Skip to content

Skip to table of contents

Zistoire 54: Zom ki ti pli fort

Zistoire 54: Zom ki ti pli fort

ESKI to konn nom missié pli fort ki’nn existé lor la terre? C’est enn juge ki appel Samson. C’est Jéhovah ki ti donne Samson sa quantité la force-la. Avant mem ki Samson né, Jéhovah ti dire so mama: ‘Bientot to pou gagne enn garson. Li pou sauve bann Israélite dan la main bann Philistin.’

Samson laguerre avek enn lion

Bann Philistin c’est bann mauvais dimoune ki reste dan Canaan. Zot ena beaucoup zom la guerre, ek zot ti faire bann Israélite beaucoup di-tort. Enn fois, kan Samson ti pé al kot bann Philistin resté, enn gros lion bien feroce ti vinn devant li. Mais Samson touye sa lion-la zis avek so main. Li aussi touye enn centaine mauvais Philistin.

Plitar Samson content enn tifi ki appel Dalila. Chaque chef Philistin promette pou donne Dalila 1,100 piece l’argent si li dire zot kifer Samson fort coumsa. Dalila envie gagne tou sa kass-la. Li pa enn vrai camarade ar Samson ou-soit peuple Bondié. Alors li pa arrete demann Samson ki kitsoz faire li fort coumsa.

Dalila ek Samson

Finalement Dalila reussi faire Samson dire li secret so la force. Li dire: ‘Jamais mo’nn coupe mo cheveux. Depuis ki mo’nn né, Bondié finn choisir moi couma enn serviteur special, enn Naziréen. Si mo coup mo cheveux mo pou perdi tou mo la force.’

Kan Dalila aprann sa, li faire Samson dormi lor so genou. Lerla li faire enn missié vini ek coupe so cheveux. Kan Samson levé li perdi tou so force. Bann Philistin vini ek faire li prisonnier. Zot tire so deux lizié ek zot faire li vinn zot esclave.

Samson pousse bann colonne

Enn jour bann Philistin organise enn grand fête pou adore zot bondié Dagôn,ek zot faire amenn Samson pou faire bouffon ar li. Pendant sa le temps-la, Samson so cheveux inn poussé. Ar sa garson ki pé trap so la main pou guide li-la, Samson dire: ‘Laisse mo touche bann colonne ki tini sa batiment-la.’ Lerla Samson prié Jéhovah pou gagne la force ek li trap bann colonne-la bien fort. Li criyé: ‘Laisse mo mort avek bann Philistin.’ Ena 3,000 Philistin dan sa fête-la, ek kan Samson appuye avek beaucoup la force lor sa bann colonne-la, batiment-la tombé ek li touye tou sa bann mauvais dimoune-la.

Juges chapitre 13 ziska 16.



Question

  • Couma zom pli fort ki’nn vive lor la terre ti appelé, ek kisannla ti donne li so la force?
  • Couma to trouvé lor zimage, enn jour ki Samson ti faire avek enn gros lion?
  • Ki secret Samson pé dire Dalila dan sa zimage-la, ek couma sa finn amenn bann Philistin pou maye li?
  • Couma Samson finn provok la mort 3,000 l’ennemi Philistin jour so la mort?

Bann question en plus

  • Lire Juges 13:1-14.

    En seki concerne elevé bann zenfant, couma eski Manoah ek so madame laisse enn bon l’exemple pou bann parent? (Juges 13:8; Ps. 127:3; Éph. 6:4)

  • Lire Juges 14:5-9 ek 15:9-16.

    Bann recit raconté couma Samson inn touye enn lion, inn casse bann la corde neuf avek ki ti attache li, ek inn servi la machoire enn bourrik pou touye 1,000 zom. Ki sa aprann nou lor fason ki l’esprit saint Jéhovah agir?

    Couma l’esprit saint aide nou zordi? (Juges 14:6; 15:14; Zek. 4:6; Actes 4:31)

  • Lire Juges 16:18-31.

    Ki l’influence bann mauvais frequentation finn ena lor Samson, ek ki sa enseigne nou? (Juges 16:18, 19; 1 Cor. 15:33)