Skip to content

Skip to table of contents

Zistoire 107: Étienne mort

Zistoire 107: Étienne mort

SA MISSIÉ ki pé agenou-la c’est Étienne. C’est enn fidele disciple Jésus. Mais guetté ki pé arrive li asterla! Sa bann missié-la pé envoye gros-gros roche lor li. Kifer zot detesté Étienne sa quantité-la pou faire enn mauvais kitsoz coumsa? Anou guetté.

Étienne lapidé

Bondié finn aide Étienne pou faire bann grand mirak. Sa bann missié-la pa content sa ditou, ek zot discute avek li parski li pé enseigne bann dimoune la verité. Mais Bondié donne Étienne enn grand sagesse, ek Étienne montré ki sa bann zom-la finn enseigne bann fausseté. Sa faire zot plus en colere encore. Alors, zot trappe li, ek faire bann dimoune koz menti lor li.

Grand pretre demann Étienne: ‘Eski sa bann kitsoz-la vrai?’ Étienne reponn zot kan li faire enn joli discours ki basé lor la Bible. A la fin, li dire couma longtemps bann mauvais zom ti ena la haine pou bann prophete Jéhovah. Lerla, li dire: ‘Zot pareil couma sa bann zom-la. Zot finn touye Jésus, serviteur Bondié, ek zot pa’nn obeir So bann la loi.’

Sa faire bann chef religieux bien en colere! Zot grince zot lé-dent ar la rage. Mais lerla, Étienne leve so la tête, ek dire: ‘Guetté! Mo trouve Jésus pé debouté dan coté droite Bondié dan le ciel.’ Couma zot tann sa, sa bann missié-la mette zot la main lor zot zoreille ek zot sot lor Étienne. Zot trappe li ek traine li en dehors la ville.

La zot tire zot manteau ek zot donne sa enn jeune missié ki appel Saul. Eski to trouve Saul? Lerla, deux-trois parmi sa bann missié-la envoye roche lor Étienne. Couma to trouvé Étienne agenou ek li prié Bondié: ‘Jéhovah pa puni zot pou sa mauvais kitsoz-la.’ Li koné ki bann chef religieux finn embete certain parmi zot. Apré sa Étienne mort.

Kan enn kikenn faire toi di-tort, eski to essaye faire pareil ou-soit to demann Bondié faire li di-tort? C’est pa seki Étienne ek Jésus inn faire. Zot ti bon mem envers bann dimoune ki ti mauvais ar zot. Anou essaye suive zot l’exemple.

Actes 6:8-15; 7:1-60.



Question

  • Kisannla Étienne, ek ki Bondié inn aide li faire?
  • Ki kitsoz Étienne dire ki faire bann chef religieux bien en colere?
  • Kan bann zom traine Étienne en dehors la ville, ki zot faire ar li?
  • Dapré zimage, kisannla sa jeune missié ki pé deboute a coté bann manteau-la?
  • Avant li mort, pou ki kitsoz Étienne prié Jéhovah?
  • Pareil couma Étienne, ki nou bizin faire kan enn dimoune faire nou enn mauvais kitsoz?

Bann question en plus

  • Lire Actes 6:8-15.

    Ki tactik pou embete dimoune bann chef religieux inn servi pou essaye arrete travail predication bann Témoins de Jéhovah? (Actes 6:9, 11, 13)

  • Lire Actes 7:1-60.

    Ki finn aide Étienne pou ki li kapav bien defann la bonne nouvelle devant Sanhédrin, ek ki nou kapav aprann ar so l’exemple? (Actes 7:51-53; Rom. 15:4; 2 Tim. 3:14-17; 1 Pierre 3:15)

    Ki l’attitude nou bizin cultivé envers bann ki opposé ar nou travail? (Actes 7:58-60; Mat. 5:44; Luc 23:33, 34)