Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 111: Enn garson gagne sommeil

Zistoire 111: Enn garson gagne sommeil

AYO! Ki pé arrivé-la? Eski sa garson ki enba-la inn blessé beaucoup? Guetté! Enn parmi bann missié ki pé sorti dan sa lakaz-la c’est Paul! Eski to kapav trouve Timothée aussi? Eski sa garson-la inn sap depuis la fenetre inn tombé?

Paul pé vinn ressuscite Eutyche

Oui, sa-mem ki’nn arrivé. Paul pé faire enn discours devant bann disciple dan Troas. Li koné ki li pa pou ré-trouve zot pendant enn bon boute le temps parski demain li pé prend bateau li pé allé. Alors, li contigne kozé ziska minuit.

Sa garson-la appel Eutyche. Li ti pé assizé kot la fenetre ek li’nn gagne sommeil. Li finn sap lor bord la fenetre, lor troisieme l’etage, ek li’nn tombé! Alors, to kapav trouvé kifer bann dimoune pé gagne tracas. Kan bann missié leve garson-la, seki zot ti pé peur sa-mem arrivé. Li’nn mort!

Kan Paul trouvé ki garson-la inn mort, li allonge lor li ek maye li. Apré sa li dire: ‘Pa gagne tracas. Li bien!’ Ek vrai-mem li bien! C’est enn mirak! Paul inn ressuscite li! La foule bien content.

Zot tou ré-monté ek al mangé. Paul contigne kozé ziska faire clair. Mais to kapav sur ki Eutyche pa ré-gagne sommeil encore! Lerla Paul, Timothée ek bann ki pé voyage avek zot, prend bateau. Eski to koné kot-sa zot pé allé?

Paul fek fini so troisieme voyage predication, ek li pé retourne kot li. Pendant sa voyage-la Paul finn reste trois an zis dan la ville Éphèse. Alors sa voyage-la pli longue ki so deuxieme voyage.

Apré ki li’nn quitte Troas, bateau-la arrete Milet pou enn ti moment. Couma Éphèse pa trop loin, Paul envoye enn message bann ancien dan sa congregation-la pou ki zot vinn Milet, coumsa li kapav koz ar zot pou enn dernier fois. Apré sa, kan inn arrive ler pou ki bateau allé, bannla bien triste pou trouve Paul allé!

A la fin bateau-la retourne Césarée. Pendant ki Paul pé reste kot disciple Philippe, prophete Agabus donne enn l’avertissement Paul. Li dire ki kan Paul pou al Jérusalem bannla pou faire li prisonnier. Ek vrai-mem sa arrivé. Lerla, apré ki li dan prison pendant deux an dan Césarée, bannla envoye Paul dan Rome pou ki chef Romain César juge li. Anou guetté ki arrivé pendant so voyage pou al Rome.

Actes chapitre 19 ziska 26.



Question

  • Dan zimage, kisannla sa garson ki pé allongé enba-la, ek ki’nn arrive li?
  • Ki Paul faire kan li trouvé ki sa garson-la inn mort?
  • Kot-sa Paul, Timothée, ek bann ki voyage ar zot pé allé, ek ki arrivé kan zot arrete Milet?
  • Ki l’avertissement prophete Agabus donne Paul, ek couma seki sa prophete-la dire vinn vrai?

Bann question en plus

  • Lire Actes 20:7-38.

    Couma nou kapav “pena di-sang personne lor [nou] la tête” dapré seki Paul inn dire dan Actes 20:26, 27? (Ézék. 33:8; Actes 18:6, 7)

    Kifer bann ancien bizin “reste bien attaché ar parole ki fidele” kan zot pé enseigné? (Actes 20:17, 29, 30; Tite 1:7-9; 2 Tim. 1:13)

  • Lire Actes 26:24-32.

    Paul ti enn citoyen romain, couma li’nn servi sa pou accompli mission ki Jésus inn donne li pou preché? (Actes 9:15; 16:37, 38; 25:11, 12; 26:32; Luc 21:12, 13)