Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 34: Enn nouveau qualité mange

Zistoire 34: Enn nouveau qualité mange

ESKI to koné ki sa bann dimoune-la pé ramassé enba? Li couma la neige. Li blanc, li fin ek li casse-cassé. Mais c’est pa la neige; c’est enn kitsoz pou mangé.

Bann Israélite pé ramasse la manne

Sa faire selman enn mois depuis ki bann Israélite inn quitte l’Égypte. Zot dan desert. Le peuple commence plaigné parski gagne tigit mangé dan desert, ek zot dire: ‘Plutot Jéhovah ti touye nou dan l’Égypte mem. Au moins la-bas nou ti pou gagne tou seki nou envie mangé.’

Alors Jéhovah dire: ‘Mo pou faire mangé tombé depuis le ciel pareil couma la pluie.’ Ek c’est seki Jéhovah faire. Lendemain gramatin kan bann Israélite trouve sa kitsoz blanc ki’nn tombé-la, sakenn demann so camarade: ‘Ki été sa?’

Moïse dire: ‘C’est sa mangé-la-mem ki Jéhovah inn donne zot pou mangé.’ Le peuple appel sa la MANNE. Li gagne mem gout ki bann ti gateau di-miel.

Moïse dire le peuple: ‘Sakenn bizin ramasse quantité ki li pou mangé.’ Alors c’est seki zot faire toulé gramatin. Apré sa, kan soleil tape fort, la manne ki ti reste lor la terre commence fonn.

Moïse dire aussi: ‘Fodé pa ki personne ramasse la manne pou lendemain.’ Mais ena certain parmi le peuple ki pa ecouté. To koné ki’nn arrivé? Lendemain gramatin la manne ki zot ti ramassé ti rempli ar le ver, ek ti commence senti pi.

Selman, ena enn jour dan la semaine, setadir sixieme jour, Jéhovah dire le peuple ramasse la manne deux fois plus ki zot ti habitué. Sa jour-la Jéhovah dire zot ramasse pou lendemain aussi parski septieme jour Li pa pou faire la manne tombé. Kan zot ramasse la manne pou septieme jour, li pa ti rempli ar le ver ek li pa ti senti pi. Sa c’est enn lot mirak!

Pendant tou sa l’année ki bann Israélite inn reste dan desert-la Jéhovah finn donne zot la manne pou mangé.

Exode 16:1-36; Nombres 11:7-9; Josué 5:10-12.



Question

  • Dan zimage, ki le peuple pé ramassé enba, ek couma appel sa?
  • Ki l’instruction Moïse ti donne le peuple lor couma pou ramasse la manne?
  • Ki Jéhovah dire le peuple faire sixieme jour, ek kifer?
  • Ki mirak Jéhovah faire pou ki la manne resté septieme jour?
  • Pendant comié le temps inn donne le peuple la manne pou mangé?

Bann question en plus

  • Lire Exode 16:1-36 ek Nombres 11:7-9.

    Ki Exode 16:8 montré concernant respé ki nou bizin montré envers bann frere ki ena responsabilité dan la congregation? (Héb. 13:17)

    Dan desert, couma eski toulé-jour ti rappel bann Israélite ki zot depann lor Jéhovah? (Ex. 16:14-16, 35; Deut. 8:2, 3)

    Ki signification symbolik Jésus ti donné lor la manne, ek couma nou kapav bann gagne bienfait ar “sa di-pain ki sorti dan le ciel-la”? (Jean 6:31-35, 40)

  • Lire Josué 5:10-12.

    Pendant comié l’année bann Israélite finn mange la manne, couma eski sa ti enn l’epreuve pou zot, ek ki leson nou kapav tiré? (Ex. 16:35; Nomb. 11:4-6; 1 Cor. 10:10, 11)