Skip to content

Skip to table of contents

Zistoire 63: Salomon enn le roi ki ena sagesse

Zistoire 63: Salomon enn le roi ki ena sagesse

SALOMON ti jeune kan li vinn le roi. Li bien content Jéhovah, ek li suive bon conseil ki David, so papa, ti donne li. Jéhovah bien content Salomon, alors, enn la nuit Li dire Salomon dan enn rêve: ‘Salomon ki to ti pou content mo donne toi?’

Lerla Salomon reponn: ‘Jéhovah mo Bondié, mo bien jeune ek mo pa koné couma pou dirigé. Abé donne moi sagesse pou dirige to peuple couma bizin.’

Seki Salomon inn demandé faire Jéhovah plaisir. Alors Li dire: ‘Parski to’nn demann moi sagesse ek pa enn longue la vie ou-soit di-bien, mo pou donne toi plus sagesse ki n’importe kisannla. Mais mo pou donne toi aussi seki to pa’nn demandé, di-bien ek la gloire, toulé-deux.’

Enn tipé le temps apré, deux madame ki ena enn probleme grave vinn guette Salomon. Enn madame-la expliké: ‘Sa madame-la ek moi, nou reste dan mem lakaz. Mo’nn donne naissance enn garson, ek deux jour apré, li aussi li’nn gagne enn garson. Lerla, enn la nuit so tibaba inn mort. Mais pendant ki mo ti pé dormi, li’nn mette so tibaba mort pré kot moi ek li’nn prend seki pou moi. Kan mo’nn levé ek mo guette tibaba mort-la, mo’nn trouvé ki c’est pa mo tibaba.’

Lerla, lot madame-la dire: ‘Non! Tibaba vivant-la pou moi, ek seki’nn mort-la ki pou li!’ Premier madame-la reponn: ‘Non! Tibaba ki’nn mort-la pou toi ek seki vivant-la pou moi!’ Ala couma bann madame-la discuté. Ki Salomon pou faire?

Li faire amenn enn l’epée, ek li dire: ‘Coupe tibaba vivant-la en deux, ek donne chaque madame la moitié.’

Vrai mama-la criyé: ‘Non! S’il vous plait, pa touye tibaba-la. Donne li, lot madame-la!’ Mais lot madame-la dire: ‘Pa donne li personne, allé coupe li en deux.’

Le roi Salomon reglé enn zaffaire difficile

Finalement, Salomon dire: ‘Pa touye tibaba-la! Donne li premier madame-la. Li-mem vrai mama.’ Salomon konn sa parski vrai mama-la bien content so tibaba ek li pré pou donne li lot madame-la au lieu ki touye li. Kan le peuple tendé couma Salomon inn reglé sa probleme-la, zot content ki zot ena enn le roi ki sage coumsa.

Pendant lepok ki Salomon le roi, Bondié beni le peuple kan Li faire zot la terre rapport enn quantité di-blé, l’orge, raisin, figue, ek bann lezot mangé encore. Bann dimoune mette bann bon-bon linge ek zot reste dan bann bon lakaz. Ena bann bon kitsoz plus ki bizin pou tou bann dimoune.

1 Rois 3:3-28; 4:29-34.



Question

  • Ki Jéhovah demann Salomon, ek ki reponse Salomon donne Li?
  • Parski seki Salomon ti demandé ti faire Li plaisir, ki Jéhovah promette pou donne li?
  • Ki probleme difficile deux madame presente devant Salomon?
  • Pareil couma to trouvé lor zimage, couma Salomon reglé sa probleme-la?
  • Couma regne Salomon ti été, ek kifer?

Bann question en plus

  • Lire 1 Rois 3:3-28.

    Zordi, bann frere ena responsabilité dan l’organisation Bondié. Ki zot kapav aprann ar bann parole sincere ki Salomon inn dire dan 1 Rois 3:7? (Ps. 119:105; Prov. 3:5, 6)

    Concernant bann kitsoz ki li bon nou prié, couma seki Salomon ti demandé li enn bon l’exemple pou nou? (1 Rois 3:9, 11; Prov. 30:8, 9; 1 Jean 5:14)

    Kan nou guette fason ki Salomon inn reglé sa probleme entre sa deux madame-la, ki confiance nou ena concernant regne nou futur Grand Salomon, Jésus Christ? (1 Rois 3:28; Is. 9:6, 7; 11:2-4)

  • Lire 1 Rois 4:29-34.

    Kan Salomon ti demann pou gagne enn leker obeissant, couma Jéhovah ti reponn so la priere? (1 Rois 4:29)

    Kan nou guette zeffort ki beaucoup dimoune ti faire pou zot tann sagesse Salomon, ki l’attitude nou bizin ena concernant etudié Parole Bondié? (1 Rois 4:29, 34; Jean 17:3; 2 Tim. 3:16)