Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 44: Rahab cachiette bann espion

Zistoire 44: Rahab cachiette bann espion

SA BANN zom-la dan probleme. Zot bizin sauvé sinon bann dimoune pou touye zot. Zot bann espion Israélite, ek sa femme ki pé aide zot-la appel Rahab. Rahab reste dan enn lakaz lor muraille la ville Jéricho. Anou guetté kifer sa bann zom-la dan probleme.

Bann Israélite inn paré pou traverse la riviere Jourdain pou rente dan pays Canaan. Mais avant zot faire sa, Josué envoye deux espion. Li dire zot: ‘Allé al guette pays-la ek la ville Jéricho.’

Rahab ek deux espion israélite

Kan bann espion rente dan Jéricho, zot al dan lakaz Rahab. Mais kikenn dire le roi Jéricho: ‘Deux Israélite finn vinn ici a-soir pou espionne nou pays.’ Kan li tann sa, le roi envoye bann zom kot Rahab, ek zot donne li sa l’ordre-la: ‘Faire sa bann zom ki dan to lakaz-la, sorti dehors!’ Mais Rahab inn cachiette bann espion la-haut lor so lakaz. Alors li dire: ‘Li vrai ki ena bann zom ki’nn vinn kot moi, mais mo pa koné kot-sa zot sorti. Couma inn commence faire noir zot inn allé, avant ki la porte la ville fermé. Si zot faire vite, zot pou reussi maye zot!’ Lerla sa bann zom-la degazé galope derriere bannla.

Apré ki zot inn allé, Rahab degazé al la-haut lor so lakaz. Li dire bann espion: ‘Mo koné ki Jéhovah pou donne zot sa pays-la. Nou’nn tendé couma Li’nn faire la mer rouge sec kan zot ti pé quitte l’Égypte, ek couma zot finn touye bann le roi Sihôn ek Og. Mo finn montré moi bon envers zot, alors s’il vous plait promette moi ki zot pou montré zot bon envers moi. Sauve mo papa, mo mama, mo bann frere ek mo bann soeur.’

Bann espion promette pou faire sa, mais Rahab ti bizin faire enn kitsoz. Bann espion dire: ‘Prend sa la corde rouge-la ek attache li ar to la fenetre, ek rassemblé tou to bann famille dan to lakaz ensam avek toi. Ek kan nou tou nou pou retourné pou prend Jéricho, nou pou trouve sa la corde-la ar to la fenetre ek nou pa pou touye personne dan to lakaz.’ Kan bann espion retourne kot Josué, zot raconte li tou seki finn arrivé.

Josué 2:1-24; Hébreux 11:31.



Question

  • Kot-sa Rahab ti resté?
  • Kisannla sa deux zom lor zimage-la, ek ki zot pé faire dan Jéricho?
  • Ki le roi Jéricho ti demann Rahab pou faire, ek ki Rahab ti dire li?
  • Couma Rahab ti aide sa deux zom-la, ek ki faveur zot ti demann li?
  • Ki promesse sa deux espion-la ti faire Rahab?

Bann question en plus

  • Lire Josué 2:1-24.

    Couma promesse ki Jéhovah ti faire ki nou trouve dan Exode 23:28 ti realisé kan bann Israélite ti vinn laguerre kont Jéricho? (Jos. 2:9-11)

  • Lire Hébreux 11:31.

    Couma l’exemple Rahab mette l’accent lor l’importance pou ena la foi? (Rom. 1:17; Héb. 10:39; Jacq. 2:25)