Skip to content

Skip to table of contents

Zistoire 47: Enn voleur dan Israël

Zistoire 47: Enn voleur dan Israël
Akân pé cachiette seki li’nn kokin

GUETTE seki sa missié-la pé enterré dan so la tente! Enn joli linge, enn bar l’or ek deux-trois piece l’argent. Li’nn prend sa dan la ville Jéricho. Mais ki ti bizin faire ar bann zaffaire ki ti ena dan la ville Jéricho? Eski to rappel?

Zot ti supposé detruire sa bann zaffaire-la, mais zot ti bizin garde l’or ek l’argent pou tresor tabernacle Jéhovah. Alors sa bann dimoune-la finn desobeir Bondié. Zot finn kokin bann kitsoz ki pou Bondié. Sa missié-la appel Akân ek bann lezot dimoune ki ar li c’est so famille. Anou guetté ki arrivé.

Apré ki Akân kokin sa bann kitsoz-la, Josué envoye bann zom pou laguerre kont la ville Aï. Mais zot perdi laguerre. Certain mort ek le reste sauvé. Josué bien triste. Li agenou, so figure a terre ek li prié Jéhovah: ‘Kifer to’nn permette ki sa arrive nou?’

Jéhovah reponn: ‘Levé! Israël inn faire peché. Zot finn prend certain kitsoz ki ti supposé detruire ou-soit ki ti supposé mette dan tabernacle Jéhovah. Zot finn kokin enn joli linge ek zot finn garde sa enn secret. Mo pa pou beni toi tant ki to pa detruire sa kitsoz-la, ek sa kikenn ki’nn prend sa bann kitsoz-la.’ Jéhovah dire ki Li pou montré Josué kisannla sa mauvais dimoune-la sa.

Alors, Josué rassemblé le peuple, ek Jéhovah faire koné ki c’est Akân, sa mauvais dimoune-la. Akân dire: ‘Mo finn faire peché. Mo’nn trouve enn joli linge, enn bar l’or ek bann piece l’argent. Mo ti tellement envie gagne sa bann kitsoz-la ki mo finn prend zot. Zot pou trouve bann kitsoz-la enterré dan mo la tente.’

Kan finn trouve sa bann kitsoz-la, finn amenn zot devant Josué, ek lerla Josué dire Akân: ‘Kifer to finn amenn malheur lor nou? Asterla Jéhovah pou amenn malheur lor toi!’ Apré sa le peuple envoye roche lor Akân ek so famille ziska zot mort. Eski sa pa montré ki fodé jamais nou prend bann kitsoz ki pa pou nou?

Plitar, Israël al laguerre kont Aï encore enn fois. Sa’nn fois-la Jéhovah aide so peuple, ek zot gagne la guerre.

Josué 7:1-26; 8:1-29.



Question

  • Lor sa zimage-la, ki sa zom ki pé cachiette bann di-bien ki sorti dan Jéricho-la, ek kisannla sa bann dimoune ki pé aide li-la?
  • Kifer seki Akân ek so famille ti faire ti bien grave?
  • Ki Jéhovah ti dire kan Josué ti demandé kifer bann Israélite pa ti gagne la victoire dan Aï?
  • Kan ti amenn Akân ek so famille devant Josué, ki ti arrive zot?
  • Ki leson bien important nou aprann lor condamnation Akân?

Bann question en plus

  • Lire Josué 7:1-26.

    Bann la priere ki Josué ti faire, ki zot aprann nou lor relation ki li ti ena avek so Createur? (Jos. 7:7-9; Ps. 119:145; 1 Jean 5:14)

    L’exemple Akân montré nou ki kitsoz, ek couma sa li enn l’avertissement pou nou? (Jos. 7:11, 14, 15; Prov. 15:3; 1 Tim. 5:24; Héb. 4:13)

  • Lire Josué 8:1-29.

    Ki responsabilité sakenn parmi nou ena envers congregation zordi? (Jos. 7:13; Lév. 5:1; Prov. 28:13)