Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 64: Salomon range temple

Zistoire 64: Salomon range temple

AVANT ki David mort, li ti donne Salomon bann plan ki Jéhovah ti donné pou range so temple. Dan quatrieme l’année so regne, Salomon commence construire temple-la ek travail-la finn prend sept an et demi pou fini. Bann dizaine millier zom finn travail pou range sa temple-la ek construction-la finn coute beaucoup kass, parski finn servi beaucoup l’or ek l’argent.

Ena deux la chambre principal dan temple, pareil couma ti ena dan tabernacle. Mais sa bann la chambre-la zot deux fois pli grand ki bann la chambre tabernacle. Salomon faire mette l’arche l’alliance dan la chambre ki dan fond temple, ek li faire mette bann lezot kitsoz ki ti dan tabernacle dan lot la chambre-la.

Kan fini range temple, faire enn grand fête. Salomon agenou devant temple ek prié. C’est seki nou trouvé dan zimage. Li dire Jéhovah: ‘Mem le ciel pa assez grand pou toi, asterla couma to pou kapav reste dan sa tipti temple-la. Mais mo Bondié, s’il te plait ecoute to peuple kan zot pé tourne vers sa l’endroit-la pou prié.’

Le roi Salomon pé prié

Kan Salomon fini prié, difé sorti dan le ciel ek brule bann sacrifice zanimo ki finn offert. Lerla, Jéhovah envoye enn grand la lumiere ki rempli temple. Sa montré ki Jéhovah pé ecouté, ek ki temple ek la priere Salomon finn faire Li plaisir. Asterla, bann dimoune vinn adore Jéhovah dan temple au lieu ki dan tabernacle.

Salomon regne avek sagesse pendant en bon boute le temps, ek le peuple bien content. Mais Salomon marié avek beaucoup madame ki sorti dan lezot pays ki pa adore Jéhovah. Eski to kapav trouve enn parmi sa bann madame-la pé adore enn zidole dan zimage? Finalement, bann madame-la faire Salomon aussi adore bann lezot bondié. Eski to koné ki arrivé kan Salomon faire sa? Li nepli traite le peuple couma bizin. Li vinn mauvais, ek le peuple nepli heureux.

Le roi Salomon pé adore enn zidole

Sa faire Jéhovah en colere ar Salomon ek Li dire li: ‘Mo pou prend royaume-la ar toi ek mo pou donne sa enn lot dimoune. Mo pa pou faire sa pendant ki to encore vivant, mais kan to garson pou le roi. Mais selman, mo pa pou tire le peuple sa royaume-la ar li.’ Anou guetté couma sa arrivé.

1 Chroniques 28:9-21; 29:1-9; 1 Rois 5:1-18; 2 Chroniques 6:12-42; 7:1-5; 1 Rois 11:9-13.



Question

  • Comié le temps Salomon inn prend pou termine construction temple Jéhovah, ek kifer sa ti coute beaucoup l’argent?
  • Comié la chambre principal ena dan temple, ek ki ti metté dan la chambre ki dan fond?
  • Kan inn fini construire temple, ki Salomon inn dire dan so la priere?
  • Couma Jéhovah montré ki Li’nn content la priere ki Salomon inn faire?
  • Ki bann femme Salomon faire li faire, ek ki arrive Salomon?
  • Kifer Jéhovah en colere avek Salomon, ek ki Jéhovah dire li?

Bann question en plus

  • Lire 1 Chroniques 28:9, 10.

    En accord avek bann parole ki David inn dire dan 1 Chroniques 28:9, 10, ki bann grand zeffort nou bizin faire toulé-jour? (Ps. 19:14; Phil. 4:8, 9)

  • Lire 2 Chroniques 6:12-21, 32-42.

    Couma Salomon ti montré ki Bondié Tout-Puissant pa kapav reste dan n’importe ki batiment ki enn zom inn faire? (2 Chron. 6:18; Actes 17:24, 25)

    Ki bann parole ki Salomon inn dire dan 2 Chroniques 6:32, 33 montré nou lor Jéhovah? (Actes 10:34, 35; Gal. 2:6)

  • Lire 2 Chroniques 7:1-5.

    Pareil couma bann garson Israël ti senti zot poussé pou loué Jéhovah kan zot inn trouve so la gloire, couma zordi sa bizin ena enn l’effet lor nou kan nou trouvé couma Jéhovah pé beni so peuple? (2 Chron. 7:3; Ps. 22:22; 34:1; 96:2)

  • Lire 1 Rois 11:9-13.

    Couma la vie ki Salomon inn amené montré nou l’importance pou reste fidele ziska la fin? (1 Rois 11:4, 9; Mat. 10:22; Rév. 2:10)