Skip to content

Skip to table of contents

Zistoire 105: Zot pé attann dan Jérusalem

Zistoire 105: Zot pé attann dan Jérusalem

SA BANN dimoune ki to trouvé-la c’est bann disciple Jésus. Zot inn obeir Jésus ek zot inn reste dan Jérusalem. Ek pendant ki zot tou pé attann, enn grand tapage rempli lakaz net. Tapage-la ti coumadir enn grand di-vent bien fort. Ek lerla, difé dan forme bann la langue apparette lor la tête chaque disciple. Eski to kapav trouve difé lor sakenn so la tête? Ki sa vedir?

L’esprit saint lor bann disciple dan premier siecle

C’est enn mirak! Jésus inn retourne dan le ciel avek so Papa, ek li’nn envoye l’esprit saint Bondié lor so bann disciple. Eski to koné ki sa l’esprit-la faire zot faire? Zot tou commence koz dan different langage.

Beaucoup dimoune dan Jérusalem tann sa tapage ki coumadir enn grand di-vent fort-la, ek zot vinn guetté ki’nn arrivé. Certain parmi zot ki sorti dan enn lot nation ti vinn-la pou fête la Pentecôte. Sa bann visiteur-la gagne surprise! Zot tann bann disciple koz dan zot prop langage concernant bann kitsoz extraordinaire ki Bondié inn faire.

Bann visiteur dire: ‘Sa bann dimoune-la sorti Galilée. Alors, couma zot kapav koz bann langage ki nou, nou kozé dan pays kot nou sorti?’

Pierre debouté ek explik zot avek enn la voix bien fort. Li dire bann dimoune couma inn touye Jésus ek ki Jéhovah inn ressuscite li. Pierre dire: ‘Asterla Jésus dan le ciel dan coté droite Bondié. Ek li’nn envoye l’esprit saint ki li ti promette. C’est pou sa ki zot inn trouve ek tann sa bann mirak-la.’

Kan Pierre dire sa bann kitsoz-la, beaucoup dimoune gagne bien chagrin pou tou seki finn arrive Jésus. Zot demandé: ‘Ki nou bizin faire?’ Pierre dire zot: ‘Zot bizin change zot la vie ek prend bapteme.’ Alors, sa jour-la-mem apepré 3,000 dimoune prend bapteme ek vinn bann disciple Jésus.

Actes 2:1-47.



Question

  • Pareil couma zimage montré nou, ki pé arrive bann disciple Jésus ki pé attann dan Jérusalem?
  • Ki surprise bann dimoune ki passe Jérusalem gagné?
  • Ki kitsoz Pierre explik bann dimoune?
  • Ki sentiment bann dimoune ena apré ki zot ecoute Pierre, ek ki li dire zot faire?
  • Comié dimoune prend bapteme jour la Pentecôte 33 n.l.?

Bann question en plus

  • Lire Actes 2:1-47.

    Couma eski bann parole ki Pierre dire dan Actes 2:23, 36, montré ki c’est nation Juif en entier ki responsable la mort Jésus? (1 Thess. 2:14, 15)

    Couma eski Pierre inn quitte enn bon l’exemple pou faire bann dimoune raisonné a partir bann l’Ecriture? (Actes 2:16, 17, 29, 31, 36, 39; Col. 4:6)

    Jésus ti promette pou donne Pierre “bann la clé royaume ki dan le ciel,” couma eski Pierre ti servi premier “la clé[-la]”? (Actes 2:14, 22-24, 37, 38; Mat. 16:19)