Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 42: Enn bourrik kozé

Zistoire 42: Enn bourrik kozé

ESKI to’nn deja tann enn bourrik kozé? Kitfois to pou dire: ‘Non, bann zanimo pa kapav kozé.’ Mais la Bible dire nou ki ti ena enn bourrik ki ti kozé. Anou guetté couma sa ti arrivé.

Enn ange

Bann Israélite pré pou rente dan pays Canaan. Balak, le roi Moab, gagne peur bann Israélite. Alors, li faire appel Balaam, enn prophete, pou donne bann Israélite malediction. Balak promette Balaam pou donne li beaucoup kass, alors Balaam monte lor so bourrik pou al kot Balak.

Jéhovah pa envie ki Balaam donne So peuple malediction. Alors, Li envoye enn ange avek enn longue l’epée pou deboute lor chemin pou arrete Balaam. Balaam pa kapav trouve sa ange-la, mais so bourrik oui. A cause sa, so bourrik rod evite sa ange-la, ek finalement li allonge li lor chemin. Balaam bien en colere, ek li batte so bourrik avek enn baton.

Lerla Jéhovah faire Balaam tann so bourrik koz ar li. Bourrik-la demandé: ‘Ki mo’nn faire pou ki to batte moi coumsa?’

Bourrik Balaam

Balaam reponn: ‘To pé faire moi passe pou enn bete. Si mo ti ena enn l’epée mo ti pou touye toi!’

Bourrik-la demann li: ‘Eski mo’nn deja traite toi coumsa?’

Balaam reponn: ‘Non.’

Apré sa, Jéhovah faire Balaam trouve sa ange ki pé debouté lor chemin avek so l’epée-la. Ange-la dire: ‘Kifer to’nn batte to bourrik? Mo’nn vinn la pou blok to chemin, parski fodé pa to al donne Israël malediction. Si to bourrik pa ti evite moi, mo ti pou touye toi, mais mo pa ti pou faire di-tort to bourrik.’

Balaam dire: ‘Mo’nn faire peché. Mo pa ti koné si to ti pé deboute lor chemin.’ Ange-la laisse Balaam allé, ek Balaam al guette Balak. Malgré sa, li essaye donne Israël malediction, mais au lieu sa, Jéhovah faire li beni Israël trois fois.

Nombres 21:21-35; 22:1-40; 23:1-30; 24:1-25.



Question

  • Kisannla Balak, ek kifer li ti envoye al cherche Balaam?
  • Kifer bourrik Balaam ti allongé lor chemin?
  • Ki Balaam ti tann so bourrik dire?
  • Ki enn ange ti dire Balaam?
  • Ki ti arrivé kan Balaam ti essaye maudit Israël?

Bann question en plus

  • Lire Nombres 21:21-35.

    Kifer Israël ti gagne enn victoire lor Sihôn, le roi Amorite ek Og, le roi Bashân? (Nomb. 21:21, 23, 33, 34)

  • Lire Nombres 22:1-40.

    Ki ti pousse Balaam pou rod essaye maudit Israël, ek ki leson nou kapav aprann ar sa recit-la? (Nomb. 22:16, 17; Prov. 6:16, 18; 2 Pierre 2:15; Jude 11)

  • Lire Nombres 23:1-30.

    Mem si Balaam ti donne l’impression ki li ti enn serviteur Jéhovah, couma seki li ti faire ti montré le contraire? (Nomb. 23:3, 11-14; 1 Sam. 15:22)

  • Lire Nombres 24:1-25.

    Couma sa recit la Bible-la fortifié nou la foi dan realisation projet Jéhovah? (Nomb. 24:10; Is. 54:17)