Skip to content

Skip to table of contents

Zistoire 116: Couma nou kapav vive pou touletan

Zistoire 116: Couma nou kapav vive pou touletan

ESKI to kapav dire ki sa tifi-la ek so bann camarade pé lire? Oui, c’est sa-mem livre ki toi aussi to pé lire—Mo livre zistoire la Bible. Ek zot pé lire sa-mem zistoire ki toi aussi to pé lire-la—“Couma nou kapav vive pou touletan.”

Enn garson pé lire

Eski to koné ki zot pé aprann? D’abord, si nou envie vive pou touletan nou bizin konn Jéhovah ek so Garson Jésus. La Bible dire: ‘Ala couma to kapav vive pou touletan: aprann konn sel vrai Bondié, ek so Garson ki Li ti envoye lor la terre, Jésus Christ.’

Couma nou kapav aprann konn Jéhovah ek so Garson Jésus? Enn fason ki nou kapav faire sa c’est kan nou lire Mo livre zistoire la Bible depuis commencement ziska la fin. Li raconte beaucoup kitsoz lor Jéhovah ek Jésus, pa vrai? Li koz beaucoup lor bann kitsoz ki zot inn faire ek lor bann kitsoz ki zot pou faire. Mais nou bizin faire plus ki zis lire sa livre-la.

Enn la Bible

Eski to trouve sa lot livre ki en bas-la? C’est la Bible. Demann enn kikenn pou lire pou toi bann verset la Bible kot bann zistoire sa livre-la sorti. La Bible donne nou tou renseignement ki nou bizin pou ki nou tou nou servi Jéhovah couma bizin ek gagne la vie pou touletan. Alors, nou bizin prend l’habitude pou etudié la Bible souvent.

Mais zis aprann lor Jéhovah ek Jésus Christ pa assez. Nou kapav konn beaucoup-beaucoup kitsoz lor zot ek lor zot bann l’enseignement, mais pourtant, nou pa gagne la vie pou touletan. Kifer? Eski to koné ki lot kitsoz nou bizin faire encore?

Nou bizin vive en accord avek bann kitsoz ki nou aprann. Eski to rappel Judas Iscariote? Li ti enn parmi bann 12 zapotre ki Jésus ti choisir. Judas ti ena beaucoup connaissance lor Jéhovah ek Jésus. Mais ki ti arrive li? Apré enn tigit le temps, li ti vinn egoïste ek li ti faire traite ar Jésus pou 30 piece l’argent. Alors, Judas pa pou gagne la vie pou touletan.

Eski to rappel Guéhazi, sa missié lor ki nou ti aprann dan zistoire 69-la? Li ti envie gagne bann linge ek kass ki pa ti pou li. Alors, li ti koz menti pou gagne sa bann kitsoz-la. Mais Jéhovah ti puni li, ek li pou puni nou aussi si nou pa obeir so bann la loi.

Mais ena beaucoup bon dimoune ki finn touletan servi Jéhovah avek fidelité. Nou aussi nou envie vinn pareil couma zot, pa vrai? Ti Samuel enn bon l’exemple pou suive. To rappel, couma nou ti guetté dan zistoire 55, li ti ena zis quatre ou-soit cinq an kan li ti commence servi Jéhovah dan so tabernacle. Alors, n’importe ki l’age to ena, to pa trop tipti pou servi Jéhovah.

Bien sur, sa kikenn ki nou tou nou envie suive-la c’est Jésus Christ. Pareil couma nou ti trouvé dan zistoire 87, mem si li ti encore enn ti garson li ti dan temple ek li ti pé koz avek lezot lor so Papa ki dan le ciel. Anou suive so l’exemple. Anou koz lor Jéhovah, nou Bondié extraordinaire, ek so Garson, Jésus Christ, ar autant dimoune ki possible. Si nou faire sa bann kitsoz-la, lerla nou kapav vive pou touletan dan nouveau paradis ki Bondié pou faire lor la terre.

Jean 17:3; Psaume 145:1-21.



Question

  • Ki nou bizin koné si nou envie vive pou touletan?
  • Pareil couma sa tifi-la ek so bann camarade pé faire dan zimage, couma nou kapav aprann lor Jéhovah ek Jésus?
  • Ki lot livre to trouvé dan sa zimage-la, ek kifer nou bizin lire li souvent?
  • A part aprann konn Jéhovah ek Jésus, ki kitsoz nou bizin faire encore pou nou gagne la vie pou touletan?
  • Ki leson nou aprann ar zistoire 69?
  • Ki bon l’exemple ki ti Samuel inn laissé dan zistoire 55 montré?
  • Couma nou kapav imite l’exemple Jésus Christ, ek si nou faire sa, ki nou pou kapav faire dan l’avenir?

Bann question en plus

  • Lire Jean 17:3.

    Couma bann l’Ecriture montré ki aprann konn Jéhovah ek Jésus, vedir plus ki zis aprann bann kitsoz par coeur? (Mat. 7:21; Jacq. 2:18-20; 1 Jean 2:17)

  • Lire Psaume 145:1-21.

    Ki certain bon raison nou ena pou loué Jéhovah? (Ps. 145:8-11; Rév. 4:11)

    Couma Jéhovah “bon ar tou dimoune,” ek couma sa bizin faire nou vinn pli proche ar Li? (Ps. 145:9; Mat. 5:43-45)

    Si Jéhovah ena enn place dan nou leker, sa pou pousse nou pou faire ki kitsoz? (Ps. 119:171, 172, 175; 145:11, 12, 21)