Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 98: Lor mont des Oliviers

Zistoire 98: Lor mont des Oliviers

SA MISSIÉ ki lor mont des Oliviers-la c’est Jésus. Sa quatre missié avek li-la c’est so bann zapotre. Ena André ek so frere Pierre, ek aussi Jacques ek so frere Jean. Sa c’est temple Bondié dan Jérusalem ki to kapav trouvé par derriere.

Deux jour fini passé depuis ki Jésus inn rente dan Jérusalem lor enn jeune bourrik. Zordi c’est mardi, pli boner dan la journée Jésus ti dan temple. La-bas bann pretre inn essaye trappe Jésus pou touye li. Mais zot ti peur pou faire sa parski le peuple content Jésus.

Jésus ek so bann zapotre

Jésus ti appel bann chef religieux: ‘Bann l’espece serpent ek piti serpent!’ Apré sa Jésus ti dire ki Bondié pou puni zot pou tou bann mauvais kitsoz ki zot inn faire. Apré sa Jésus ti al lor mont des Oliviers, ek lerla sa quatre zapotre-la ti commence pose li bann question. Eski to koné ki zot pé demann Jésus?

Bann zapotre pé pose question concernant l’avenir. Zot koné ki Jésus pou tire tou bann mauvais kitsoz ki ena lor la terre. Mais zot envie koné kan sa pou arrivé. Kan eski Jésus pou ré-vini encore pou regné couma le Roi?

Jésus koné ki so bann disciple lor la terre pa pou kapav trouve li kan li pou retourné. Sa c’est parski li pou dan le ciel ek zot pa pou kapav trouve li la-bas. Alors, Jésus dire so bann zapotre certain kitsoz ki pou arrivé lor la terre kan li pou regné en tant ki le Roi dan le ciel. Ki sa bann kitsoz-la sa?

Jésus dire ki pou ena bann grand la guerre, maladie ek la famine, pou ena beaucoup crime, ek pou ena bann grand tremblement de terre. Jésus dire aussi ki la bonne nouvelle lor royaume Bondié pou preché partout lor la terre. Eski nou trouve sa bann kitsoz-la pé arrivé dan nou lepok? Oui! Alors nou kapav sur ki asterla Jésus pé regné dan le ciel. Bientot li pou tire tou mauvais kitsoz ki ena lor la terre.

Matthieu 21:46; 23:1-39; 24:1-14; Marc 13:3-10.



Question

  • Montré kisannla Jésus lor zimage. Kisannla avek li?
  • Ki bann pretre essaye faire avek Jésus dan temple, ek ki li dire zot?
  • Ki kitsoz bann zapotre demann Jésus?
  • Kifer Jésus dire so bann zapotre certain parmi bann kitsoz ki pou arrivé lor la terre kan li pou regné dan le ciel?
  • Ki Jésus dire pou arrivé avant ki li tire tou mechanceté lor la terre?

Bann question en plus

  • Lire Matthieu 23:1-39.

    Mem si bann l’Ecriture pa condamne servi bann titre ki enn dimoune ena en accord avek travail ki li faire, couma seki Jésus ti dire dan Matthieu 23:8-11 montré nou concernant servi bann titre pou flatte lezot dan congregation? (Actes 26:25; Rom. 13:7; 1 Pierre 2:13, 14)

    Ki bann Pharisien ti servi pou essaye empeche bann dimoune vinn chretien, ek couma dan nou lepok bann chef religieux servi mem tactik? (Mat. 23:13; Luc 11:52; Jean 9:22; 12:42; 1 Thess. 2:16)

  • Lire Matthieu 24:1-14.

    Couma eski Matthieu 24:13 mette l’accent lor l’importance pou enduré?

    Ki signification mot “la fin” dan Matthieu 24:13? (Mat. 16:27; Rom. 14:10-12; 2 Cor. 5:10)

  • Lire Marc 13:3-10.

    Ki l’expression dan Marc 13:10 montré ki preche la bonne nouvelle li enn priorité, ek couma bann parole ki Jésus inn dire bizin ena enn l’effet lor nou? (Rom. 13:11, 12; 1 Cor. 7:29-31; 2 Tim. 4:2)