Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 89: Jésus purifié temple

Zistoire 89: Jésus purifié temple

JÉSUS parette bien en colere, pa vrai? Eski to koné kifer? C’est parski sa bann missié ki dan temple Bondié dan Jérusalem-la zot gourmand kass. Zot pé rod gagne enn tas kass lor lé-dos bann dimoune ki vinn ici pou adore Bondié.

Jésus renverse bann la table ki ena kass

Eski to trouve tou sa bann jeune taureau, mouton ek colombe-la? Sa bann missié-la pé vann sa bann zanimo-la dan temple mem. Eski to koné kifer? C’est parski bann Israélite bizin bann zanimo ek bann zoiseau pou offert Bondié couma bann sacrifice.

Dapré la loi Bondié, kan enn Israélite ti faire enn peché, li ti bizin offert Bondié enn sacrifice. Ek ti ena aussi bann lezot l’occasion kot bann Israélite ti offert bann sacrifice. Mais ki coté enn Israélite ti pou gagne bann zoiseau ek bann zanimo pou offert Bondié?

Certain Israélite ti ena bann zoiseau ek bann zanimo. Alors, zot ti kapav offert sa. Mais beaucoup pa ti ena okenn zanimo ni zoiseau. Ek certain ti reste bien loin ar Jérusalem zot pa ti kapav amenn enn parmi zot bann zanimo dan temple. Alors bann dimoune vinn ici ek acheté bann zanimo ou-soit bann zoiseau ki zot bizin. Mais sa bann missié-la demann bann dimoune trop beaucoup kass. Zot pé kokin bann dimoune. En plus, zot pa supposé vann kitsoz dan temple Bondié.

Sa faire Jésus en colere. Alors, li devire la table sa bann missié-la avek zot kass ek fann zot bann piece la monnaie. Li faire aussi enn fouette ar bann la corde ek faire bann zanimo sorti dan temple. Li donne sa l’ordre-la bann missié ki vann colombe: ‘Mette sa bann zoiseau-la dehors! Arrete faire lakaz mo Papa vinn enn place kot faire commerce.’

Certain parmi bann disciple Jésus avek li dan temple dan Jérusalem. Zot etonné kan zot trouve seki Jésus pé faire. Lerla, zot rappel enn passage dan la Bible ki dire sa concernant Garson Bondié: ‘L’amour pou lakaz Bondié pou couma enn difé ki pé brulé endan li.’

Pendant ki Jésus dan Jérusalem pou assisté Pâque, li faire beaucoup mirak. Apré sa, Jésus quitte Judée ek retourne Galilée. Mais lor chemin retour, li passe par district Samarie. Anou guetté ki arrivé la-bas.

Jean 2:13-25; 4:3, 4.



Question

  • Kifer pé vann bann zanimo dan temple?
  • Ki kitsoz faire Jésus en colere?
  • Dapré sa zimage-la, ki Jésus faire, ek ki l’ordre li donne bann missié ki pé vann bann colombe?
  • Kan bann disciple trouve Jésus faire sa, ki sa faire zot rappel?
  • Ki district Jésus traversé kan li pé retourne Galilée?

Question en plus

  • Lire Jean 2:13-25.

    Kan nou guette fason ki Jésus ti traite bann ki ti pé change kass dan temple, ki bon fason pensée nou bizin adopté concernant faire business dan la Salle du Royaume? (Jean 2:15, 16; 1 Cor. 10:24, 31-33)