Skip to content

Skip to table of contents

Zistoire 97: Jésus vini en tant ki le roi

Zistoire 97: Jésus vini en tant ki le roi

ENN tigit le temps apré ki Jésus inn gueri sa deux mendiant aveugle-la, li vinn dan enn ti village pré ar Jérusalem. Li dire deux parmi so bann disciple: ‘Al dan village ek zot pou trouve enn jeune bourrik. Largue li ek amenn li pou moi.’

Kan zot amenn sa bourrik-la, Jésus assize lor la ek li al Jérusalem, ki pa ti trop loin. Kan li arrive pré ar la ville, enn grand la foule sorti pou joinde li. La plupart parmi zot tire zot manteau ek tal sa lor chemin. Lezot coupe bann branche palmier. Zot mette sa aussi lor chemin, lerla zot criyé: ‘Bondié beni sa le roi ki’nn vinn au nom Jéhovah-la!’

Bann dimoune pé accueil Jésus

Bien longtemps dan Israël bann nouveau le roi ti rente dan Jérusalem lor enn jeune bourrik pou presente zot-mem devant le peuple. C’est seki Jésus faire. Ek le peuple pé montré ki zot envie ki Jésus vinn zot le roi. Mais pa tou dimoune ki envie sa. Nou kapav trouve sa par seki arrivé kan Jésus al dan temple.

Dan temple, Jésus gueri bann dimoune ki aveugle ek ki handicapé. Kan bann ti zenfant trouve sa, zot criyé fort-fort pou donne Jésus l’honneur. Mais sa faire bann pretre bien en colere, ek zot dire Jésus: ‘Eski to tendé ki bann zenfant pé dire?’

Jésus reponn: ‘Oui. Eski jamais zot inn lire sa dan la Bible: “Dan la bouche bann ti zenfant, Bondié pou faire bann louange sorti?” ’ Alors, bann zenfant contigne loué le roi ki Bondié inn choisir.

Nou envie ressemblé sa bann zenfant-la, pa vrai? Certain dimoune kitfois pou essaye empeche nou koz lor royaume Bondié. Mais nou pou contigne dire lezot bann kitsoz extraordinaire ki Jésus pou faire pou bann dimoune.

Kan Jésus ti lor la terre pa ti encore arrive ler pou li commence dirigé couma le roi. Kan sa pou arrivé? Bann disciple Jésus envie koné. Nou pou lire lor la dan prochain zistoire.

Matthieu 21:1-17; Jean 12:12-16.



Question

  • Kan Jésus arrive dan enn ti village pré ar Jérusalem, ki li dire so bann disciple faire?
  • Dapré zimage, ki arrivé kan Jésus arrive pré ar la ville Jérusalem?
  • Ki bann zenfant faire kan zot trouve Jésus pé gueri bann dimoune ki aveugle ek handicapé?
  • Ki Jésus dire bann pretre ki en colere?
  • Couma nou kapav pareil couma bann zenfant ki ti loué Jésus?
  • Ki kitsoz bann disciple envie koné?

Bann question en plus

  • Lire Matthieu 21:1-17.

    Couma kan Jésus ti rente dan Jérusalem en tant ki le Roi li ti different ar bann general romain ki ti retourné apré ki zot inn gagne la victoire? (Mat. 21:4, 5; Zek. 9:9; Phil. 2:5-8; Col. 2:15)

    Ki leson bann jeune kapav aprann ar bann garson israélite ki ti cite Psaume 118 kan Jésus ti rente dan temple? (Mat. 21:9, 15; Ps. 118:25, 26; 2 Tim. 3:15; 2 Pierre 3:18)

  • Lire Jean 12:12-16.

    Bann dimoune ti servi bann branche palmier kan zot ti loué Jésus, ki so signification? (Jean 12:13; Phil. 2:10; Rév. 7:9, 10)