Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 43: Josué vinn chef

Zistoire 43: Josué vinn chef

MOÏSE envie rente dan pays Canaan ensam avek bann Israélite. Alors li demandé: ‘Jéhovah, laisse moi traverse la riviere Jourdain ek guette sa bon pays-la.’ Mais Jéhovah dire li: ‘Assez! Pa koz sa encore!’ Eski to koné kifer Jéhovah inn dire sa?

C’est a cause seki ti arrivé kan Moïse ti tape lor roche. Rappel, li ek Aaron zot pa ti honore Jéhovah. Zot pa finn dire le peuple ki c’est Jéhovah ki ti tire de l’eau dan roche. A cause sa, Jéhovah dire ki Li pa pou laisse zot rente dan pays Canaan.

Alors, deux-trois mois apré la mort Aaron, Jéhovah dire Moïse: ‘Prend Josué, ek faire li deboute devant pretre Éléazar ek devant le peuple. Ek devant zot tou, dire zot ki c’est Josué zot nouveau chef.’ Couma to trouvé dan sa zimage-la, Moïse pé faire seki Jéhovah inn dire li.

Moïse annoncé ki Josué chef aster

Apré sa, Jéhovah dire Josué: ‘To bizin fort, ek pa peur. To pou dirige bann Israélite dan pays Canaan, pays ki mo ti promette pou donne zot, ek mo pou avek toi.’

Plitar, Jéhovah dire Moïse grimpe lor pointe montagne Nebo dan pays Moab. Depuis la-haut Moïse kapav trouve bien lot coté la riviere Jourdain ek joli pays Canaan. Jéhovah dire: ‘C’est sa pays-la ki mo’nn promette pou donne bann zenfant Abraham, Isaac ek Jacob. Mo finn laisse toi trouve li, mais mo pa pou laisse toi rente dan sa pays-la.’

Moïse mort la-haut lor montagne Nebo. Li ti ena 120 an kan li ti mort. Li ti encore fort, ek li ti encore trouve bien clair. Le peuple bien triste ek zot ploré parski Moïse inn mort. Mais zot content ki zot ena Josué couma zot nouveau chef.

Nombres 27:12-23; Deutéronome 3:23-29; 31:1-8, 14-23; 32:45-52; 34:1-12.



Question

  • Lor sa zimage-la, ki sa deux zom a coté Moïse-la?
  • Ki Jéhovah dire Josué?
  • Kifer Moïse monte lor mont Nebo, ek ki Jéhovah dire li?
  • Ki l’age Moïse ena kan li mort?
  • Kifer bann dimoune triste, mais kifer zot bizin content?

Bann question en plus

  • Lire Nombres 27:12-23.

    Ki grand responsabilité Jéhovah ti donne Josué, ek couma nou trouvé ki Jéhovah prend soin so peuple zordi? (Nomb. 27:15-19; Actes 20:28; Héb. 13:7)

  • Lire Deutéronome 3:23-29.

    Kifer Jéhovah pa ti laisse Moïse ek Aaron traverse Jourdain, ek ki leson sa aprann nou? (Deut. 3:25-27; Nomb. 20:12, 13)

  • Lire Deutéronome 31:1-8, 14-23.

    Couma bann dernier parole ki Moïse ti dire bann Israélite montré ki li ti accepté discipline ki Jéhovah ti donne li avek humilité? (Deut. 31:6-8, 23)

  • Lire Deutéronome 32:45-52.

    Ki l’influence Parole Bondié bizin ena lor nou la vie? (Deut. 32:47; Lév. 18:5; Héb. 4:12)

  • Lire Deutéronome 34:1-12.

    Mem si Moïse jamais pa ti trouve Jéhovah direct-direct, ki Deutéronome 34:10 dire nou concernant so relation avek Jéhovah? (Ex. 33:11, 20; Nomb. 12:8)