Skip to content

Skip to table of contents

Zistoire 52: Guidéôn ek so 300 zom

Zistoire 52: Guidéôn ek so 300 zom

ESKI to trouvé ki pé arrivé ici? Sa bann zom-la, c’est bann zom la guerre Israël. Bann zom-la pé versé pou boire de l’eau. Sa missié ki pé deboute pré ar zot-la, li-mem juge Guidéôn. Li pé guetté couma sa bann zom-la pé boire de l’eau.

Guette bien different fason ki sa bann zom-la pé boire. Certain kosté zot figure pré avek de l’eau. Mais enn pé prend de l’eau avek so la main, pou ki li kapav guetté ki pé passé autour li. Sa li bien important, parski Jéhovah ti dire Guidéôn choisir zis bann zom ki pé contigne veillé pendant ki zot pé boire. Bondié dire ki bizin faire le reste retourne zot lakaz. Anou guetté kifer.

Encore enn fois bann Israélite dan probleme. C’est parski zot pa finn obeir Jéhovah. Le peuple dan pays Madiân inn gagne pouvoir lor zot ek pé faire zot di-tort. Alors, bann Israélite suppliye Jéhovah pou demann Li l’aide, ek Jéhovah ecoute zot.

Jéhovah dire Guidéôn prepare enn l’armée, alors, Guidéôn rassemblé 32,000 zom la guerre. Mais ena enn l’armée 135,000 zom kont Israël. Ek mem sa Jéhovah dire Guidéôn: ‘To ena trop beaucoup zom.’ Kifer Jéhovah inn dire sa?

C’est parski si Israël gagne la victoire, kitfois zot kapav pensé ki zot inn gagné par zot-mem. Zot kapav pensé ki zot pa bizin l’aide Jéhovah pou gagne la victoire. A cause sa Jéhovah dire Guidéôn: ‘Dire tou bann zom ki pé gagne peur al lakaz.’ Kan Guidéôn faire sa, parmi so bann zom la guerre 22,000 al lakaz. Sa vedir ki reste zis 10,000 zom pou al laguerre kont tou sa 135,000 soldat-la.

Guidéôn testé so bann zom

Mais Jéhovah dire: ‘To encore ena trop beaucoup zom.’ Alors, Jéhovah dire Guidéôn faire sa bann zom-la al boire de l’eau dan sa la riviere-la. Li dire Guidéôn faire tou bann zom ki kosté zot figure pré ar de l’eau kan zot pé boire, retourne kot zot. Jéhovah promette: ‘C’est avek sa 300 zom ki contigne veillé pendant ki zot pé boire-la ki mo pou faire zot gagne la victoire.’

Asterla inn arrive ler pou al laguerre. Guidéôn divise so 300 zom en trois groupe. Li donne chaque zom enn trompette, ek enn gros pot avek enn la lampe endan. Kan arrive pré minuit, zot rassemblé autour camp bann soldat l’ennemi. Lerla, en mem temps zot sonne zot trompette, zot casse zot bann pot ek zot criyé: ‘L’epée Jéhovah ek l’epée Guidéôn!’ Kan bann soldat l’ennemi levé, zot abruti ek zot peur. Zot commence sauvé, ek bann Israélite gagne la victoire dan sa laguerre-la.

Juges chapitre 6 ziska 8.



Question

  • Couma ek kifer bann Israélite retrouve zot dan enn grand probleme?
  • Kifer Jéhovah dire Guidéôn ki li ena trop beaucoup zom dan so l’armée?
  • Comié soldat resté apré ki Guidéôn dire tou bann ki gagne peur pou rente kot zot?
  • Servi zimage pou expliké couma Jéhovah diminué l’armée Guidéôn ek faire li vinn 300.
  • Couma Guidéôn organise so 300 zom, ek couma Israël reussi gagne la guerre?

Bann question en plus

  • Lire Juges 6:36-40.

    Couma Guidéôn faire sur ki li pé faire volonté Jéhovah?

    Couma nou kapav konn volonté Jéhovah zordi? (Prov. 2:3-6; Mat. 7:7-11; 2 Tim. 3:16, 17)

  • Lire Juges 7:1-25.

    Ki leson nou kapav aprann ar sa 300 zom ki ti reste lor zot garde-la alors ki lezot pa ti pé veillé? (Juges 7:3, 6; Rom. 13:11, 12; Éph. 5:15-17)

    Pareil couma sa 300 zom-la ti aprann kan zot ti guette Guidéôn, couma nou aussi nou kapav aprann kan nou guette Grand Guidéôn, Jésus Christ? (Juges 7:17; Mat. 11:29, 30; 28:19, 20; 1 Pierre 2:21)

    Couma Juges 7:21 aide nou pou contente nou avek n’importe ki responsabilité ki nou gagné dan l’organisation Jéhovah? (1 Cor. 4:2; 12:14-18; Jacq. 4:10)

  • Lire Juges 8:1-3.

    Kan nou bizin reglé enn probleme avek enn frere ou-soit enn soeur, ki nou kapav aprann ar fason ki Guidéôn ti reglé discussion ki ti ena avek bann Éphraïmite? (Prov. 15:1; Mat. 5:23, 24; Luc 9:48)