Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 80: Peuple Bondié quitte Babylone

Zistoire 80: Peuple Bondié quitte Babylone

PRESKÉ deux an finn passé depuis ki bann Mède ek bann Perse finn prend la ville Babylone. Ek guetté ki pé arrivé asterla! Bann Israélite pé quitte Babylone. Couma zot finn gagne zot liberté? Kisannla finn laisse zot allé?

C’est Cyrus le roi Perse. Bien avant ki Cyrus né, Jéhovah ti faire So prophete Isaïe ecrire lor li: ‘To pou faire zis seki mo envie to faire. Pou quitte bann la porte la ville ouvert pou ki to kapav prend li.’ C’est Cyrus ki finn dirige l’armée pou prend Babylone. Bann dimoune ti quitte la porte la ville grand ouvert sa soir ki bann Mède ek bann Perse ti prend la ville-la.

Mais prophete Jéhovah, Isaïe, ti aussi dire ki Cyrus ti pou donne l’ordre ki ré-construire Jérusalem ek so temple. Eski Cyrus ti donne sa commandement-la? Oui. Ala seki Cyrus dire bann Israélite: ‘Asterla allé, al Jérusalem ek construire temple Jéhovah, zot Bondié.’ Ek c’est sa-mem ki bann Israélite pé faire, zot pé allé.

Bann Israélite pé quitte Babylone

Mais pa tou bann Israélite dan Babylone ki kapav faire sa longue voyage-la pou retourne Jérusalem. C’est enn voyage bien longue, ki environ 800 kilometre, ek beaucoup trop vié ou-soit trop malade pou faire sa longue voyage-la. Ek ena encore lezot raison kifer certain parmi le peuple pa kapav allé. Mais Cyrus dire bann ki pa pé allé: ‘Donne bann dimoune ki pé retourne construire Jérusalem ek so temple, l’argent, l’or ek bann lezot cadeau.’

Alors, bannla donne beaucoup cadeau bann Israélite ki lor chemin retour pou Jérusalem. Cyrus donne zot aussi bann bol ek bann coupe ki le roi Neboukadnetsar finn prend dan temple Jéhovah kan li ti detruire Jérusalem. Le peuple ti ena enn quantité kitsoz pou sarié avek zot.

Apré environ quatre mois voyage, bann Israélite retourne dan Jérusalem a temps. Sa faire exactement 70 an depuis ki la ville inn detruire, ek pays ti abandonné net. Mais mem si bann Israélite inn retourne dan zot prop pays zot pou passe par bann moment bien difficile. Anou guetté ki arrivé apré sa.

Isaïe 44:28; 45:1-4; Ezra 1:1-11.



Question

  • Dapré sa zimage-la, ki bann Israélite pé faire?
  • Couma Cyrus accompli prophetie ki Jéhovah ti annoncé a travers Isaïe?
  • Ki Cyrus dire bann Israélite ki pa kapav retourne Jérusalem?
  • Ki Cyrus donne le peuple pou retourne Jérusalem?
  • Comié le temps bann Israélite prend pou retourne Jérusalem?
  • Comié l’année inn passé depuis ki personne nepli reste dan Jérusalem?

Bann question en plus

  • Lire Isaïe 44:28 ek 45:1-4.

    Sa ti enn kitsoz sur ki prophetie concernant Cyrus ti pou realisé. Couma Jéhovah ti mette l’accent lor la? (Is. 55:10, 11; Rom. 4:17)

    Isaïe ti dire enn prophetie concernant Cyrus, ki sa montré nou lor capacité ki Jéhovah ena pou predire l’avenir? (Is. 42:9; 45:21; 46:10, 11; 2 Pierre 1:20)

  • Lire Ezra 1:1-11.

    Zordi, couma nou kapav imite l’exemple bann ki pa ti kapav retourne Jérusalem kan nou ‘fortifié la main’ bann ki kapav faire service a plein temps? (Ezra 1:4, 6; Rom. 12:13; Col. 4:12)