Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 103: Jésus apparette

Zistoire 103: Jésus apparette

APRÉ ki Pierre ek Jean quitte tombe kot lekor Jésus ti été, Marie reste la tousel. Li commence ploré. Apré sa, li versé ek guette dan tombe, pareil couma nou trouvé dan zimage avant. Lerla, li trouve deux ange! Zot demann li: ‘Kifer to pé ploré?’

Marie reponn: ‘Zot finn prend mo Seigneur zot inn allé, ek mo pa koné kot zot inn mette li.’ Apré sa Marie tourné ek trouve enn missié. Missié-la demann li: ‘Kisannla to pé rodé?’

Marie pensé ki sa missié-la c’est jardinier, ek ki kitfois li’nn prend lekor Jésus. Alors li dire: ‘Si to’nn prend li to’nn allé, dire moi kot to’nn mette li.’ Mais avredir, sa missié-la c’est Jésus. Li finn prend enn lekor ki Marie pa reconette. Mais kan li appel li par so nom, Marie koné ki c’est Jésus. Li galopé, li al dire bann disciple: ‘Mo finn trouve le Seigneur!’

Plitar dan la journée, pendant ki deux disciple pé marché pou al dan village Emmaüs, enn missié joinde zot. Bann disciple bien triste parski finn touye Jésus. Mais pendant ki zot pé marché, sa missié-la explik zot beaucoup kitsoz dan la Bible ki donne zot courage. Finalement, kan zot arreté pou prend enn repas, bann disciple reconette ki sa missié-la c’est Jésus. Apré sa, Jésus disparette, ek sa deux disciple-la degazé retourne Jérusalem pou raconte sa bann zapotre.

Pendant ki sa pé arrivé, Jésus apparette ar Pierre aussi. Kan lezot tann sa zot bien content. Lerla sa deux disciple-la al Jérusalem ek joinde bann zapotre. Zot raconte bannla couma Jésus inn apparette ar zot aussi kan zot ti lor chemin. Ek zis couma zot pé raconte sa, eski to koné ki kitsoz extraordinaire arrivé?

Guette zimage. Jésus apparette ar zot dan la chambre, alors ki ena la clé dan la porte. Bann disciple extra content! Eski c’est pa enn jour extraordinaire? Eski to kapav compté comié fois Jésus inn apparette ar so bann disciple ziska ler? Eski to’nn arrive cinq?

Jésus apparette ar bann disciple

Thomas, enn lot zapotre, pa avek zot kan Jésus apparette. Alors bann disciple dire li: ‘Nou finn trouve le Seigneur!’ Mais Thomas dire ki li bizin trouve Jésus ar so lizié pou li kapav croire. Huit jour apré bann disciple ré-joinde encore enn fois dan enn la chambre ki fermé a clé, ek sa fois-la Thomas avek zot. Enn sel coute, Jésus apparette dan sa la chambre-la. Asterla Thomas croire.

Jean 20:11-29; Luc 24:13-43.



Question

  • Ki Marie dire ar enn missié, ki dapré li enn jardinier, mais ki faire li realisé ki c’est vrai-mem Jésus?
  • Ki arrive sa deux disciple ki pé marché pou al dan village Emmaüs-la?
  • Ki kitsoz extraordinaire arrivé kan deux disciple dire bann zapotre ki zot finn trouve Jésus?
  • Comié fois Jésus apparette ar so bann zapotre?
  • Ki Thomas dire kan li tendé ki bann disciple inn trouve le Seigneur, mais ki arrivé huit jour apré?

Bann question en plus

  • Lire Jean 20:11-29.

    Dapré seki Jésus ti dire dan Jean 20:23, eski li ti pé rod dire ki bann humain ena l’autorisation pou pardonne bann peché? Expliké. (Ps. 49:2, 7; Is. 55:7; 1 Tim. 2:5, 6; 1 Jean 2:1, 2)

  • Lire Luc 24:13-43.

    Couma eski nou kapav prepare nou leker pou ki li accepté bann verité biblik? (Luc 24:32, 33; Ezra 7:10; Mat. 5:3; Actes 16:14; Héb. 5:11-14)