Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 65: Royaume divisé

Zistoire 65: Royaume divisé

ESKI to koné kifer sa missié-la pé dechire so robe boute-boute? C’est Jéhovah ki’nn dire li faire sa. Sa missié-la c’est Ahiya, prophete Bondié. Eski to koné ki été enn prophete? C’est enn kikenn avek ki Bondié dire en avance seki pou arrivé.

Ahiya ek Yarobam

Dan sa zimage-la, Ahiya pé koz avek Yarobam. Salomon ti mette Yarobam en charge deux-trois travail construction. Kan Ahiya joinde Yarobam lor chemin, li faire enn kitsoz bizarre. Li tire so robe neuf lor li ek li dechire li en douze boute. Li dire Yarobam: ‘Prend 10 boute pou toi.’ To koné kifer Ahiya donne Yarobam 10 boute?

Ahiya expliké ki Jéhovah pou tire royaume ar Salomon. Li dire ki Jéhovah pou donne Yarobam 10 tribu. Sa vedir, ki Rehabam, garson Salomon, pou dirige zis lor deux tribu.

Kan Salomon tann seki Ahiya inn dire Yarobam li bien en colere. Li envie touye Yarobam. Mais Yarobam sauvé al dan l’Égypte. Apré inpé le temps Salomon mort. Li ti le roi pendant 40 an, mais asterla c’est so garson Rehabam ki le roi. Dan l’Égypte, Yarobam tann dire ki Salomon inn mort, alors li retourne dan Israël.

Rehabam pa enn bon le roi. Li faire dominere ar le peuple plus ki so papa Salomon. Yarobam ek deux-trois zom important al guette Rehabam ek demann li pou traite le peuple pli bien. Mais Rehabam pa ecouté. Avredir, li faire pli dominere ki avant. Alors le peuple faire Yarobam vinn le roi lor 10 tribu, mais deux tribu, Benjamin ek Juda, laisse Rehabam contigne dirige zot couma zot le roi.

Yarobam pa envie ki so peuple al Jérusalem pou adoré dan temple Jéhovah. Alors li faire deux veau en or ek faire le peuple sa 10 tribu-la adore zot. Bien vite pays rempli ar crime ek violence.

Ena aussi probleme dan royaume deux tribu. Moins ki cinq an apré ki Rehabam vinn le roi, le roi l’Égypte vinn laguerre kont Jérusalem. Li prend beaucoup tresor dan temple Jéhovah. Alors, temple Jérusalem pa’nn reste longtemps couma li ti été kan ti construire li.

1 Rois 11:26-43; 12:1-33; 14:21-31.



Question

  • Couma sa deux zom ki dan zimage-la appelé, ek kisannla zot été?
  • Ki Ahiya faire avek robe ki li’nn metté lor li, ek ki signification sa action-la?
  • Ki Salomon essaye faire ar Yarobam?
  • Kifer bann dimoune faire Yarobam vinn le roi lor dix tribu?
  • Kifer Yarobam faire deux veau en or, ek ki arrive sa pays-la pa trop longtemps apré?
  • Ki arrive royaume deux tribu ek temple Jéhovah dan Jérusalem?

Bann question en plus

  • Lire 1 Rois 11:26-43.

    Ki qualité dimoune Yarobam ti été, ek ki Jéhovah inn promette li si li garde bann la loi Bondié? (1 Rois 11:28, 38)

  • Lire 1 Rois 12:1-33.

    Ki leson bann parent ek bann ancien kapav aprann ar mauvais l’exemple Rehabam, concernant l’autorité ki zot ena? (1 Rois 12:13; Eccl. 7:7; 1 Pierre 5:2, 3)

    Vers kisannla bann jeune zordi bizin tourne zot pou gagne enn direction ki sur kan zot ena pou prend bann grand decision dan zot la vie? (1 Rois 12:6, 7; Prov. 1:8, 9; 2 Tim. 3:16, 17; Héb. 13:7)

    Ki finn pousse Yarobam pou faire deux centre pou adore sa bann veau-la, ek couma sa montré ki li pa ti ena la foi en Jéhovah? (1 Rois 11:37; 12:26-28)

    Kisannla ki’nn faire le peuple dan royaume dix tribu rebellé kont vrai l’adoration? (1 Rois 12:32, 33)