Skip to content

Skip to table of contents

Zistoire 109: Pierre visite Corneille

Zistoire 109: Pierre visite Corneille

C’EST l’apotre Pierre ki pé deboute ici ek bann ki derriere li c’est deux-trois so bann camarade. Mais kifer sa missié-la pé agenou devant Pierre? Eski li bizin faire sa? Eski to koné kisannla sa?

Pierre zwenn Corneille

Sa missié-la c’est Corneille. C’est enn officier dan l’armée Romain. Corneille pa konn Pierre, mais finn dire li invite Pierre kot li. Anou guetté couma sa inn arrivé.

Bann premier disciple Jésus ti bann Juif, mais Corneille pa enn Juif. Pourtant li content Bondié, li prié Li ek faire beaucoup bon kitsoz pou bann dimoune. Enn apré-midi, enn ange apparette ar li ek dire: ‘To’nn faire Bondié plaisir, ek Li pou reponn to bann la priere. Envoye deux-trois zom pou al rod enn missié ki appel Pierre. Li pé reste dan Joppé dan lakaz Simon, ki reste pré kot la mer.’

Desuite Corneille envoye deux-trois zom pou al rod Pierre. Lendemain, kan sa bann missié-la arrive pré kot Joppé, Pierre la-haut lor lakaz Simon. La, Bondié faire Pierre gagne enn vision kot li trouve enn grand la toile ki sorti dan le ciel. Dan sa la toile-la ena tou sorte qualité zanimo. Dapré la loi Bondié, sa bann zanimo-la zot impur, ek pourtant la voix-la dire: ‘Pierre, levé. Touyé ek mangé.’

Pierre reponn: ‘Non! Jamais mo’nn mange kitsoz ki impur.’ Mais la voix-la dire Pierre: ‘Arrete appel impur seki Bondié asterla considere couma pur.’ Sa arrivé trois fois. Pendant ki Pierre pé reflechi lor seki tousala vedir, bann missié ki Corneille inn envoyé arrivé ek pé rod Pierre.

Pierre desann ek dire: ‘Mo-mem sa dimoune ki zot pé rodé-la. Kifer zot finn vini?’ Kan bann missié expliké ki enn ange inn dire Corneille invite Pierre kot li, Pierre accepté pou al avek zot. Lendemain, Pierre ek so bann camarade al visite Corneille dan Césarée.

Corneille finn rassemblé tou so famille ek so bann bon camarade. Kan Pierre vini Corneille vinn joinde li. Li tombe dan lipié Pierre ek agenou, pareil couma to kapav trouvé lor zimage. Mais Pierre dire: ‘Levé; mo zis enn zom pareil couma toi.’ La Bible montré ki li pa bon ki nou agenou ek adore enn zom. Nou bizin adore zis Jéhovah tousel.

Asterla Pierre preche avek tou seki la. Pierre dire: ‘Mo trouvé ki Bondié accepté tou dimoune ki envie servi Li.’ Ek pendant ki li pé kozé, Bondié envoye so l’esprit saint, ek bann dimoune commence koz dan different langue. Bann disciple Juif ki ti vinn avek Pierre etonné, parski zot ti pensé ki Bondié donne so faveur zis bann Juif. Sa enseigne zot ki Bondié pa content bann dimoune ki dan enn race plus ki enn lot ou-soit ki certain pli important pou Bondié zis parski zot sorti dan enn certain race. Eski c’est pa enn bon kitsoz ki nou tou bizin rappel?

Actes 10:1-48; 11:1-18; Révélation 19:10.



Question

  • Kisannla sa missié ki pé agenou lor sa zimage-la?
  • Ki enn ange dire Corneille?
  • Ki kitsoz Bondié faire Pierre trouvé kan li ti lor lakaz Simon dan Joppé?
  • Kifer Pierre dire Corneille ki li pa bizin agenou ek adore li?
  • Kifer bann disciple juif ki avek Pierre etonné?
  • Ki leson important nou bizin aprann ar visite ki Pierre inn rann Corneille?

Bann question en plus

  • Lire Actes 10:1-48.

    Ki bann parole ki Pierre inn dire dan Actes 10:42 montré concernant travail pou preche la bonne nouvelle lor Royaume Bondié? (Mat. 28:19; Marc 13:10; Actes 1:8)

  • Lire Actes 11:1-18.

    Ki l’attitude Pierre ti ena kan direction ki Jéhovah ti donné concernant bann Gentil ti vinn clair, ek couma nou kapav imite so l’exemple? (Actes 11:17, 18; 2 Cor. 10:5; Éph. 5:17)