Skip to content

Skip to table of contents

Zistoire 100: Jésus dan jardin

Zistoire 100: Jésus dan jardin

APRÉ ki zot quitte sa la chambre la-haut-la, Jésus ek so bann zapotre al dan jardin Gethsémané. Zot finn vinn la plusieurs fois avant. Asterla Jésus dire zot contigne veillé ek prié. Apré, li al inpé pli loin ek li baisse so la tête pou prié.

Plitar Jésus ré-vinn kot so bann zapotre été. Dapré toi, ki zot pé faire? Zot pé dormi! Trois fois Jésus dire zot ki zot bizin contigne veillé, mais chaque fois ki li retourné li trouve zot pé dormi. Dernier fois ki li retourné, Jésus dire zot: ‘Couma zot kapav dormi dan enn ler pareil? Ler finn arrivé pou mo tombe dan la main mo bann l’ennemi.’

Zis dan sa moment-la tann tapage enn grand la foule. Guetté! Bann zom pé vini ar l’epée ek baton! Ek zot pé sarié bann flambeau difé pou donne zot la lumiere. Kan zot vinn pli pré, enn parmi zot sorti dan la foule ek vinn direct ar Jésus. Li embrasse li pareil couma to kapav trouvé lor zimage. Sa missié-la c’est Judas Iscariote! Kifer li embrasse Jésus?

Judas pé trahir Jésus

Jésus demandé: ‘Judas to embrasse moi pou trahir moi?’ Kan Judas ti embrasse Jésus sa ti enn signe. Sa ti permette bann zom ki avek Judas pou koné ki c’est li Jésus, sa zom ki zot ti pé rodé-la. Alors bann l’ennemi Jésus avancé ek trappe li. Mais Pierre pa pou laisse bannla prend Jésus sans ki li laguerre. Li tire l’epée ki li ti amené ek donne enn coup sa missié ki a coté li-la. Li rate la tête missié-la ek saute so zoreille droite. Mais Jésus touche zoreille sa missié-la ek li gueri li.

Jésus dire Pierre: ‘Remette to l’epée dan so place. Eski to pa pensé ki mo kapav demann mo Papa envoye plusieurs millier ange pou sap moi?’ Pena doute ki Jésus kapav faire sa! Mais Jésus pa demann Bondié pou envoye okenn ange, parski li koné ki’nn arrive ler pou ki so bann l’ennemi prend li. Alors li laisse zot amenn li. Anou guetté ki arrive Jésus asterla.

Matthieu 26:36-56; Luc 22:39-53; Jean 18:1-12.



Question

  • Kot-sa Jésus ek so bann zapotre allé apré ki zot quitte sa la chambre la-haut-la, ek ki li dire zot faire?
  • Ki Jésus trouvé kan li retourne dan place kot bann zapotre ti été, ek comié fois sa inn arrivé?
  • Kisannla rente dan jardin, ek pareil couma zimage montré nou, ki Judas Iscariote faire?
  • Kifer Judas embrasse Jésus, ek ki Pierre faire?
  • Ki Jésus dire Pierre, mais kifer Jésus pa demann Bondié envoye n’importe ki ange?

Bann question en plus

  • Lire Matthieu 26:36-56.

    Couma fason ki Jésus ti conseil so bann disciple enn bon l’exemple pou bann ancien dan nou lepok? (Mat. 20:25-28; 26:40, 41; Gal. 5:17; Éph. 4:29, 31, 32)

    Couma eski Jésus considere servi bann zarme kont lezot dimoune? (Mat. 26:52; Luc 6:27, 28; Jean 18:36)

  • Lire Luc 22:39-53.

    Kan enn ange ti apparette ar Jésus dan jardin Gethsémané pou fortifié li, eski sa ti montré ki Jésus so la foi ti affaibli? Expliké. (Luc 22:41-43; Is. 49:8; Mat. 4:10, 11; Héb. 5:7)

  • Lire Jean 18:1-12.

    Couma eski Jésus ti protege so bann disciple kont so bann adversaire, ek ki nou kapav aprann ar so l’exemple? (Jean 10:11, 12; 18:1, 6-9; Héb. 13:6; Jacq. 2:25)