Skip to content

Skip to table of contents

Zistoire 94: Li content bann ti zenfant

Zistoire 94: Li content bann ti zenfant

GUETTE Jésus couma pé maye sa ti garson-la. To kapav trouvé couma li vrai-mem prend compte bann tipti. Sa bann missié ki pé guetté-la, c’est bann zapotre. Ki Jésus pé dire zot? Anou guetté.

Jésus ek so bann zapotre fek fini faire enn longue voyage. Pendant sa voyage-la, bann zapotre ti pé discuté entre zot-mem. Alors apré sa voyage-la Jésus demann zot: ‘Lor ki kitsoz zot ti pé discuté lor chemin?’ Avredir, Jésus koné lor ki kitsoz zot ti pé discuté. Mais li pose sa question-la pou guetté si bann zapotre pou dire li.

Jésus ek enn zenfant

Bann zapotre pa reponn, parski lor chemin zot ti pé discuté pou koné kisannla pli grand parmi zot. Certain zapotre envie parette pli important ki lezot. Couma Jésus pou faire zot comprend ki li pa bon rod grandeur?

Li appel sa ti garson-la, ek faire li deboute devant zot tou. Lerla, li dire so bann disciple: ‘Mo envie ki zot comprend sa bien: tant ki zot pa changé ek vinn couma enn ti zenfant, jamais zot pou rente dan royaume Bondié. Sa dimoune ki vinn couma sa zenfant-la, c’est li-mem ki pli grand dan royaume Bondié.’ To koné kifer Jésus dire sa?

C’est parski bann ti zenfant pa casse la tête pou koné kisannla pli grand ou-soit pli important parmi zot. Alors, c’est dan sa fason-la ki bann zapotre bizin aprann vinn couma sa bann zenfant-la ek pa la guerre pou koné kisannla pli grand ou-soit pli important.

Ena bann lezot l’occasion encore kot Jésus montré ki quantité li prend compte bann ti zenfant. Deux-trois mois apré certain dimoune amenn zot zenfant pou vinn guette Jésus. Bann zapotre essaye empeche zot. Mais Jésus dire so bann zapotre: ‘Laisse bann ti zenfant vinn vers moi, ek pa empeche zot, parski Royaume Bondié pou bann dimoune couma zot.’ Lerla, Jésus prend bann zenfant dan so lé-bras, ek beni zot. Eski nou pa content pou koné ki Jésus content bann ti zenfant?

Matthieu 18:1-4; 19:13-15; Marc 9:33-37; 10:13-16.



Question

  • Kan bann zapotre pé retourné apré enn longue voyage, lor ki kitsoz zot pé discuté?
  • Kifer Jésus appel enn ti zenfant ek faire li deboute au millieu bann zapotre?
  • Dan ki fason bann zapotre bizin aprann pou vinn couma bann zenfant?
  • Deux-trois mois apré, couma Jésus montré ki li content bann zenfant?

Bann question en plus

  • Lire Matthieu 18:1-4.

    Kifer Jésus ti servi bann l’exemple pou enseigné? (Mat. 13:34, 36; Marc 4:33, 34)

  • Lire Matthieu 19:13-15.

    Ki bann qualité ki bann zenfant ena nou bizin imité si nou envie gagne bann benediction ki Royaume Bondié donné? (Ps. 25:9; 138:6; 1 Cor. 14:20)

  • Lire Marc 9:33-37.

    Ki Jésus inn enseigne so bann disciple concernant l’envie pou vinn enn grand dimoune? (Marc 9:35; Mat. 20:25, 26; Gal. 6:3; Phil. 2:5-8)

  • Lire Marc 10:13-16.

    Ki quantité Jésus ti abordable, ek ki bann ancien kapav aprann ar so l’exemple? (Marc 6:30-34; Phil. 2:1-4; 1 Tim. 4:12)