Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 93: Jésus nourri enn la foule

Zistoire 93: Jésus nourri enn la foule

ENN kitsoz terrible finn arrivé. Fek touye Jean Baptiste. Hérodiade, madame le roi, pa ti content li. Ek li’nn reussi convaink le roi pou faire coupe la tête Jean.

Kan Jésus tann sa, li bien triste. Li al dan enn place kot pena personne. Mais bann dimoune suive li. Kan Jésus trouve bann la foule, li ena pitié pou zot. Alors, li koz lor Royaume Bondié ar zot ek li gueri bann malade.

Sa soir-la so bann disciple vinn dire li: ‘Inn arrive tard ek c’est enn l’endroit kot pena nanyin mem. Faire bann dimoune-la allé pou ki zot kapav acheté kitsoz pou zot mangé dan bann village ki pré.’

Jésus nourri enn la foule

Jésus reponn: ‘Pa necessaire zot allé. Donne zot kitsoz pou mangé zot-mem.’ Jésus demann Philippe: ‘Kot-sa nou kapav acheté assez mangé pou nourri tou sa dimoune-la?’

Philippe reponn: ‘Pou bizin beaucoup-beaucoup kass, zis pou donne sakenn enn ti bouché mangé.’ André dire: ‘Sa garson ki pé sarié nou mangé-la, ena cinq di-pain ek deux poisson. Mais li pa pou assez pou tou sa dimoune-la.’

Jésus dire: ‘Faire tou dimoune assize lor l’herbe.’ Lerla, li remercié Bondié pou sa mangé-la ek li commence casse bann di-pain-la boute-boute. Apré sa, bann disciple donne tou bann dimoune di-pain ek poisson. Ena 5,000 zom ek plusieurs millier madame ek zenfant. Zot tou mangé ziska ki zot ventre bien plein. Ek kan bann disciple ramasse seki finn resté, ena 12 panier rempli!

Asterla Jésus faire so bann disciple monte dan enn bateau pou traverse la mer Galilée. Pendant la nuit, enn gros cyclone levé ek bann vague sakouye-sakouye bateau-la. Bann disciple extra peur. Lerla, au millieu la nuit, zot trouve enn kikenn pé marche lor de l’eau pé vinn vers zot, zot pa koné kisannla sa. La peur dan zot, zot criyé.

Jésus dire: ‘Pa bizin gagne peur. Moi sa!’ La aussi zot pa croire. Alors Pierre dire: ‘Si vrai-mem toi sa, Seigneur, dire moi marche lor de l’eau pou vinn joinde toi.’ Jésus reponn: ‘Vini!’ Lerla Pierre sorti dan bateau ek li commence marche lor de l’eau! Mais enn coute, la peur trappe li ek li commence coulé, mais Jésus sap li.

Plitar, encore enn fois Jésus nourri plusieurs millier dimoune. Sa fois-la li faire sa avek sept di-pain ek deux-trois ti poisson. Ek encore enn fois, ena assez mangé pou tou dimoune. Eski sa pa extraordinaire fason ki Jésus prend compte bann dimoune? Kan li pou regné couma le Roi ki Bondié inn choisir, jamais nou pou bizin tracassé pou okenn kitsoz!

Matthieu 14:1-32; 15:29-38; Jean 6:1-21.



Question

  • Ki kitsoz horrible finn arrive Jean Baptiste, ek ki l’effet sa finn ena lor Jésus?
  • Couma eski Jésus nourri bann la foule ki’nn suive li, ek comié mangé inn resté?
  • Kifer bann disciple gagne peur pendant la nuit, ek ki arrive Pierre?
  • Couma eski Jésus nourri bann dimoune par millier enn deuxieme fois?
  • Kifer sa pou extraordinaire kan Jésus pou dirige la terre en tant ki le roi ki Bondié inn choisir?

Bann question en plus

  • Lire Matthieu 14:1-32.

    Ki renseignement Matthieu 14:23-32 donne nou lor personnalité Pierre?

    Couma eski bann l’Ecriture montré ki Pierre inn vinn pli mur ek li’nn reussi surmonte so l’attitude pou agir lor enn coute tête? (Mat. 14:27-30; Jean 18:10; 21:7; Actes 2:14, 37-40; 1 Pierre 5:6, 10)

  • Lire Matthieu 15:29-38.

    Couma Jésus inn montré respé pou bann mangé ki so Papa inn donne li? (Mat. 15:37; Jean 6:12; Col. 3:15)

  • Lire Jean 6:1-21.

    Zordi, couma bann chretien kapav imite l’exemple Jésus concernant montré respé envers gouvernement? (Jean 6:15; Mat. 22:21; Rom. 12:2; 13:1-4)