Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 87: Jésus dan temple

Zistoire 87: Jésus dan temple

GUETTE sa jeune garson ki pé koz ar sa bann missié ki agé-la. Sa bann missié-la enseigné dan temple Bondié dan Jérusalem. Ek sa garson-la c’est Jésus. Li’nn grandi inpé, asterla li ena 12 an.

Bann enseignant-la gagne sok kan zot tann sa quantité kitsoz ki Jésus koné lor Bondié ek lor bann kitsoz ki’nn ecrire dan la Bible. Mais kifer Joseph ek Marie pa la zot aussi? Kot zot été? Anou guetté.

Jésus pé koz avek bann enseignant

Toulé l’année Joseph amenn so famille Jérusalem pou enn fête special ki appel la Pâque. Zot bizin faire enn longue voyage depuis Nazareth ziska Jérusalem. Sa lepok-la personne pena l’auto, ek pena train. La plupart dimoune marché, ek sa prend zot apepré trois jour pou arrive Jérusalem.

Asterla Joseph ena enn grand famille. Alors ena pou occupe bann ti frere ek bann ti soeur Jésus. Sa l’année-la Joseph ek Marie pé retourne Nazareth ensam avek zot zenfant. Zot pensé ki Jésus avek lezot ki pé voyagé ensam avek zot. Mais kan zot arreté la fin la journée, zot pa trouve Jésus. Zot rod li parmi bann famille ek bann camarade mais li pa avek zot! Alors zot retourne Jérusalem pou rod li.

A la fin zot trouve Jésus avek bann enseignant. Li pé ecoute zot ek pé pose zot bann question. Ek tou dimoune etonné par sagesse Jésus. Mais Marie dire: ‘Mo garson kifer to’nn faire sa ar nou? To papa ek moi inn gagne beaucoup tracas pou rod toi.’

Jésus reponn: ‘Kifer zot ti bizin rod moi? Eski zot pa koné ki mo bizin dan lakaz mo Papa?’

Jésus content reste la kot li kapav aprann lor Bondié. Eski nou pa bizin ena mem sentiment ki li nou aussi? Kan li retourne Nazareth, Jésus al reunion toulé-semaine pou adore Bondié. Parski touletan li ecouté, li aprann beaucoup kitsoz dan la Bible. Alors, anou faire pareil couma Jésus ek suive so l’exemple.

Luc 2:41-52; Matthieu 13:53-56.



Question

  • Ki l’age Jésus ena dan sa zimage-la, ek kot-sa li été?
  • Ki Joseph ek so famille faire toulé l’année?
  • Apré enn journée voyage pou retourne kot zot, kifer Joseph ek Marie retourne Jérusalem?
  • Kot-sa Joseph ek Marie trouve Jésus, ek kifer bann dimoune ki la etonné?
  • Ki Jésus dire so mama, Marie?
  • Couma nou kapav imite Jésus kan nou ena pou aprann lor Bondié?

Bann question en plus

  • Lire Luc 2:41-52.

    Mem si dapré la Loi c’est zis bann missié ki ti bizin assisté bann fête ki ti ena toulé l’année, ki bon l’exemple Joseph ek Marie inn quitté pou bann parent zordi? (Luc 2:41; Deut. 16:16; 31:12; Prov. 22:6)

    Couma eski Jésus inn quitte enn bon l’exemple pou bann jeune zordi kan zot ena pou soumette ar zot bann parent? (Luc 2:51; Deut. 5:16; Prov. 23:22; Col. 3:20)

  • Lire Matthieu 13:53-56.

    Dan la Bible ena nom quatre frere Jésus, couma zot appelé? Cite nom sa deux ki plitar ti servi dan congregation-la. (Mat. 13:55; Actes 12:17; 15:6, 13; 21:18; Gal. 1:19; Jacq. 1:1; Jude 1)