Skip to content

Skip to table of contents

Zistoire 45: Zot traverse la riviere Jourdain

Zistoire 45: Zot traverse la riviere Jourdain

GUETTÉ! Bann Israélite pé traverse la riviere Jourdain! Mais kot de l’eau la riviere-la? Pendant sa lepok l’année-la la pluie tombe beaucoup, la riviere ti bien rempli zis deux-trois minute avant. Mais asterla tou de l’eau inn disparette! Ek bann Israélite pé traverse lor enn la terre sec pareil couma zot ti faire dan la mer Rouge! Kot tou sa de l’eau-la inn allé? Anou guetté.

Bann Israélite traverse la riviere Jourdain

Kan finn arrive ler pou ki bann Israélite traverse la riviere Jourdain, guette seki Jéhovah inn faire Josué dire le peuple: ‘Bann pretre bizin prend l’arche l’alliance ek marche devant nou. Kan zot pou mette zot lipié dan la riviere Jourdain, de l’eau pou arrete desann.’

Alors, bann pretre prend l’arche l’alliance ek sarié li devant le peuple. Kan zot arrive kot Jourdain, bann pretre rente direct dan de l’eau. De l’eau-la bien fond ek courant-la fort. Mais couma zot lipié touche de l’eau, de l’eau-la arrete desann! C’est enn mirak! Jéhovah finn blok la riviere-la pli la-haut. Alors, la riviere pa finn tardé pou sec!

Bann pretre ki pé sarié l’arche l’alliance contigne al ziska ki zot arrive au millieu sa la riviere sec-la. Eski to trouve zot dan zimage? Pendant ki zot pé debouté, tou bann Israélite traverse la riviere Jourdain lor enn la terre sec!

Kan zot tou fini traversé, Jéhovah faire Josué dire 12 missié bien fort: ‘Al dan la riviere kot bann pretre pé debouté avek l’arche l’alliance. Ramasse 12 roche, ek mette zot en tas dan l’endroit kot zot pou passe la nuit. Lerla, dan l’avenir, kan zot bann zenfant pou demann zot ki sa bann roche-la representé, zot bizin dire ki de l’eau ti arrete desann kan l’arche l’alliance Jéhovah ti traverse Jourdain. Sa bann roche-la pou faire zot rappel sa mirak-la!’ Josué aussi mette 12 roche en tas dan l’endroit kot bann pretre ti debouté.

Josué

A la fin Josué dire bann pretre ki ti pé sarié l’arche l’alliance: ‘Sorti dan Jourdain.’ Ek couma zot faire sa, de l’eau ré-commence desann dan la riviere.

Josué 3:1-17; 4:1-18.



Question

  • Ki mirak Jéhovah ti faire pou ki bann Israélite reussi traverse la riviere Jourdain?
  • Pou montré zot la foi, ki bann Israélite finn bizin faire pou traverse la riviere Jourdain?
  • Kifer Jéhovah ti dire Josué ramasse 12 roche dan la riviere?
  • Ki ti arrivé desuite couma bann pretre ti sorti dan Jourdain?

Bann question en plus

  • Lire Josué 3:1-17.

    Dapré sa recit-la, ki nou bizin faire pou gagne soutien ek benediction Jéhovah? (Jos. 3:13, 15; Prov. 3:5; Jacq. 2:22, 26)

    Couma Jourdain ti été kan bann Israélite ti traverse li pou rente dan la Terre promise, ek couma sa ti glorifié nom Jéhovah? (Jos. 3:15; 4:18; Ps. 66:5-7)

  • Lire Josué 4:1-18.

    Kifer bann Israélite ti prend 12 roche dan la riviere Jourdain ek ti amenn zot dan Guilgal? (Jos. 4:4-7)