Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 110: Timothée—nouveau compagnon Paul

Zistoire 110: Timothée—nouveau compagnon Paul

SA JEUNE missié ki to trouvé ici avek l’apotre Paul-la, c’est Timothée. Timothée reste dan Lystres avek so famille. So mama appel Eunice ek so grand-mere Loïs.

Sa faire troisieme fois ki Paul visite la ville Lystres. Apepré enn an avant, Paul ek Barnabas ti vinn la pou premier fois pou preché. Ek asterla, Paul inn retourné avek so camarade Silas.

Timothée ek Paul

Eski to koné ki Paul pé dire Timothée? Li pé demann li: ‘Eski to ti pou content vinn ar Silas ek moi? Nou pou kapav servi toi pou preche avek bann dimoune ki reste bien loin.’

Timothée reponn: ‘Oui, mo ti pou content al avek zot.’ Desuite apré, Timothée quitte so famille ek al avek Paul ek Silas. Mais avant ki nou aprann lor zot voyage, anou guetté ki finn arrive Paul. Sa faire apepré 17 an depuis ki Jésus ti apparette avek li lor chemin pou al Damas.

To rappel, Paul ti vinn Damas pou faire di-tort bann disciple Jésus, mais asterla li-mem li enn disciple! Plitar, certain l’ennemi finn faire plan pou touye Paul, parski zot pa ti content so l’enseignement lor Jésus. Mais bann disciple aide Paul pou sauvé. Zot inn mette li dan enn panier ek zot faire li desann en dehors muraille la ville.

Apré sa, Paul al Antioche pou preché. C’est dan sa l’endroit-la-mem ki pou premier fois appel bann disciple Jésus bann chretien. Paul ek Barnabas gagne l’ordre pou quitte Antioche ek pou al preche dan bann pays pli loin. Enn parmi bann la ville ki zot visité appel Lystres, kot Timothée resté.

Asterla, preské enn an apré, Paul retourne Lystres pou deuxieme fois. Kan Timothée al avek Paul ek Silas, eski to koné kot zot allé? Guette sa map-la, ek anou aprann deux-trois place.

Premierement, zot al pré kot Iconium, apré dan enn deuxieme la ville ki appel Antioche. Apré sa, zot al Troas, Philippe, Thessalonique ek Bérée. Eski to trouve Athènes lor map? Paul preche la-bas aussi. Apré sa, zot preché pendant enn an et demi dan Corinthe. Finalement, zot arreté pou enn tigit le temps dan Éphèse. Apré sa, zot retourne Césarée par bateau, ek zot al Antioche, l’endroit kot Paul ti resté.

Alors, Timothée voyage bann centaine kilometre pou aide Paul preche la “bonne nouvelle” ek pou forme beaucoup congregation. Kan to vinn pli grand, eski toi aussi to pou vinn enn fidele serviteur Bondié pareil couma Timothée?

Actes 9:19-30; 11:19-26; chapitre 13 ziska 17; 18:1-22.

Enn map

1. Rome; 2. Malte; 3. Bérée; 4. Thessalonique; 5. Corinthe; 6. Philippes; 7. Athènes; 8. Crète; 9. Troas; 10. Éphèse; 11. Milet; 12. Colosses; 13. Antioche; 14. Iconium; 15. Lystres; 16. Chypre; 17. Antioche; 18. Césarée; 19. Joppé; 20. Damas; 21. Jérusalem; 22. Grand la mer (Méditérranée)



Question

  • Kisannla sa jeune missié lor zimage-la, kot-sa li resté, ek couma so mama ek so grand-mere appelé?
  • Kan Paul ti invite Timothée pou vinn ensam avek li ek Silas pou al preche avek bann dimoune ki reste bien loin, ki Timothée ti dire li?
  • Kot-sa pou premier fois ti appel bann disciple Jésus bann chretien?
  • Apré ki Paul ek Barnabas quitte Antioche, cite certain la ville ki zot ti al visité.
  • Couma eski Timothée aide Paul, ek ki question bann jeune zordi bizin demann zot-mem?

Bann question en plus

  • Lire Actes 9:19-30.

    Couma eski l’apotre Paul ti montré li prudent kan li ti bizin faire face ar l’opposition concernant la bonne nouvelle? (Actes 9:22-25, 29, 30; Mat. 10:16)

  • Lire Actes 11:19-26.

    Couma eski recit ki ena dan Actes 11:19-21, 26 montré ki l’esprit Jéhovah pé guide ek dirige travail predication?

  • Lire Actes 13:13-16, 42-52.

    Couma eski Actes 13:51, 52 montré ki bann disciple pa ti laisse l’opposition decourage zot? (Mat. 10:14; Actes 18:6; 1 Pierre 4:14)

  • Lire Actes 14:1-6, 19-28.

    Couma sa l’expression “zot ti confié bannla dan la main Jéhovah[-la]” aide nou pou pa tracassé plus ki bizin kan nou aide bann nouveau? (Actes 14:21-23; 20:32; Jean 6:44)

  • Lire Actes 16:1-5.

    Couma kan Timothée inn accepté pou circonci montré l’importance pou faire “tou kitsoz a cause la bonne nouvelle”? (Actes 16:3; 1 Cor. 9:23; 1 Thess. 2:8)

  • Lire Actes 18:1-11, 18-22.

    Ki Actes 18:9, 10 montré nou lor fason ki Jésus ti implik li personnellement pou dirige travail predication, ek ki l’assurance sa donne nou zordi? (Mat. 28:20)