Skip to content

Skip to table of contents

Zistore 75: Quatre garson dan Babylone

Zistore 75: Quatre garson dan Babylone

LE ROI Neboukadnetsar amenn tou bann Israélite ki finn gagne enn bon l’education, dan Babylone. Apré sa, le roi choisir parmi zot bann jeune homme ki pli joli ek pli malin. To kapav trouve quatre parmi sa bann garson-la lor zimage. Enn appel Daniel, ek sa lot trois-la, bann Babylonien appel zot Shadrak, Méshak ek Abed-Négo.

Neboukadnetsar envie ki forme sa bann jeune missié-la pou ki zot servi li dan so palais. Apré ki finn entraine zot pendant trois an, li pou choisir seki pli malin pou aide li reglé so bann probleme. Le roi envie ki bann garson-la reste fort ek ena enn bon la santé pendant ki pé forme zot. Alors, le roi donne l’ordre so bann serviteur pou donne sa bann garson-la bann bon mangé ek di-vin pareil couma li ek so famille.

Danel, Shadrak, Méshak, ek Abed-Négo pé explik zot bann croyance

Guette jeune Daniel. Eski to koné ki li pé dire Ashpenaz, chef bann serviteur Neboukadnetsar? Daniel pé dire li ki li pa’lé mange bann bon mangé ki gagné lor la table le roi. Mais Ashpenaz gagne tracas. Li dire: ‘Le roi inn fini decidé ki zot pou mangé ek boire. Ek si zot pena enn bon la santé pareil couma bann lezot jeune missié, li kapav touye moi.’

Lerla Daniel al guette gardien ki Ashpenaz ti metté pou occupe li ek so trois camarade. Li dire: ‘S’il te plait faire enn test ar nou pendant 10 jour. Donne nou inpé legume pou mangé ek de l’eau pou boire. Apré sa, compare nou ar bann lezot jeune ki pé mange bann mangé le roi, ek guetté kisannla parette pli bien.’

Garde-la d’accord. Kan 10 jour-la fini passé, Daniel ek so trois camarade parette pli bien ki bann lezot jeune. Alors, garde-la laisse zot contigne mange legume dan place bann mangé ki le roi inn donné.

Apré trois an, amenn tou bann jeune devant Neboukadnetsar. Apré ki li fini koz ar zot tou, le roi trouvé ki Daniel ek so trois camarade pli malin. Alors, li faire zot reste dan so palais pou ki zot aide li. Ek n’importe kan le roi demann Daniel, Shadrak, Méshak ek Abed-Négo bann question ou-soit pou reglé bann probleme difficile, zot konn 10 fois plus ki n’importe ki pretre ek zom sage le roi.

Daniel 1:1-21.



Question

  • Kisannla sa quatre garson ki to trouvé dan zimage-la, ek kifer zot dan Babylone?
  • Ki plan Neboukadnetsar faire pou sa quatre garson-la, ek ki l’ordre li donne so bann serviteur?
  • Ki faveur Daniel demandé pou li-mem ek so trois camarade concernant mangé ek boire?
  • Apré ki zot mange bann legume pendant dix jour, couma Daniel ek so trois camarade été comparé ar bann lezot jeune?
  • Couma Daniel ek so trois camarade vinn dan palais le roi, ek dan ki fason zot pli bon ki bann pretre ek bann zom sage?

Bann question en plus

  • Lire Daniel 1:1-21.

    Ki qualité zeffort nou bizin faire si nou envie resisté kont bann tentation ek surmonte nou bann faiblesse? (Dan. 1:8; Gen. 39:7, 10; Gal. 6:9)

    Dan ki fason bann jeune zordi kapav tenté ou-soit gagne pression pou faire bann kitsoz ki coumadir “bann mangé raffiné”? (Dan. 1:8; Prov. 20:1; 2 Cor. 6:17-7:1)

    Couma seki la Bible dire lor sa quatre jeune hébreu-la aide nou pou comprend concernant l’education ki nou gagné? (Dan. 1:20; Is. 54:13; 1 Cor. 3:18-20)