ESKI to koné ki été sa kitsoz ki trouve lor sa zimage-la? C’est enn la tente special kot adore Jéhovah. Appel sa aussi tabernacle. Depuis ki zot inn quitte l’Égypte le peuple inn prend enn an pou construire sa. To koné kisannla so l’idée sa?

Tabernacle

C’est Jéhovah. Kan Moïse ti lor montagne Sinaï, Jéhovah ti dire li couma pou construire sa. Li ti dire li faire sa dan enn fason kot li ti pou facile pou demonté. Coumsa ti pou kapav amenn bann different parti dan enn lot place, ek lerla ré-monte li. Alors, kan bann Israélite ti quitte enn place pou al enn lot place dan desert, zot ti sarié la tente-la avek zot.

Si to guette dan sa ti la chambre ki trouve dan finition la tente-la, to pou trouve enn boite, ou-soit enn coffre. Appel sa l’arche l’alliance. Li ena deux ange ou-soit chérubin en or, lor chaque coté. Bondié ti ré-ecrire Dix Commandement lor deux roche plate, parski Moïse ti casse bann premier-la. Ti garde sa bann roche-la dan l’arche l’alliance. Ti ena aussi enn pot dan ki ti ena la manne. Eski to rappel ki été la manne?

Jéhovah ti choisir Aaron, Moïse so frere, couma grand pretre. C’est li ki ti guide le peuple pou adore Jéhovah. So bann garson aussi ti bann pretre.

Asterla guette plus grand la chambre ki ena dan la tente. Li deux fois plus grand ki sa ti la chambre-la. Eski to trouve enn boite ou-soit enn ti coffre kot la fumé pé sorti? C’est lor sa l’autel-la-mem ki grand pretre brule l’encens, sa ti donne enn bon parfum. Apré, ti ena enn porte-lampe lor ki ti ena sept la lampe. Ek troisieme kitsoz ki ti ena dan sa piece-la, c’est enn la table. Lor la ti garde 12 di-pain.

Dan la cour tabernacle ti ena enn gros bol, ou-soit bassin, ki ti rempli ar de l’eau. Bann pretre ti servi sa pou lave zot. Ena aussi enn grand l’autel. Lor la ti pé brule bann zanimo mort couma enn sacrifice pou Jéhovah. Sa la tente-la ti au millieu la tente bann Israélite, ki ti pé campe tou autour li.

Exode 25:8-40; 26:1-37; 27:1-8; 28:1; 30:1-10, 17-21; 34:1, 2; Hébreux 9:1-5.



Question

  • Couma sa batiment lor sa zimage-la appelé, ek ti servi li pou ki kitsoz?
  • Kifer Jéhovah ti dire Moïse faire enn la tente ki ti pou facile pou demonté ek pou transporté?
  • Ki été sa coffre ki trouve dan sa ti la chambre dan fond la tente-la, ek ki ti ena ladan?
  • Kisannla Jéhovah ti choisir pou vinn grand pretre, ek ki li ti bizin faire?
  • Cite trois kitsoz ki trouve dan sa grand la chambre-la.
  • Ki deux kitsoz ti trouve dan la cour tabernacle, ek pou ki kitsoz ti servi zot?

Bann question en plus

  • Lire Exode 25:8-40; 26:1-37; 27:1-8; ek 28:1.

    Ki bann chérubin ki ti lor “l’arche temoignage” ti representé? (Ex. 25:20, 22; Nomb. 7:89; 2 Rois 19:15)

  • Lire Exode 30:1-10, 17-21; 34:1, 2; ek Hébreux 9:1-5.

    Kifer Jéhovah ti mette l’accent lor l’importance pou bann pretre reste pur, ek ki sa bizin pousse nou pou faire zordi? (Ex. 30:18-21; 40:30, 31; Héb. 10:22)

    Couma l’apotre Paul ti montré ki tabernacle ek l’alliance la Loi li ti nepli en vigueur lepok ki li ti ecrire so lettre bann chretien hébreu? (Héb. 9:1, 9; 10:1)