Skip to content

Skip to table of contents

Zistoire 41: Enn serpent en cuivre

Zistoire 41: Enn serpent en cuivre
Moïse ek serpent en cuivre

ESKI sa serpent ki autour sa poteau-la li enn vrai serpent? Non. C’est enn serpent en cuivre. Jéhovah ti dire Moïse mette li lor poteau pou ki le peuple kapav guette li ek contigne vive. Mais bann lezot serpent ki enba c’est bann vrai serpent. Zot finn pik bann dimoune ek bannla inn tombe malade. Eski to koné kifer?

C’est parski bann Israélite ti koz kont Bondié ek Moïse. Zot plaigné: ‘Kifer to’nn faire nou sorti dan l’Égypte pou vinn mort dan desert? Pena ni mangé ni de l’eau ici. Ek nou’nn plein ar mange sa la manne-la.’

Mais la manne enn bon mangé sa. Jéhovah ti donne zot sa a travers enn mirak. Ek c’est aussi par enn mirak ki Li ti donne zot de l’eau. Mais le peuple pena reconnaissance envers Bondié pou fason ki Li’nn prend zot soin. Alors Jéhovah envoye sa bann serpent rempli ar poison-la pou puni bann Israélite. Bann serpent pik zot ek beaucoup parmi zot mort.

Bann Israélite gagne mordé ar bann serpent

Finalement le peuple vinn guette Moïse ek dire: ‘Nou’nn faire peché, parski nou’nn koz kont Jéhovah ek kont toi. Asterla prié Jéhovah pou ki Li tire sa bann serpent-la.’

Alors Moïse prié pou le peuple. Ek Jéhovah dire Moïse faire sa serpent en cuivre-la. Li dire mette li lor enn poteau, ek n’importe kisannla ki’nn gagne piké bizin guette li. Moïse faire exactement seki Bondié dire. Ek bann dimoune ki ti gagne piké guette sa serpent en cuivre-la ek zot bien.

Sa aprann nou enn leson. Dan enn certaine fason, nou tou nou couma bann Israélite ki’nn gagne piké ar sa bann serpent-la. Nou tou nou dan enn situation kot nou pou mort. Guette autour toi, to pou trouve bann dimoune pé vinn vié, pé malade ek mort. Sa c’est parski Adam ek Ève, premier zom ek premier femme, ti tourne lé-dos ar Jéhovah, ek nou, nou zot bann zenfant. Mais Jéhovah inn donne nou enn moyen pou ki nou kapav vive pou touletan.

Jéhovah inn envoye so Garson, Jésus Christ, lor la terre. Ti couloute Jésus lor enn poteau, parski beaucoup dimoune ti pensé ki li mauvais. Mais Jéhovah ti offert Jésus pou sauve nou. Si nou guette Jésus, setadir si nou suive li, nou pou gagne la vie eternel. Mais plitar nou pou aprann plus lor la.

Nombres 21:4-9; Jean 3:14, 15.



Question

  • Lor zimage, ki kitsoz ki enroulé autour sa poteau-la, ek kifer Jéhovah ti dire Moïse mette sa la?
  • Couma le peuple pa ti montré zot reconnaissance envers Bondié pou tou seki Li ti faire pou zot?
  • Apré ki Jéhovah ti puni zot kan Li ti envoye bann serpent, ki le peuple ti demann Moïse pou faire?
  • Kifer Jéhovah ti dire Moïse faire enn serpent en cuivre?
  • Ki leson nou kapav aprann ar sa zistoire-la?

Bann question en plus

  • Lire Nombres 21:4-9.

    Nou finn trouvé couma bann Israélite ti critik bann disposition ki Jéhovah ti prend. Couma eski sa li enn l’avertissement pou nou? (Nomb. 21:5, 6; Rom. 2:4)

    Pendant bann siecle apré, couma bann Israélite finn servi sa serpent en cuivre-la ek ki action le roi Hizqiya ti prend? (Nomb. 21:9; 2 Rois 18:1-4)

  • Lire Jean 3:14, 15.

    Kan finn place enn serpent lor sa poteau-la, couma sa represente bien Jésus Christ lor poteau? (Gal. 3:13; 1 Pierre 2:24)