Skip to content

Skip to table of contents

Zistoire 53: Promesse Yiphtah

Zistoire 53: Promesse Yiphtah
Tifi Yiphtah

ESKI inn deja arrivé ki to’nn faire enn promesse ek plitar to trouve sa difficile pou to garde li? C’est seki ti arrive sa missié lor sa zimage-la, ek c’est a cause sa ki li bien triste. Sa missié-la c’est en juge dan Israël ki ena beaucoup courage ek li appel Yiphtah.

Yiphtah vive enn lepok kot bann Israélite nepli adore Jéhovah. Zot pé faire seki mauvais encore enn fois. Alors, Jéhovah laisse le peuple Ammôn faire zot di-tort. Lerla, bann Israélite criyé vers Jéhovah: ‘Nou finn faire peché kont toi. S’il te plait, sauve nou!’

Yiphtah ek so bann zom

Le peuple ena regret pou bann mauvais kitsoz ki zot inn faire. Zot montré ki zot regretté kan zot ré-adore Jéhovah. Alors Jéhovah aide zot encore enn fois.

Le peuple choisir Yiphtah pou al laguerre kont bann mauvais Ammonite. Yiphtah bien envie ki Jéhovah aide li dan sa la guerre-la. Alors li faire sa promesse-la Jéhovah: ‘Si to faire moi gagne la victoire lor bann Ammonite, premier dimoune ki pou sorti dan mo lakaz pou vinn joinde moi kan mo sorti la guerre mo pou donne toi li.’

Jéhovah ecoute promesse ki Yiphtah faire ek Li aide li pou gagne la victoire. Kan Yiphtah retourne lakaz, eski to koné ki premier dimoune sorti pou vinn joinde li? C’est so tifi, so sel zenfant. Yiphtah ploré: ‘Ayo, mo tifi! Ki tristesse to pé donne moi. Mais mo’nn faire enn promesse ar Jéhovah ek mo pa kapav casse li.’

Kan tifi Yiphtah koné ki promesse so papa inn faire, au commencement li aussi li triste. Parski sa vedir ki li pou bizin quitte so papa ek so bann camarade. Mais li pou bizin passe le reste so la vie pou servi Jéhovah dan tabernacle dan Shilo. Alors, li dire so papa: ‘Si to’nn faire enn promesse Jéhovah, to bizin garde to promesse.’

A cause sa, tifi Yiphtah al Shilo ek li passe le reste so la vie dan service Jéhovah dan tabernacle. Toulé l’année bann madame dan Israël al visite li pendant quatre jour, ek zot passe bann bon moment ensam. Le peuple bien content tifi Yiphtah parski li enn bon serviteur Jéhovah.

Juges 10:6-18; 11:1-40.



Question

  • Kisannla Yiphtah été, ek dan ki lepok li ti vive?
  • Ki promesse Yiphtah faire Jéhovah?
  • Ki kitsoz faire Yiphtah triste kan li retourne lakaz apré enn victoire lor bann Ammonite?
  • Ki tifi Yiphtah dire kan li aprann ki promesse so papa ti faire?
  • Kifer le peuple content tifi Yiphtah?

Bann question en plus

  • Lire Juges 10:6-18.

    Bann Israélite pa finn montré zot fidele envers Jéhovah, couma sa li enn l’avertissement pou nou? (Juges 10:6, 15, 16; Rom. 15:4; Rév. 2:10)

  • Lire Juges 11:1-11, 29-40.

    Couma nou koné ki pou Yiphtah, donne so tifi couma “enn sacrifice ki brule net,” sa pa ti vedir ki li ti pou offert li couma enn sacrifice humain ki ti pou brulé dan difé? (Juges 11:31; Lév. 16:24; Deut. 18:10, 12)

    Dan ki fason Yiphtah ti offert so tifi en sacrifice?

    Ki nou kapav aprann ar l’attitude Yiphtah en rapport avek promesse ki li ti faire Jéhovah? (Juges 11:35, 39; Eccl. 5:4, 5; Mat. 16:24)

    Couma l’exemple tifi Yiphtah encourage bann jeune chretien pou faire carriere dan service a plein temps? (Juges 11:36; Mat. 6:33; Phil. 3:8)