Skip to content

Skip to table of contents

Zistoire 56: Saül—premier le roi Israël

Zistoire 56: Saül—premier le roi Israël
Samuel pé oint Saül pou vinn li le roi

GUETTÉ! Samuel pé verse de l’huile lor la tête enn missié. Sa-mem ki ti habitué faire avek enn dimoune pou montré ki finn choisir li couma le roi. Jéhovah dire Samuel verse de l’huile lor la tête Saül. C’est enn de l’huile special ki senti bon.

Saül pensé ki li pa assez bon pou vinn enn le roi. Li dire Samuel: ‘Mo sorti dan tribu Benjamin, pli tipti tribu dan Israël. Kifer to dire ki mo pou vinn le roi?’ Jéhovah content Saül parski li pa pretann ki li enn dimoune ki important. C’est pou sa ki Jéhovah choisir li pou vinn le roi.

Mais Saül pa enn dimoune misere ni enn ti dimoune. Li sorti dan enn famille riche ek li enn joli garson, li bien haute. Bann lezot dimoune dan Israël ti tape kot so zepaule! Saül, enn kikenn ki galope bien vite ek li bien fort. Le peuple bien content ki Jéhovah inn choisir Saül couma zot le roi. Zot tou commence criyé: ‘Vive le roi!’

Bann l’ennemi Israël encore toujours fort. Zot pé contigne faire dominere ar bann Israélite. A peine Saül vinn le roi, bann Ammonite vinn laguerre ar zot. Mais Saül rassemblé enn grand l’armée ek li gagne la victoire lor bann Ammonite. Sa faire le peuple content ki Saül le roi.

A mesure ki bann l’année passé, Saül faire bann Israélite gagne beaucoup victoire lor zot bann l’ennemi. Saül ena aussi enn garson bien courageux ki appel Yonathân. Ek Yonathân aide bann Israélite pou gagne beaucoup la guerre. Bann Philistin toujours pli grand l’ennemi bann Israélite. Enn jour plusieurs millier Philistin vinn laguerre ar bann Israélite.

Samuel dire Saül attann li vini pou ki li offert enn sacrifice Jéhovah. Mais Samuel tardé pou vini. Saül gagne peur pangar bann Philistin commence laguerre, alors li offert sacrifice-la li-mem. Finalement kan Samuel vini, li dire Saül ki li’nn desobeir Jéhovah. Samuel dire: ‘Jéhovah pou choisir enn lot dimoune pou vinn le roi lor Israël.’

Plitar Saül desobeir encore enn fois. Alors Samuel dire li: ‘Vaut mieux obeir Jéhovah ki offert Li pli bon mouton ki ena. Parski to pa’nn obeir Jéhovah, Jéhovah pa pou garde toi couma le roi Israël.’

Sa zistoire-la aprann nou enn bon leson. Li montré nou ki quantité li important ki touletan nou obeir Jéhovah. Li aussi montré nou couma enn bon dimoune pareil couma Saül, kapav changé ek vinn mauvais. Jamais nou pa pou envie vinn mauvais, pa vrai?

1 Samuel chapitre 9-11; 13:5-14; 14:47-52; 15:1-35; 2 Samuel 1:23.



Question

  • Dan sa zimage-la, ki Samuel pé faire ek kifer?
  • Kifer Jéhovah content Saül, ek ki qualité zom Saül été?
  • Couma garson Saül appelé, ek ki li faire?
  • Kifer Saül offert enn sacrifice au lieu ki li attann Samuel faire sa?
  • Ki leson nou kapav aprann ar fason ki Saül agir?

Bann question en plus

  • Lire 1 Samuel 9:15-21 ek 10:17-27.

    Couma modestie Saül ti aide li pou pa agir brite kan deux-trois zom ti koz avek li sans okenn respé? (1 Sam. 9:21; 10:21, 22, 27; Prov. 17:27)

  • Lire 1 Samuel 13:5-14.

    Ki peché Saül ti faire dan Guilgal? (1 Sam. 10:8; 13:8, 9, 13)

  • Lire 1 Samuel 15:1-35.

    Ki peché grave Saül ti faire concernant Agag, le roi Amaleq? (1 Sam. 15:2, 3, 8, 9, 22)

    Couma Saül ti essaye justifié seki li ti faire ek jette sa faute-la lor enn lot? (1 Sam. 15:24)

    Ki l’avertissement nou bizin prend compte zordi kan donne nou enn conseil? (1 Sam. 15:19-21; Ps. 141:5; Prov. 9:8, 9; 11:2)