Skip to content

Skip to table of contents

Zistoire 112: Naufrage lor enn l’île

Zistoire 112: Naufrage lor enn l’île

GUETTE sa bateau-la couma dan probleme! Li pé cassé boute-boute! Eski to trouve bann dimoune ki’nn saute dan de l’eau? Certain finn reussi arrive lor la cote. Eski c’est Paul ki la-bas-la? Anou guetté ki finn arrive li.

Bann survivant bateau ki’nn faire naufrage

Surement to rappel ki pendant deux an Paul ti reste dan prison dan Césarée. Lerla, ti mette li ek certain prisonnier lor enn bateau pou al Rome. Kan zot passe pré ar l’île Crète enn gros cyclone tape lor zot. Di-vent tape tellement fort ki bann zom nepli kapav dirige bateau. Zot pa trouve soleil pendant li jour ni bann zetoile a-soir. A la fin, apré plusieurs jour, bann ki lor bateau perdi tou l’espoir pou sorte vivant.

Lerla Paul debouté ek dire: ‘Personne parmi zot pa pou perdi so la vie; zot pou perdi zis bateau-la. Parski hier soir, enn ange Bondié ti vinn dire moi: “Pa gagne peur, Paul! To bizin presente toi devant chef Romain César. Ek Bondié pou sap tou sa bann dimoune ki pé voyage ar toi-la.” ’

Vers minuit, 14eme jour apré ki cyclone finn levé, bann marin remarké ki pli allé fondeur de l’eau pé baissé! Zot jette l’ancre parski zot gagne peur tension bateau-la crase lor bann roche. Lendemain gramatin, zot trouve enn la plage. Zot decide pou essaye amenn bateau-la lor la plage.

Kan zot arrive pré ar la cote, bateau-la tape avek enn banc di-sable ek li tasse la-mem. Bann vague commence crase lor la, ek bateau-la commence cassé boute-boute. Sa officier l’armée ki ti en charge-la dire: ‘Tou bann ki kapav nagé saute dan la mer avant ek nagé ziska la plage. Le reste sauté apré ek suive bannla, trappe bann boute planche bateau pou ki zot kapav flotté.’ Ek c’est seki zot faire. Coumsa toulé 276 dimoune ki ti lor sa bateau-la finn reussi vinn lor la plage sans ki arrive zot nanyin, pareil couma sa ange-la ti promette.

Sa l’île-la appel Malte. Bann dimoune ki vive la-bas, zot bann bon dimoune ek zot prend soin bann ki ti dan bateau. Kan le temps inpé pli bon, bannla mette Paul lor enn lot bateau pou al Rome.

Actes 27:1-44; 28:1-14.



Question

  • Ki arrive bateau lor ki Paul ti pé voyagé kan li pé passe pré ar l’île Crète?
  • Ki Paul dire ar bann ki lor bateau?
  • Couma bateau-la cassé boute-boute?
  • Ki l’instruction enn officier l’armée ki en charge inn donné, ek comié dimoune arrive lor bord la mer en securité?
  • Lor ki l’île zot arrivé, ek ki arrive Paul kan le temps vinn pli bon?

Bann question en plus

  • Lire Actes 27:1-44.

    Kan nou lire concernant voyage ki Paul inn faire pou al Rome, couma sa fortifié confiance ki nou ena ki la Bible li exact? (Actes 27:16-19, 27-32; Luc 1:3; 2 Tim. 3:16, 17)

  • Lire Actes 28:1-14.

    Si bann habitant Malte, ki ti bann païen, ti senti zot poussé pou prend compte l’apotre Paul ek so bann compagnon ki’nn faire naufrage avek “enn bonté naturel extraordinaire,” ki bann chretien bizin senti zot poussé pou faire ek surtout dan ki fason? (Actes 28:1, 2; Héb. 13:1, 2; 1 Pierre 4:9)