Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 74: Enn zom ki pa peur

Zistoire 74: Enn zom ki pa peur

GUETTE sa bann dimoune-la, zot pé bouffonne sa jeune missié-la. Eski to koné kisannla sa? Li appel Jérémie. Li enn prophete Jéhovah ki bien important.

Bann dimoune pé bouffonne Jérémie

Inpé apré ki le roi Yoshiya commence detruire bann zidole dan pays, Jéhovah dire Jérémie vinn So prophete. Mais, Jérémie pensé ki li trop jeune pou ki li vinn enn prophete. Mais Jéhovah dire ki Li pou aide li.

Jérémie dire bann Israélite arrete faire bann mauvais kitsoz. Li dire: ‘Bann bondié ki bann nation pé adoré zot fausse.’ Mais, beaucoup Israélite prefere adore bann zidole au lieu ki zot adore vrai Bondié, Jéhovah. Kan Jérémie dire le peuple ki Bondié pou puni zot a cause bann mauvais kitsoz ki zot ti faire, zot bouffonne li.

Bann l’année passé, Yoshiya mort ek trois mois apré, so garson Yehoïaqim vinn le roi. Jérémie contigne dire le peuple: ‘Jérusalem pou detruire si zot pa change zot bann mauvais conduite.’ Bann pretre trappe Jérémie ek criyé: ‘Bizin touye toi pou sa bann kitsoz ki to pé dire-la.’ Lerla, zot dire bann prince Israël: ‘Bizin touye Jérémie, parski li’nn koz kont nou la ville.’

Ki Jérémie pou faire asterla? Li pa peur! Li dire zot tou: ‘Jéhovah inn envoye moi pou dire zot sa bann kitsoz-la. Si zot pa change zot bann mauvais fason vive, Jéhovah pou detruire Jérusalem. Mais guette bien: si zot touye moi, zot pou touye enn zom ki pa’nn faire nanyin de mal.’

Bann prince laisse Jérémie vive, mais bann Israélite pa change zot bann mauvais maniere. Plitar, Neboukadnetsar, le roi Babylone, vinn laguerre kont Jérusalem. A la fin, Neboukadnetsar faire bann Israélite vinn so bann serviteur. Li amenn plusieurs millier Israélite dan Babylone. Mazinn enn coup seki to ti pou ressenti si bann dimoune ki to pa koné prend toi ek amenn toi dan enn lot pays!

Jérémie 1:1-8; 10:1-5; 26:1-16; 2 Rois 24:1-17.



Question

  • Kisannla sa jeune missié lor sa zimage-la?
  • Ki Jérémie pensé kan li aprann ki li pou vinn enn prophete, mais ki Jéhovah dire li?
  • Ki message Jérémie contigne dire le peuple?
  • Couma bann pretre essaye arrete Jérémie, mais couma li montré ki li pa gagne peur?
  • Ki arrivé kan bann Israélite pa change zot bann mauvais maniere?

Bann question en plus

  • Lire Jérémie 1:1-8.

    Pareil couma l’exemple Jérémie montré, ki kitsoz ki qualifié enn dimoune pou servi Jéhovah? (2 Cor. 3:5, 6)

    Ki l’encouragement l’exemple Jérémie donne bann jeune chretien zordi? (Eccl. 12:1; 1 Tim. 4:12)

  • Lire Jérémie 10:1-5.

    Ki illustration bien fort Jérémie servi pou montré ki li enn kitsoz bete pou faire confiance bann zidole? (Jér. 10:5; Is. 46:7; Hab. 2:19)

  • Lire Jérémie 26:1-16.

    Concernant l’avertissement ki pé annoncé zordi, couma bann chretien oint prend bien compte commandement ki Jéhovah ti donne Jérémie pou ‘pa tire mem enn mot’? (Jér. 26:2; Deut. 4:2; Actes 20:27)

    Ki bon l’exemple Jérémie inn quitté pou bann Témoins de Jéhovah zordi kan nou annonce l’avertissement Jéhovah ar bann nation? (Jér. 26:8, 12, 14, 15; 2 Tim. 4:1-5)

  • Lire 2 Rois 24:1-17.

    Ki consequence bien triste Juda inn gagné parski li pa’nn reste fidele envers Jéhovah? (2 Rois 24:2-4, 14)