan pou aprann lor Bondie.​—Éphésiens 5:15, 16.

Bann kamarad Bondie fer seki Li kontan. Pans ou bann kamarad. Si ou maltret zot, ek ou fer bann kitsoz ki zot pa kontan, eski zot pou kontign res kamarad ar ou? Non biensir! Koumsa mem, si ou anvi vinn kamarad Bondie, ou bizin fer seki fer Li plezir.​—Jean 4:24.

Pa tou relizion ki fer ou gagn lamitie Bondie. Jésus, Bondie so kamarad pli pros, ti koz lor de semin. Enn semin-la bien larz ek li ranpli avek dimounn. Sa semin-la al ver destriksion. Lot semin-la sere ek enn tigit dimounn mem pe mars lor la. Sa semin-la al ver lavi pou touletan. Alor, savedir ki si ou anvi gagn lamitie Bondie, ou bizin aprann konn bon fason pou ador Li.​—Matthieu 7:13, 14.