Skip to content

Skip to table of contents

Zistoire 70: Yona ek gros poisson

Zistoire 70: Yona ek gros poisson

GUETTE sa missié dan de l’eau-la. Li dan enn grand probleme, pa vrai? Sa gros poisson-la pré pou avale li! Eski to koné kisannla sa missié-la? Li appel Yona. Anou guetté ki finn passé.

Yona enn prophete Jéhovah. Enn tigit le temps apré la mort Élisha, Jéhovah dire Yona: ‘Al dan grand la ville Ninive. La-bas bann dimoune inn vinn trop mauvais ek mo envie ki to al faire zot konn sa.’

Yona ek gros poisson

Mais Yona pa envie allé. Alors, li monte lor enn bateau ki pé al dan enn lot direction ki Ninive. Sa pa faire Jéhovah plaisir ki Yona pé sauvé. Alors, Li envoye enn grand tempete lor la mer. Sa tempete-la tellement fort ki bateau pré pou coulé. Bann marin bien-bien peur ek zot criyé zot bann bondié pou aide zot.

Finalement, Yona dire zot: ‘Mo adore Jéhovah, Bondié ki’nn faire le ciel ek la terre. Ek mo pé sauvé pou pa faire travail ki Jéhovah inn demann moi faire.’ Alors, bann marin demandé: ‘Ki nou bizin faire ar toi pou ki sa tempete-la arreté?’

Yona dire zot: ‘Jette moi dan la mer, ek la mer pou ré-vinn calme.’ Bann marin-la pa envie faire sa, mais tempete-la pé vinn pli fort alors a la fin zot jette Yona dan de l’eau. Tempete-la arreté desuite, ek la mer ré-vinn calme.

Kan Yona coulé dan de l’eau, sa gros poisson-la avale li, mais li pa mort. Pendant trois jour ek trois nuit li reste dan ventre sa poisson-la. Yona regretté ki li pa finn obeir Jéhovah ek li pa’nn al Ninive. Eski to koné ki li faire?

Yona prié Jéhovah pou gagne l’aide. Lerla Jéhovah faire poisson-la vomi Yona lor la terre sec. Apré sa Yona al Ninive. Eski sa pa montré nou ki quantité li important ki nou faire tou seki Jéhovah dire?

Livre la Bible Yona.



Question

  • Kisannla Yona, ek ki Jéhovah demann li faire?
  • Parski li pa envie al kot Jéhovah inn dire li, ki Yona faire?
  • Ki Yona dire bann marin faire pou arrete sa tempete-la?
  • Pareil couma to trouvé dan zimage, ki arrivé kan Yona coule dan de l’eau?
  • Comié le temps Yona reste dan sa gros poisson-la, ek ki li faire ladan?
  • Kot-sa Yona allé kan li sorti dan ventre sa gros poisson-la, ek ki leson sa aprann nou?

Bann question en plus

  • Lire Yona 1:1-17.

    Ki sentiment Yona ena kan li koné ki li bizin al preche avek bann Ninivite? (Yona 1:2, 3; Prov. 3:7; Eccl. 8:12)

  • Lire Yona 2:1, 2, 10.

    Couma l’exemple Yona donne nou confiance ki Jéhovah pou reponn nou bann la priere? (Ps. 22:24; 34:6; 1 Jean 5:14)

  • Lire Yona 3:1-10.

    Ki l’encouragement nou gagné kan nou aprann ki Jéhovah inn contigne servi Yona malgré ki dan commencement li pa’nn accompli so responsabilité? (Ps. 103:14; 1 Pierre 5:10)

    Couma seki’nn passé entre Yona ek bann Ninivite aprann nou concernant bann prejugé ki nou ena lor bann dimoune dan nou territoire? (Yona 3:6-9; Eccl. 11:6; Actes 13:48)