Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 49: Soleil reste en place

Zistoire 49: Soleil reste en place

GUETTE Josué. Li pé dire: ‘Soleil, reste en place!’ Ek vrai-mem soleil reste en place. Li reste au millieu le ciel sans bougé pendant enn journée entier. C’est Jéhovah ki derriere sa! Mais anou guetté kifer Josué envie ki soleil contigne brillé.

Soleil

Kan sa cinq mauvais le roi Canaan-la commence laguerre ar bann Guibéonite, bann Guibéonite envoye enn dimoune pou demann Josué l’aide. Li dire: ‘Vinn vite! Sauve nou! Tou bann le roi ki reste dan enn l’endroit kot ena bann montagne finn desann pou laguerre ar to bann serviteur.’

Desuite Josué ek tou so bann zom laguerre allé. Zot marché pendant tout la nuit. Kan zot arrive Guibéôn, bann soldat sa cinq le roi-la gagne peur ek commence sauvé. Lerla, Jéhovah faire bann gros la grêle tombé depuis le ciel. Comparé ar quantité soldat ki’nn mort dan la main bann zom Josué, la grêle inn touye pli beaucoup soldat.

Josué

Josué remarké ki soleil pré pou al couché. Pou commence faire noir, ek beaucoup parmi bann soldat sa cinq le roi-la pou sauvé. C’est a cause sa ki Josué prié Jéhovah ek lerla dire: ‘Soleil, reste en place!’ Ek kan soleil contigne brillé, bann Israélite reussi gagne sa la guerre-la.

Ena encore beaucoup mauvais le roi dan Canaan ki pa content peuple Bondié. Josué ek so l’armée finn prend apepré six l’année pou gagne la victoire lor 31 le roi dan sa pays-la. Apré sa, Josué faire sur ki partage pays Canaan avek bann tribu ki pa ti encore gagne zot portion la terre.

Beaucoup l’année passé, ek finalement Josué mort kan li ena 110 an. Tant ki li ek so bann camarade ti vivant, le peuple ti obeir Jéhovah. Mais kan sa bann bon zom-la mort, le peuple commence faire bann mauvais kitsoz ek gagne probleme. C’est lerla ki zot vrai-mem bizin l’aide Bondié.

Josué 10:6-15; 12:7-24; 14:1-5; Juges 2:8-13.



Question

  • Dapré sa zimage-la, ki Josué pé dire, ek kifer?
  • Couma Jéhovah ti sap Josué ek so bann zom?
  • Lor comié le roi Josué ti reussi gagne la victoire, ek comié le temps sa ti prend li?
  • Kifer Josué ti divise pays Canaan?
  • Ki l’age Josué ti ena kan li ti mort, ek ki ti arrive le peuple apré sa?

Bann question en plus

  • Lire Josué 10:6-15.

    Parski nou koné ki Jéhovah ti faire soleil ek la lune arreté en faveur Israël, ki confiance sa donne nou zordi? (Jos. 10:8, 10, 12, 13; Ps. 18:3; Prov. 18:10)

  • Lire Josué 12:7-24.

    En realité, grace a kisannla zot ti reussi gagne la victoire lor 31 le roi dan Canaan, ek kifer sa li important pou nou zordi? (Jos. 12:7; 24:11-13; Deut. 31:8; Luc 21:9, 25-28)

  • Lire Josué 14:1-5.

    Couma ti divise pays-la entre bann tribu Israël, ek ki sa montré nou concernant l’heritage ki pou donné dan Paradis? (Jos. 14:2; Is. 65:21; Ézék. 47:21-23; 1 Cor. 14:33)

  • Lire Juges 2:8-13.

    Pareil couma Josué en Israël, kisannla zordi ki agir couma enn l’obstacle kont l’apostasie? (Juges 2:8, 10, 11; Mat. 24:45-47; 2 Thess. 2:3-6; Tite 1:7-9; Rév. 1:1; 2:1, 2)