Skip to content

Skip to table of contents

Zistoire 35: Jéhovah donne so bann la loi

Zistoire 35: Jéhovah donne so bann la loi

SA FAIRE apepré deux mois ki bann Israélite inn quitte l’Égypte, zot inn arrive kot montagne Sinaï, ki aussi appel Horeb. C’est la-mem ki Jéhovah ti koz avek Moïse dan enn ti pié ki ti prend difé. Le peuple campe la-mem ek zot reste la pou enn boute le temps.

Pendant ki le peuple pé attann enba, Moïse monte lor montagne. La-haut lor montagne, Jéhovah dire Moïse ki Li envie ki bann Israélite obeir Li, ek vinn so peuple special. Kan Moïse desann, li dire bann Israélite seki Jéhovah inn dire. Ek le peuple dire ki zot pou ecoute Jéhovah, parski zot envie vinn so peuple.

Asterla Jéhovah faire enn kitsoz extraordinaire. Li faire la fumé sorti la-haut lor montagne, ek faire bann gros l’orage. Li aussi dire le peuple: ‘Mo-mem Jéhovah zot Bondié ki’nn faire zot sorti dan l’Égypte.’ Apré Li donne sa l’ordre-la: ‘Zot bizin pa adore okenn lot Bondié a part moi.’

Deux roche plate

Bondié donne bann Israélite encore neuf commandement, ou-soit la loi. Le peuple gagne extra peur. Zot dire Moïse: ‘Koz ar nou toi, parski nou gagne peur tension kan Bondié koz ar nou, nou mort.’

Plitar Jéhovah dire Moïse: ‘Vinn joinde moi la-haut lor montagne. Mo pou donne toi deux roche plate lor ki mo’nn ecrire bann la loi ki mo envie le peuple suive.’ Alors Moïse ré-al lor montagne. Li reste la-bas pendant 40 jour ek 40 nuit.

Bondié ena beaucoup-beaucoup la loi pou so peuple. Moïse ecrire sa bann la loi-la. Bondié donne aussi Moïse deux roche plate. Lor la, Bondié Li-mem inn ecrire 10 la loi ki Li ti dire ar tou le peuple. Appel sa bann la loi-la Dix Commandement.

Moïse lor montagne Sinaï

Sa Dix Commandement-la c’est bann la loi bien important. Mais, tou bann lezot la loi ki Bondié donne bann Israélite zot aussi zot important. Enn parmi sa bann la loi-la c’est: ‘To bizin content Jéhovah to Bondié avek tou to leker, tou to l’esprit, tou to nâme ek tou to la force.’ Ek enn lot dire: ‘To bizin content to prochain couma to-mem.’ Jésus Christ, Garson Bondié, dire ki sa-mem deux plus grand la loi ki Jéhovah ti donne so peuple Israël. Plitar, nou pou aprann beaucoup kitsoz lor Garson Bondié ek so bann l’enseignement.

Exode 19:1-25; 20:1-21; 24:12-18; 31:18; Deutéronome 6:4-6; Lévitique 19:18; Matthieu 22:36-40.



Question

  • Apepré deux mois apré ki zot inn sorti dan l’Égypte, kot-sa bann Israélite inn campé?
  • Ki Jéhovah ti demann zot pou faire, ek ki zot ti reponn?
  • Kifer Jéhovah ti donne Moïse deux tablette roche?
  • A part bann Dix Commandement, ki lezot la loi Jéhovah ti donne bann Israélite?
  • Dapré Jésus, ki deux pli grand commandement?

Bann question en plus

  • Lire Exode 19:1-25; 20:1-21; 24:12-18; ek 31:18.

    Couma bann parole ki trouve dan Exode 19:8 aide nou comprend ki kitsoz ki impliké kan nou voué nou la vie ar Jéhovah? (Mat. 16:24; 1 Pierre 4:1-3)

  • Lire Deutéronome 6:4-6; Lévitique 19:18; ek Matthieu 22:36-40.

    Couma bann chretien montré zot l’amour pou Bondié ek pou zot prochain? (Marc 6:34; Actes 4:20; Rom. 15:2)