Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 72: Bondié aide le roi Hizqiya

Zistoire 72: Bondié aide le roi Hizqiya

ESKI to koné kifer sa missié-la pé prié Jéhovah? Kifer li’nn tal sa bann lettre-la devant l’autel Jéhovah? Sa missié-la appel Hizqiya. Li le roi deux tribu Israël ki trouve dan le sud. Li dan beaucoup probleme. Kifer?

Le roi Hizqiya pé prié

Parski bann l’armée Assyrien inn fini detruire 10 tribu ki trouve dan le nord. Jéhovah inn laisse sa arrivé parski sa bann dimoune-la ti bien mauvais. Ek asterla, l’armée Assyrien pé vinn laguerre kont royaume deux tribu.

Le roi l’Assyrie inn fek envoye le roi Hizqiya bann lettre. C’est sa bann lettre-la mem ki Hizqiya inn tal devant Bondié. Dan sa bann lettre-la, le roi l’Assyrie bouffonne Jéhovah, ek dire Hizqiya prend perdi. Ala kifer Hizqiya prié: ‘O Jéhovah, sap nou dan la main le roi l’Assyrie. Lerla, tou bann nation pou koné ki to tousel Bondié.’ Eski Jéhovah pou ecoute Hizqiya?

Hizqiya enn bon le roi. Li pa couma sa bann mauvais le roi ki dan royaume 10 tribu Israël, ou-soit couma so papa Ahaz, ki ti enn mauvais le roi. Hizqiya faire tou pou obeir tou bann la loi Jéhovah. Alors, plitar kan Hizqiya fini prié, prophete Isaïe envoye li enn message ki sorti kot Jéhovah: ‘Le roi l’Assyrie pa pou rente dan Jérusalem. Okenn so bann soldat pa pou mem vinn pré ar li. Zot pa pou mem envoye enn fleche lor sa la ville-la.’

Guette sa zimage-la. Eski to koné kisannla sa bann soldat mort-la? Zot bann Assyrien. Jéhovah inn envoye so ange, ek dan enn sel la nuit sa ange-la inn touye 185,000 soldat assyrien. Alors, le roi l’Assyrie prend perdi ek retourne lakaz.

Cadave bann soldat assyrien

Royaume deux tribu inn sapé, ek le peuple vive en paix pou enn tigit le temps. Mais apré la mort Hizqiya so garson, Manassé, vinn le roi. Apré Manassé c’est so garson Amôn ki vinn le roi ek toulé-deux zot bann mauvais le roi. Encore enn fois sa pays-la rempli ar crime ek violence. Kan le roi Amôn so bann prop serviteur touye li, so garson Yoshiya vinn le roi lor royaume deux tribu.

2 Rois 18:1-36; 19:1-37; 21:1-25.



Question

  • Kisannla sa missié lor zimage-la, ek kifer li dan probleme?
  • Ki sa bann lettre ki Hizqiya inn mette devant Bondié-la, ek ki la priere Hizqiya pé faire?
  • Ki qualité le roi Hizqiya été, ek ki message Jéhovah envoye li a travers Isaïe?
  • Dapré zimage, ki ange Jéhovah faire bann Assyrien?
  • Mem si pou enn tigit le temps ena la paix dan royaume deux tribu, ki arrivé apré ki Hizqiya mort?

Bann question en plus

  • Lire 2 Rois 18:1-36.

    Couma Rabshaqé, porte-parole bann Assyrien, finn essaye affaibli la foi bann Israélite? (2 Rois 18:19, 21; Ex. 5:2; Ps. 64:3)

    Kan bann Témoins de Jéhovah ena pou faire face ar bann ki pé persecute zot, couma zot suive l’exemple Hizqiya? (2 Rois 18:36; Ps. 39:1; Prov. 26:4; 2 Tim. 2:24)

  • Lire 2 Rois 19:1-37.

    Zordi couma bann serviteur Jéhovah imite Hizqiya kan zot dan probleme? (2 Rois 19:1, 2; Prov. 3:5, 6; Héb. 10:24, 25; Jacq. 5:14, 15)

    Ki trois defaite le roi Sennakérib inn gagné, ek kisannla li representé dan enn fason prophetik? (2 Rois 19:32, 35, 37; Rév. 20:2, 3)

  • Lire 2 Rois 21:1-6, 16.

    Kifer kapav dire ki Manassé c’est li-mem pli mauvais le roi ki’nn regné dan Jérusalem? (2 Chron. 33:4-6, 9)