Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 66: Mauvais la reine Jézabel

Zistoire 66: Mauvais la reine Jézabel

APRÉ la mort le roi Yarobam, chaque le roi ki ti regne dan royaume le nord, 10 tribu Israël, ti mauvais. Le roi Ahab li-mem pli mauvais parmi zot tou. Eski to koné kifer? C’est a cause so madame, mauvais la reine Jézabel.

Jézabel pa ti enn Israélite. Li tifi le roi Sidon. Li adore fausse bondié Baal ek li reussi faire Ahab ek beaucoup bann Israélite aussi adore Baal. Jézabel pa content Jéhovah ek li touye beaucoup bann prophete Bondié. Ena finn bizin al cachiette dan caverne pou ki li pa touye zot. Si Jézabel envie enn kitsoz, li pou al mem ziska touye enn dimoune zis pou gagne sa kitsoz-la.

Enn jour le roi Ahab bien triste. Alors, Jézabel demande li: ‘Kifer to triste zordi?’

Ahab reponn: ‘C’est a cause seki Naboth inn dire moi. Mo ti envie acheté so karo raisin, mais li’nn dire moi ki li pa pou vann li.’

Jézabel dire li: ‘Pa gagne tracas, mo pou faire toi gagne li.’

Alors Jézabel ecrire bann lettre ek li envoye sa bann chef dan la ville kot Naboth resté. Li dire zot: ‘Faire certain vaurien dire ki Naboth inn maudit Bondié ek le roi. Apré sa, amenn Naboth en dehors la ville ek envoye li coute roche ziska ki li mort.’

Desuite couma Jézabel aprann ki Naboth inn mort, li dire Ahab: ‘Allé aster, al prend so karo raisin.’ Eski to pa d’accord ki bizin puni Jézabel parski li’nn faire enn mauvais kitsoz coumsa?

La reine Jézabel

Alors, kan ler inn arrivé, Jéhovah envoye enn missié ki appel Yéhou pou puni li. Kan Jézabel aprann ki Yéhou pé vini, li peinture so lizié ek li arrange li-mem pou faire li parette joli. Mais kan Yéhou vini ek li trouve Jézabel kot la fenetre, li criyé bann zom dan palais ek li dire zot: ‘Jette li enba!’ Couma to trouvé dan zimage, bann zom-la obeir. Zot jette li enba ek li mort. Ala couma mauvais la reine Jézabel inn mort.

1 Rois 16:29-33; 18:1-4; 21:1-16; 2 Rois 9:30-37.



Question

  • Kisannla Jézabel?
  • Kifer enn jour le roi Ahab ti triste?
  • Pou ki so missié Ahab gagne karo raisin Naboth, ki Jézabel faire?
  • Kisannla Jéhovah envoyé pou puni Jézabel?
  • Pareil couma to trouvé dan zimage, ki arrivé kan Yéhou arrive devant palais Jézabel?

Bann question en plus

  • Lire 1 Rois 16:29-33 ek 18:3, 4.

    Pendant ki Ahab ti le roi, ziska ki point ti ena bann mauvais condition dan Israël? (1 Rois 14:9)

  • Lire 1 Rois 21:1-16.

    Couma Naboth ti montré so courage ek so fidelité envers Jéhovah? (1 Rois 21:1-3; Lév. 25:23-28)

    Dapré l’exemple Ahab, ki nou aprann concernant reaction ki nou bizin ena kan enn kikenn decevoir nou? (1 Rois 21:4; Rom. 5:3-5)

  • Lire 2 Rois 9:30-37.

    Ki nou kapav aprann ar zele ki Yéhou ti ena pou faire volonté Jéhovah? (2 Rois 9:4-10; 2 Cor. 9:1, 2; 2 Tim. 4:2)