Skip to content

Skip to table of contents

Zistoire 85: Naissance Jésus

Zistoire 85: Naissance Jésus

ESKI to koné kisannla sa tibaba-la? C’est Jésus. Li’nn fek né dan enn place kot garde bann zanimo. Marie pé mette Jésus dan enn mangeoire, enn place kot mette mangé pou bann bourrik ek bann lezot zanimo. Mais kifer Marie ek Joseph ici avek bann zanimo? C’est pa enn place pou enn tibaba né, pa vrai?

Bien sur. Mais ala kifer zot la: César Auguste, l’empereur Rome, ti passe enn la loi pou faire tou dimoune al enregistré zot nom dan la ville kot zot ti né. Joseph ti né ici dan Bethléhem. Mais kan li ek Marie ti arrivé, pa ti ena okenn place pou zot resté. Alors zot inn bizin reste la avek sa bann zanimo-la. Ek sa jour-la-mem Marie inn donne Jésus naissance! Mais couma to trouvé, Jésus bien.

Joseph, Marie, ek Jésus ki enn tibaba

Eski to trouve sa bann berger ki pé vinn guette Jésus-la? Zot ti pé veille bann mouton dan karo a-soir, ek lerla enn la lumiere bien fort inn eclairé autour zot. C’est enn ange! Bann berger ti bien gagne peur. Mais ange-la ti dire: ‘Pa bizin gagne peur! Mo ena enn bon nouvelle pou zot. Zordi, dan Bethléhem, Christ, nou Seigneur inn né. Li pou sauve le peuple! Zot pou trouve li enveloppé dan bann linge ek pé dormi dan enn mangeoire.’ Enn sel coute enn quantité ange inn vini ek zot inn commence donne Bondié la gloire. Alors, desuite sa bann berger-la degazé al rod Jésus, ek asterla zot finn trouve li.

Eski to koné kifer Jésus enn kikenn important coumsa? Eski to koné kisannla li été vrai-mem? Rappel, dan premier zistoire sa livre-la nou ti koz lor Bondié so premier Garson. Sa Garson-la finn travail avek Jéhovah pou faire le ciel, la terre ek tou bann lezot kitsoz. C’est li-mem Jésus!

Jéhovah inn prend la vie so Garson depuis le ciel ek inn mette li dan ventre Marie. Desuite enn tibaba inn commence grandi dan so ventre pareil couma bann lezot tibaba grandi dan ventre zot mama. Mais sa tibaba-la ti Garson Bondié. Finalement, Jésus inn né ici dan enn place kot garde bann zanimo dan Bethléhem. Eski to comprend asterla kifer bann ange ti bien content pou annonce le peuple ki Jésus inn né?

Luc 2:1-20.



Question

  • Kisannla sa tibaba lor sa zimage-la, ek kot-sa Marie pé mette li?
  • Kifer Jésus ti né dan enn dan place kot garde bann zanimo?
  • Dapré zimage, kisannla sa bann zom ki pé rentré-la, ek ki enn ange inn dire zot?
  • Kifer Jésus special?
  • Kifer kapav appel Jésus, Garson Bondié?

Bann question en plus

  • Lire Luc 2:1-20.

    Ki role César Auguste finn ena dan realisation prophetie concernant naissance Jésus? (Luc 2:1-4; Mika 5:2)

    Couma eski enn kikenn kapav compte parmi “bann dimoune ki [Bondié] content”? (Luc 2:14; Mat. 16:24; Jean 17:3; Actes 3:19; Héb. 11:6)

    Bann berger dan Judée ki humble ti ena raison pou ki zot joyeux kan enn sauveur inn né. Ki pli grand raison bann serviteur Bondié ena zordi pou ki zot joyeux? (Luc 2:10, 11; Éph. 3:8, 9; Rév. 11:15; 14:6)