Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 73: Dernier bon le roi Israël

Zistoire 73: Dernier bon le roi Israël

YOSHIYA ena selman huit an kan li vinn le roi lor deux tribu Israël dan le sud. Mais li trop jeune pou vinn le roi. Alors, dan commencement deux-trois dimoune ki ena plus experience aide li pou dirige pays.

Apré ki Yoshiya regné pendant sept an li commence rod Jéhovah. Li suive l’exemple bann bon le roi couma David, Yehoshaphat ek Hizqiya. Apré sa, kan li ti encore enn adolescent, Yoshiya faire enn kitsoz ki demann beaucoup courage.

Le roi Yoshiya ek so bann zom pé detruire bann zidole

Pendant enn bon boute le temps la plupart Israélite ti bien mauvais. Zot ti adore bann fausse bondié, ek zot ti prosterne zot devant bann zidole. Alors, Yoshiya ek so bann zom commence tire bann fausse bondié dan pays. C’est enn grand travail parski beaucoup dimoune ti pé adore bann fausse bondié. To kapav trouve Yoshiya ek so bann zom pé detruire bann zidole.

Apré sa, Yoshiya mette trois zom en charge pou repare temple Jéhovah. Le peuple donne kass pou paye bann zom ki pou faire sa travail-la. Pendant ki zot pé travail dan temple, grand pretre Hilqia al remark enn kitsoz bien important la-bas. Li trouve livre la loi ki Jéhovah ti donne Moïse inn gagne bien longtemps. Sa livre-la ti perdi depuis beaucoup l’année.

Kan Hilqia amenn sa livre-la, Yoshiya demann li lire sa. Pendant ki li pé ecouté, Yoshiya realisé ki le peuple pa’nn garde la loi Jéhovah. A cause sa li bien triste ek li dechire so linge, pareil couma to trouvé lor zimage. Li dire: ‘Jéhovah en colere ar nou, parski nou bann grand dimoune pa’nn garde bann la loi ki’nn ecrire dan sa livre-la.’

Hilqia ek le roi Yoshiya

Yoshiya donne l’ordre grand pretre Hilqia pou koné ki Jéhovah pou faire zot. Hilqia al guette prophetesse Houlda. Houlda dire li donne Yoshiya sa message ki Jéhovah inn donné-la: ‘Jérusalem ek le peuple en entier pou gagne enn punition parski zot finn adore bann fausse bondié ek pays finn rempli avek mechanceté. Mais a cause toi, Yoshiya, to’nn faire seki bon, sa punition-la pou vinn lor zot apré to la mort.’

2 Chroniques 34:1-28.



Question

  • Ki l’age Yoshiya ena kan li vinn le roi, ek ki li commence faire apré ki li’nn regné pendant sept an?
  • Ki to trouve Yoshiya pé faire dan premier zimage?
  • Ki grand pretre trouvé kan bann zom pé repare temple?
  • Kifer Yoshiya dechire so linge boute-boute?
  • Ki message Jéhovah faire prophetesse Houlda donne Yoshiya?

Bann question en plus

  • Lire 2 Chroniques 34:1-28.

    Ki l’exemple Yoshiya donne bann dimoune ki kitfois finn bizin faire face ar enn l’enfance difficile? (2 Chron. 33:21-25; 34:1, 2; Ps. 27:10)

    Ki bann kitsoz Yoshiya inn faire pou encourage vrai l’adoration pendant 8eme, 12eme ek 18eme l’année so regne? (2 Chron. 34:3, 8)

    Ki bann leson nou kapav aprann ar l’exemple le roi Yoshiya ek grand pretre Hilqia, concernant entretenir bann place kot nou adore Jéhovah? (2 Chron. 34:9-13; Prov. 11:14; 1 Cor. 10:31)