Skip to content

Skip to table of contents

Zistoire 79: Daniel dan la fosse lion

Zistoire 79: Daniel dan la fosse lion

AYO! Guetté coumadir Daniel dan probleme. Mais bann lion pa pé faire li okenn di-tort! To koné kifer? Kisannla ki finn mette Daniel avek sa bann lion-la? Anou guetté.

Asterla le roi Babylone appel Darius. Li bien content Daniel parski li gentil ek li sage. Darius choisir Daniel couma chef dirigeant dan so royaume. Sa faire bann lezot zom dan royaume jaloux Daniel, anou guetté seki zot faire.

Darius

Zot al guette Darius ek dire: ‘Ah nou le roi, nou finn tombe d’accord pou ki to passe enn la loi ki dire ki pendant 30 jour fodé pa ki enn kikenn prié n’importe ki bondié ou-soit zom a part toi, O nou le roi. Si kikenn desobeir, alors, bizin jette li ar bann lion.’ Darius pa koné kifer sa bann zom-la inn faire passe sa la loi-la. Mais li pensé ki c’est enn bon l’idée, alors li faire ecrire sa la loi-la. Asterla pa kapav change sa la loi-la.

Kan Daniel tann sa la loi-la, li al kot li ek li prié, pareil couma li habitué faire. Bann mauvais zom-la ti koné ki Daniel pa pou arrete prié Jéhovah. Zot bien content, parski zot plan pou touye Daniel inn marché.

Kan le roi Darius tendé kifer sa bann zom-la inn faire passe sa la loi-la, li bien triste. Mais asterla li pa kapav change la loi-la, alors li donne l’ordre pou ki envoye Daniel dan la fosse lion. Mais le roi dire Daniel: ‘Mo esperé ki to Bondié, ki to servi, pou sauve toi.’

Darius tellement tracassé ki li pa kapav dormi a-soir. Lendemain gramatin li galopé, li al kot la fosse lion. To kapav trouve li lor zimage. Li criyé: ‘Daniel, serviteur Bondié ki vivant! Eski sa Bondié ki to servi-la inn reussi sap toi ar bann lion?’

Daniel dan la fosse lion

Daniel reponn: ‘Bondié finn envoye enn ange, ek li’nn ferme la gueule bann lion pou ki zot pa faire moi okenn di-tort.’

Le roi bien content. Li donne l’ordre pou ki tire Daniel dan la fosse. Lerla, li faire jette sa bann mauvais zom ki ti envie touye Daniel-la dan la fosse bann lion. Avant mem ki zot arrive dan fond la fosse, bann lion trappe zot ek casse-casse tou zot bann lezo.

Le roi Darius ecrire tou le peuple ki dan so royaume: ‘Mo donne l’ordre tou dimoune ki zot respecté Bondié ki Daniel servi. Li faire bann grand mirak. Li finn sauve Daniel dan la gueule bann lion.’

Daniel 6:1-28.



Question

  • Kisannla Darius, ek couma li considere Daniel?
  • Certain zom ti jaloux Daniel, ki kitsoz zot incite Darius pou faire?
  • Ki Daniel faire kan li aprann concernant sa nouveau la loi-la?
  • Kifer Darius tellement tracassé ki li pa kapav dormi, ek ki li faire lendemain gramatin?
  • Couma Daniel reponn Darius?
  • Ki arrive sa bann mauvais zom ki rod touye Daniel-la, ek ki Darius ecrire tou le peuple dan so royaume?

Bann question en plus

  • Lire Daniel 6:1-28.

    Couma complot ki’nn faire kont Daniel rappel nou seki bann persecuteur inn rod faire pou empeche travail ki bann Témoins de Jéhovah pé faire dan nou lepok? (Dan. 6:7; Ps. 94:20; Is. 10:1; Rom. 8:31)

    Couma bann serviteur Bondié zordi kapav imite l’exemple Daniel kan zot soumette ar “bann l’autorité superieur”? (Dan. 6:5, 10; Rom. 13:1; Actes 5:29)

    Couma nou kapav imite l’exemple Daniel kan nou servi Jéhovah “dan enn fason regulier”? (Dan. 6:16, 20; Phil. 3:16; Rév. 7:15)