Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 48: Bann Guibéonite faire malin

Zistoire 48: Bann Guibéonite faire malin

BEAUCOUP la ville dan Canaan pé prepare zot pou al laguerre kont Israël. Zot pensé ki zot kapav gagné. Mais le peuple ki reste dan la ville Guibéôn pa pense sa. Zot croire ki Bondié pé aide bann Israélite ek zot pa envie laguerre kont Bondié. Alors eski to koné ki bann Guibéonite faire?

Zot decide pou faire semblant ki zot sorti bien-bien loin. Alors, certain zom mette bann vié linge dechiré ek bann sandalette bien usé. Zot mette bann vié sac dechire-dechiré lor zot bann bourrik, ek zot prend deux-trois di-pain rasi. Lerla, zot al guette Josué ek zot dire: ‘Nou sorti dan enn pays bien loin, parski nou finn tann koz lor zot grand Bondié, Jéhovah. Nou finn tann bann kitsoz ki Li’nn faire pou zot dan l’Égypte. Alors, nou bann chef inn dire nou ramasse inpé mangé pou faire enn voyage pou vinn guette zot ek dire: “Nou zot bann serviteur. Promette ki zot pa pou laguerre ar nou.” Guetté, nou linge inn vinn vié ek dechire-dechiré a cause sa longue voyage-la ek nou di-pain inn rasi.’

Josué ek bann lezot chef croire bann Guibéonite. Alors, zot promette pou pa al laguerre kont bannla. Mais trois jour plitar, zot al aprann ki bann Guibéonite reste pré la-mem.

Josué demann zot: ‘Kifer zot inn dire ki zot sorti dan enn pays bien loin?’

Bann Guibéonite reponn: ‘Nou finn faire sa parski finn dire nou ki Jéhovah zot Bondié inn promette pou donne zot tou pays Canaan. Ek a cause sa nou ti bien peur pangar zot touye nou.’ Mais bann Israélite tini zot promesse, ek zot pa touye bann Guibéonite. Au lieu sa, zot faire bannla vinn zot serviteur.

Le roi Jérusalem en colere parski bann Guibéonite inn faire la paix avek Israël. Alors li dire quatre lezot le roi: ‘Vini aide moi pou laguerre kont Guibéôn.’ Ek c’est seki sa cinq le roi-la faire. Eski bann Guibéonite ti vrai-mem assez malin pou al faire la paix avek Israël? C’est seki nou pou guetté.

Josué 9:1-27; 10:1-5.

Josué ek bann Guibéonite


Question

  • Ki difference ti ena entre bann habitant Guibéôn ek bann Cananéen ki ti reste dan bann la ville alentour?
  • Dapré zimage, ki bann Guibéonite ti faire, ek kifer?
  • Ki promesse Josué ek bann chef Israélite ti faire zot, mais apré trois jour ki zot inn aprann?
  • Ki ti arrivé kan bann le roi lezot la ville finn aprann ki bann Guibéonite ti faire la paix avek Israël?

Bann question en plus

  • Lire Josué 9:1-27.

    Jéhovah Li-mem ti’nn donne nation Israël l’ordre “pou touye tou bann habitant sa pays-la,” alors ki bann qualité Li ti manifesté kan Li pa ti touye bann Guibéonite? (Jos. 9:22, 24; Mat. 9:13; Actes 10:34, 35; 2 Pierre 3:9)

    Kan li ti respecté l’alliance ki li ti faire avek bann Guibéonite, couma Josué finn donne enn bon l’exemple pou bann chretien zordi? (Jos. 9:18, 19; Mat. 5:37; Éph. 4:25)

  • Lire Josué 10:1-5.

    Couma la grande foule imite bann Guibéonite zordi, ek a cause sa kisannla ki attak zot? (Jos. 10:4; Zek. 8:23; Mat. 25:35-40; Rév. 12:17)